Ата-бабаларымыз ғасырлар бойы арман еткен тәуелсіздік таңын көру біздерге бұйырды, сондықтан да қазіргі ұрпақ өзін бақыттымын деп санауы керек. Шынында бостандықты бағалаудан, азаттықты ардақтаудан, тәуелсіздікке тәу етуден артық ешбір бақыт жоқ. Халқымыз бір жарым ғасырға созылған жоңғар шапқыншылығында, екі жарым ғасырға созылған патшалық отарлауға қарсы ұлт-азаттық көтерілістерде елінің еркіндігі үшін қан төгіп, қайғы жұтса да, тепкі көріп, тентіреп жүрсе де, бір сәт егемендікке деген ұмтылысын ұмытқан емес, рухын жасытқан жоқ.

Қайта тәуелсіздікке деген құштарлық атадан балаға аманат болып қала берді. Еркіндік аңсаған қазақ халқының өршіл мінезі, намысты жаныған жалыны жастардың желтоқсан көтерілісіне әкелді, тарихтың жаңаша жазылуына себепкер болды. Ар-намысы тапталған қыздар мен жігіттеріміздің азулы империя Кеңес Одағының өктемдігіне қарсы ұмтылысы шын мәнінде жойқын оқиғалардың басы болды. СССР құрамындағы 15 республиканың бірі Қазақстан 1991 жылдың 16 желтоқсаны күні өзінің тәуелсіздігін жариялап Қазақ ССР Жоғарғы Советі Қазақстан Республикасының тәуелсіздігі туралы заң қабылдады. Қазақ елі бостандық алды. Елбасымыз Нұрсұлтан Әбішұлы Назарбаев «Егемендік алу оңай емес, ал еңсесін тіктеген ел болу одан да қиын. Біздің алдымызда тәуелсіздікті қорғау, татулықты сақтау, тұрақтылықты орнықтыру сияқты аса күрделі тарихи істер тұр», деп айтқан болатын. «Нұрлы жол - болашаққа бастар жол» Жолдауында Президент мемлекетіміздің қалыптасқанын әйгілеп, оның жаңа экономикалық саясатын жариялады. Бұл құжаттың қай бағдарламасы болмасын ел Тәуелсіздігін одан әрі нығайтуға бағытталған.

Иә, тарихи өлшемдегі қысқа 23 жыл ішінде қазақтың кең даласында болашағы бекем, келешегі кемел мемлекет орнады. Осы жылдарда елдің көші аумай, шаңырағы шайқалмай, іргесі бекіп көршілермен шекарасы заңдылық жолымен белгіленіп, мемлекеттік құрылымдары негізделіп, елдік дәстүрлер қайта жаңғыртылды. Сондай-ақ еліміздің Тәуелсіздік нышанын анықтайтын мемлекеттік рәміздері қабылданып, төл ақшамыз - теңге айналымға енді. Жиырма үш жылда ұлтты ұйыстырып, қаймағы бұзылмаған берекелі бірлік орнады, ұлтаралық келісім мен діни түсіністікке негізделген бірегей қоғам қалыптастырылды.

Тағдырдың тәлкегінен әлемге тарыдай шашылып кеткен қандастарымыз құтты қара шаңыраққа қайта жиналуда. Қазақстан әлемнің алпауыт мемлекеттерімен терезесі тең әріптестік қарым-қатынас орнатты.

Тәуелсіздікті нығайта түсу мақсатымызды жүзеге асыру үшін елімізде кең көлемде әлеуметтік, саяси және экономикалық реформалар табанды түрде жүргізілді.

Бұл қайта құруларға бүгінде барша қазақстандықтар куә болып, оң нәтижелерін көруде, тәуелсіздік пен еркіндіктің жемісін татуда. Бүгінгі жетістіктеріміз елімізде қалыптасқан ұлтаралық және конфессиялық татулықтың, халықтар достығы мен ынтымағының арқасы деп білеміз.

Өзінің ашық та бейбіт ұстанымы нәтижесінде еліміз әлемнің төркүл дүнесіне танылып, беделді мүшесіне айналды. Елбасының халықаралық қауымдастық алдында көтеріп жүрген ірі бастамалары ядролық қарудан бас тартуға, өңірлік қауіпсіздік шараларын нығайтуға, G-глобал форматында кеңестер өткізуге, халықаралық терроризмнің алдын алуға бағытталған.

Экономикалық және әскери қауіпсіздігіміздің негізі Қазақстан Президентінің бастамасымен Кеңес Одағы орнында құрылған тәуелсіз мемлекеттер достастығы Кедендік Одақ, Евразиялық экономикалық кеңістік және әскери одақтастық ұйымдары болып табылады.

2011 жылы өткен Қысқы Азиада ойындары, 2012 жылы өткен Лондон олимпиадасы, әлемдік деңгейдегі саяси басқосулар еліміздің беделін асқақтата түсті, ал халықаралық «ЭКСПО-2017» көрмесінің Астанада өтетіндігі соның айғағы болды. Қолымыз жеткен жетістіктердің бәрі азаттық пен еркіндіктің арқасында, ұлттық мемлекетіміздің қолдауына сүйене отырып еткен еңбегіміз бен барлық тетіктердің айқын да үйлесімді жұмыстарының нәтижесі деп білеміз.

Клара НҰРПЕЙІСОВА

Қарашаның 21 күні аудан әкімі Д.Мусин жұмыс кеңесін өткізді. Онда Елбасы Жолдауын жүзеге асыру бойынша ауылдық округ әкімдері мен жеке бөлімдердің міндеттері туралы айтты.

Мәжіліс барысында ол Елбасының «НҰРЛЫ ЖОЛ - БОЛАШАҚҚА БАСТАР ЖОЛ» Жолдауының басты бағыттарына басшылардың назарын аудара отырып, Президент алға қойған міндеттерді шешудегі әрбір бөлімнің рөлі маңызды екенін көрсетті. – Жолдауды жүзеге асыруда оны егжей-тегжейлі зерттеп, өз жұмыстарын соған сәйкес бағдарлау керек. Әрбір қызмет бұл Жолдаудан өзіне қажеттісін тауып, өз міндеттерін айқындап, олардың орындалу уақытын нақтылағаны дұрыс. Атқарылатын әр жұмысты экономика таразысына салған жөн,- деді Дүйсенғазы Мағауяұлы.

Президент Жолдауы ірі жол инфрақұрылымдары мен энергетикалық жобаларды қарастырады. Аудандық ТҮКШ, автокөлік жолдары және жолаушылар тасымалы бөлімінің алдына жаңа экономикалық саясаттың мүмкіндіктерін қолдана отырып, аудан аумағындағы жолдарды салу және жөндеу жобаларын қамтамасыз ету қойылған. Орташа басымдыққа ие бағыттардың ішінде – күрделі автокөлік жолдарын жөндеу «Үлкенбөкен-Көкжайық-Үлгілімалшы», сондай-ақ, Тассай, Қарөткел, Преображенка-Теректі-Шұғылбай кіре беріс жолдарын жөндеу жұмыстары аяқталды. Сонымен қоса, ауданның жол жөндеу мекемелерінің әлеуетін, жергілікті құрылыс материалдарын барынша қолдану қажет, - деді аудан әкімі. Ауданда жол салу және жөндеу нарығындағы кәсіби тәжірибесі мол, абыройлы, мықты жол-құрылыс мекемелері бар. Осының барлығы бізге мультипликативті нәтиже беріп қана қоймай, экономиканың өсу қарқынын жоғарылатуға, салық түсімінің және халықты жұмыспен қамтудың өсуіне әкеледі. Сонымен қатар, біздің кәсіпкерлеріміздің болашағы мен дамуы үшін транзиттің үлкен рөл атқаратынын ескеру қажет.

ТҮКШ су және жылу желілері инфрақұрылымдарын модернизациялауға 2 триллион теңге және жыл сайын 2020 жылға дейін 200 миллиардтан кем емес қаражат бөлу жоспарланып отыр. –ТҮКШ, автокөлік жолдары және жолаушылар тасымалы бөлімінің міндеті Көкпекті және Самар ауылдық округтерінде су құбыры желілеріне жөндеу жұмыстарын жүргізу, - деп тапсырма берді.

Аудан әкімі өз бағдарламаларының өндірістік әлеуетін «КазАгроФинанс» арқылы жүзеге асыратын ірі ауылшаруашылық құрылымдардың қаржылық тұрақтылығының негізі болып табылатын, агро-өнеркәсіптік кешеннің дамуына басты назар аударды.

Аудандағы ең ірі мәселенің бірі – тұрғын үймен қамту. Кезекте төрт жүзден астам адам тіркелген. -Қазіргі Жолдау бұл мәселені шешуге зор мүмкіндік береді. Енді барлығы құрылыс, сәулет және қала құрылысы бөлімінің шапшаңдығына байланысты. Елбасы жалға берілетін тұрғын үйлердің құрылысына жаңа көзқараспен келуді ұсынды. Мемлекет әлеуметтік тұрғын үйлерді салады және оны халыққа ұзақ мерзімге жалға беріп, әрі қарай сатып алуға мүмкіндік береді. Осыған орай, құрылыс, сәулет және қала құрылысы бөлімі жалға берілетін қол жетімді тұрғын үйлерді салу құрылысына жобалық сметалық құжаттарды дер кезінде жасап, оған қосымша қаржыны тартуы тиіс. Жер телімін бөлуде кідіріс болмауы керек. Дүйсенғазы Мағауяұлы жобалық-сметалық құжаттарды дайындауда аса ұқыптылық қажеттігін назарға алды. -Түрлі ньюанстарды анықтау үшін жобаны жобалаушылармен бірлесе сараптан өткізу тәжірибеге айналуы тиіс. Мұндай тіл табысулар аудан мамандарына жұмысқа бүге-шігесіне дейін үңілуге ал, жобалаушыларға уақытында біздің ұсыныстар мен түзетулерді ескеруге мүмкіндік береді, - деді аудан әкімі.

Өз әлеуетінің орасан зор екендігіне қарамастан, туризм саласы бастапқы өркендеу сатысында болғанмен, өкінішке орай, аудан экономикасының дамуы үшін аз пайдаланылуда. Оның басты себебі – туристік нысандар инфрақұрылымдарының жоқтығы. Мемлекет басшысы өзінің «Нұрлы жол – болашаққа бастар жол» атты Жолдауында туризм үшін инфрақұрылым - жеке бағыт. Оның басты басымдығы жұмыс орындары санын көптеп құру мүмкіндігі болып табылатынын ерекше атап өткен. Аудан әкімі туристік салалардың дамуы бойынша ағымдағы ахуалды сараптап, түйінді мәселелерді айқындауды және оларды шешу жолдарын анықтауды тапсырды. –Ауданда туристік кластерді қалыптастыру жұмыстары басталғанмен, ол ұқыпты түрде саралау мен жүйелеуді және осы мәселелердегі әрекеттерді барлық бөлімдер мен ауылдық округ әкімдері үйлестіре отырып жұмыс істеуі тиіс, - деп түйіндеді аудан әкімі.

Жаңа экономикалық саясат әлеуметтік инфрақұрылымдардың өркендеуін назарда ұстап, бәрінен бұрын, апатты мектептердің мәселесін шешуді қарастырады. Аудан бойынша Бастаушы ауылында бір апатты мектеп бар. Оны жаңарту құрылысына арналған құжаттар дайын. «Нұрлы жол» бағдарламасы аясында бұл жобаны қаржыландыру аудандық білім беру бөлімінің міндеті. –Бұл мәселеде шапшаңдық қажет. Уақыт күтпейді, себебі біздің балаларымыздың денсаулығы мен қауіпсіздігіне қатер төнуде, - деп баса айтты Дүйсенғазы Мағауяұлы.

Ел Президенті Н.Назарбаев Жолдауында кіші және орта бизнесті, оның іскерлік белсенділігін қолдау қажет екенін айтты. Оның тапсырмасы бойынша кіші және орта бизнеспен ірі кәсіпкерліктің өркендеуіне Ұлттық қордан 100 млрд. теңге бөлінді. Бүгінгі күні 10 жылға бар жоғы 6 пайызбен бизнесті несиелеу арқылы елімізде теңдесі жоқ жағдай жасалып отыр. Бұл кіші және орта бизнестің экономикалық өсімін құрып, оның өркендеу жұмыстарын жалғастыруға және жалпы ішкі өнімнің үлесін 2050 жылға дейін ұлғайту үшін қажет. Жолдаудағы осы бағытты түсіндіре отырып, аудан әкімі кәсіпкерлік бөлімінің басшысына Ұлттық қордан мемлекет қаржылай қолдау көретін кіші және орта бизнестегі азық-түлік өндіру, өңдеуші өнеркәсіп және қызмет көрсету саласындағы жобаларды жүзеге асыру бойынша тапсырма берді.

Қыс мерзімінің ауа райы орныққандықтан аудан әкімі ауылдық округ әкімдерінен көшелерді қардан тазарту жұмыстарын ұйымдастырып, ең бірінші кезекте мектепке, балабақша мен ауруханаға апарар жолдарды ашып, тротуарлар мен баспалдақтар және екінші кезектегі көшелерді қардан тазалауды тапсырды. Мемлекеттік мекемелердің жетекшілері өз ғимараттарының төңірегін қардан аршып отыруын қадағалауға, емделушілер мен келушілердің емін-еркін кіріп-шығу жолдарын қамтамасыз етуге міндетті.

Дүйсенғазы Мағауяұлы жиынды қортындылай келе бүгінгі Жолдау мемлекетіміздің алға басқан қадамында нық сеніммен бүкіл дүние елдерін жалт қаратқан дағдарысқа қарсы жасалған Жаңа Экономикалық саясаттың тосқауылы екеніне тоқталды. Бұл саясат елдің және күрделі кезеңдегі қоғамның тұрақтылығын дамытуға негізделген. –Қабылданған «Нұрлы жол» бағдарламасы – бұл әрқайсымыздың іс-әрекетімізге жетекшілік етеді – деді ол.

Надежда ШАРОВА

Былтырдан бастап барша қазақстандықтар шын мәніндегі халықтық мереке – Тұңғыш Президент күнін атап өтуде. Президент күні ретінде 1-желтоқсан таңдалып алынды. Бұған дейін де заманауи Қазақстанның жылнамасына алтын әріптермен жазылып үлгерген бұл күн ендігі жерде айтулы мереке ретінде халқымыздың жүрегіне отаншылдық, патриоттық сезім сеуіп, тойлана беретін болады. Еліміз үшін ең тағдырлы кезең болған 1991-жылдың 1-желтоқсанында Қазақстанда тұңғыш рет жалпыхалықтық сайлау өтіп, егемен еліміздің негізін қалаушы асыл ұлы Нұрсұлтан Әбішұлы Назарбаев қазақ мемлекетінің тұңғыш Президенті атанғаны белгілі. Сол күні сайлауға қатысқан дауыс беру құқығы бар барша азаматтардың 98.78 пайызы Нұрсұлтан Назарбаевты қолдап дауыс беру арқылы өздерінің тарихи таңдауын жасаған еді.

Республикамызбен бірге Шығыс Қазақстан облысы да, біздің ауданымыз да қарқынды дамып келеді. Бүгінде біз тұрғындардың өмір сүру сапасы жыл сайын айтарлықтай жақсарып келеді деп толық сеніммен айта аламыз. Экономика мен әлеуметтік сала тұрақты дамуда. Қазақстандықтар өз Отаны мен өз Президентін мақтан тұтады. Қазақстан азаматы болу — зор абырой және биік мәртебе. Сондықтан Отанымызды қастер тұтып, Тәуелсіз Қазақстанның Тұңғыш Президенті — Негіз қалаушы, Реформатор және Жасампаз ретінде Отанымыздың және әлемнің тарихына енген Елбасымызға сенім арту — әрқайсымыздың азаматтық парызымыз.

Біз, аудан тұрғындары еліміздің Көшбасшысының жақында ғана жария болған «НҰРЛЫ ЖОЛ - БОЛАШАҚҚА БАСТАР ЖОЛ» атты Жолдауын жүзеге асыруда ынтымақты болып, әрқайсымыз өз орнымызда еселі еңбек етуге тырысамыз. Аудан тұрғындарының өздерінің азаматтық белсенділіктерін танытатынына сенім мол.

Құрметті аудан тұрғындары, мерекемен құттықтай отырып, сіздерге мықты денсаулық, әрбір отбасына жылылық пен мейірім, елімізге тыныштық тілейміз!

Д.Мусин, аудан әкімі

Р.Беспаев, аудандық мәслихат хатшысы

Елбасы Нұрсұлтан Әбішұлы Назарбаев Еліміздің тағдырындағы ауылдың маңыздылығына мән беріп былай айтқан: «Жер абаттанса, ел ауқаттанады. Ауылдың амандығы — елдің амандығы». Бұл сөздердің мағынасы терең екені сөзсіз. Әрбір елдің, мемлекеттің бар болуы әрі дамуы экономиканың осы саласына, оның ахуалына тура тәуелді болады. Сондықтан да, осы салада еңбек етіп, өзінің бар күш-жігерлерін жұмсап отырған ауыл еңбеккерлеріне – нағыз еңбекқор адамдар деп айтсақ болар. Сіздердің еңбектеріңіздің арқауы – ауданымыздың сондай-ақ, облысымыз бен еліміздің мәртебесі.

Ауыл шаруашылығы мен қайта өңдеуші сала еңбеккерлері мерекесі күні еліміздің азық-түлік қауіпсіздігін қамтамасыз етіп отырған адамдардың алдында басымызды иіп, жүрекжарды алғысымызды айтамыз. Ауа райының қолайсыздығына қарамастан биыл да тұрғындарды нанмен қамтамасыз етуге жетерлік өнім жиналды. Аудандағы уақытша тұрақтандыру қорына жеткілікті мөлшерде картоп пен көкөніс салынды. Мал шаруашылығында да айтарлықтай жетістіктер бар. Бүгінгі күні ауданымыздың агроөнеркәсіп кешені ауыл шаруашылығын индустриалды-инновациялық жаңғырту, жаңа техникалар мен құрал-жабдықтарды, заманауи ресурс сақтаушы технологияларды қолдану негізінде дамып келеді. Осының бәрі өңірдің ауыл шаруашылығы, агроөнеркәсіп кешенінің аса зор әлеуетке ие екендігінің айғағы және бұл әрі қарайғы қарқынды дамуымыздың кепілі болмақ.

Құрметті ауыл еңбеккерлері мен агроөнеркәсіп кешенінің қызметкерлері, сала ардагерлері!

Сіздерді кәсіби мерекелеріңізбен шын жүректен құттықтай отырып, ауыл шаруашылығы саласын өркендетуге үлес қосқан сіздерге, сіздер арқылы барлық аграрлық саланың қызметкерлеріне шын жүректен алғысымызды айтып, келешекте де зор табыстар, мықты денсаулық, зор бақыт және отбасыларыңызға амандық, береке-бірлік тілейміз!

Д.Мусин, Көкпекті ауданының әкімі

Р.Беспаев, аудандық мәслихаттың хатшысы