Қысқы спрот түрін дамыту, оның ішінде хоккейді насихаттау мақсатында аудан бойынша қаншама қаражат, күш жұмсалып, хоккей қораптары жасалды. Жыл өткен сайын бұл қораптардың мәнін кетіріп жүрген тағы да өзіміз. Аудан бойынша 20 қорап бар, ал енді солардың қаншасында балалар асыр салып жүр екен?

Хоккей қораптарының 12-сі білім беру ошақтарының аумағында орналасқан. Атап айтқанда, хоккей қорабы дәл аулаларында орналасқан мектептер мыналар:  Әуезов атындағы, Новотимофеевка, Көкжайық, Маяковский атындағы, Қ.Аухадиев атындағы, Абай атындағы (Бастаушы), Казнаковка, Миролюбовка, Жансүгіров атындағы, Мариногор, Амангелді атындағы (Мамай) орта мектептер.    Ал сегіз спорт алаңы ауылдық округ аумағында арнайы алаңқайларда орналасқан. Атап айтсақ: Көкпекті ауылдық округінде екі, Самар ауылдық округінде екі қорап бар, сонымен бірге Үлгілімалшы ауылдық округінде, Палатцы мен Үлкенбөкен, Белое ауылдарында да мектептен тыс жерде орналасқан.

Айдын Тоқсанов Үлгілімалшы ауылы, Абай атындағы орта мектептің 10 сынып оқушысы. Көптеген жыр байқауларының жеңімпазы атанып жүрген жас ақынның өлеңдері алуан тақырыпты жырлайды. Өткен жылдың қорытындысы бойынша «Көкпекті ауданының ең үздік жас өнерпазы» атанған жас ақынның бір топ өлеңін назарларыңызға ұсынамыз.

МЕН КІМ?
Жанартаумын, атқылаймын мәңгілік,
Жанартаудың атқылауы заңдылық.
Жанартаудай жұлқынамын алқына,
Сонау биік өрге де мен талпынып!

Көк аспанмын, жүрегім таза, ашықпын,
Күн сұлуға өлсе де өлмес ғашықпын.
Алтын күнмін, көпке нұрын шашатын,
Дауыл тұрса толқын, көлдей тасамын!

ҰЛЫ АБАЙҒА ТАҒЗЫМ!
Ұлысы ұлықталып өткендердің,
Тынысы ақын болып кеткендердің,
Өлеңі өрелі елде өркендеуде,
Құрсауында кеткен жоқ өктем желдің.

Салыстыру мүмкін емес басқамен,
Ақындарда басқа тағдыр, басқа дем.
Шешен сөздің шын шебері - Абайда,
Терең ойлар, ізгі ниет, басқа әлем.

Абай - дана, Абай - дара, шын мықты,
Қара сөзбен саралаған шындықты.
Ұлы Абай тұл шындықты айтса да,
Қу заманы өз ішіне сыр бүкті.

Шындыққа жанып өлеңін,
Бойлаған ойдың тереңін.
Абайдың өлеңдерінен,
Тағылым алып келемін.

Мыңмен жалғыз арпалысқан,
Не кемі бар Алпамыстан.
Қазағымның Бас ақыны,
Ойы жүйрік, һас арыстан.

Көп оқыған білімдар,
Өлеңінде тұғыр бар.
Ойы қылыш, сөзі мір,
Соны сендер ұғыңдар!

Ақынның жан дүниесі шуақ па екен,
Шабыт барлық сезімнен қуатты екен.
Абай, Мұхтар, Шәкәрім ізі қалған,
Шығысым - шырайлы өлкем, жұмақ мекен.

Ұлы Абай - адалдықтың аспанысың,
Талайға алынбаған тас намысың.
Өшпес тұлға атанып, әрбір кезде,
Адамзат үлгі тұтар асқағысың!

Түспесін десең басқа мұң,
Ашық болсын десең аспаның.
Әрқашан, әркез, әр сәтте,
Абайды сүй, Абайды оқы, жас қауым!

ҚАЗАҚСТАН - ОТАНЫМ!
Бұл жазғаным басқа жырдан өзгеше,
Қосамын мұнда мақтау, нұрлы сөз неше,
Бүкіл халық жақсы емес пе егер де,
Адалдықты мергендікпен көздесе?!

Несі жақсы халық ерді ез десе,
Батырлығын, шыншылдығын сезбесе
Қазақстан жаса мәңгі, жарқылда,
Мен бастайын ғажап жырды ендеше.
Қазақстан - Отаным, жасыл орман
Зәулім сарай, еңселі елге қорған.
Қазағымның беделі асқар, арманы асқақ,
Бұл сенің бақытыңнан тапқан олжаң!

Қай теңеу тең келеді алабыңа,
Бас имес қайсы пенде талабыңа.
Көгіңнен күлімдесең нұр төгілген,
Мен сені тиек еттім қаламыма.

Отаным сені жазам марапаттап,
Өзгелер қуанамын қалса мақтап .
Сен үшін тау қопарам, жер қопарам,
Отаным өзің мені қойсаң баптап.

Айбынды рух, қазағымда ақ қанат,
Ал беделі кір шалмаған ақ парақ.
Тәуелсіз ғой Қазақстан - Егемен,
Азатпын деп әрқашан мен мақтанам.

Ақ тілегім мөлдір судың бұлағы,
Шұрайлы жер қазағымның тұрағы.
Айбынды жас, қанатты жас барында,
Жоқ елімнің болашаққа сұрағы.

Өзіңменен ер жеткенім - бақытым,
Өкінбеймін өтсе жастық уақытым.
Менің сенен үлгі аларым өте көп,
Асыл Отан - сенсің ізгі жақұтым!

БІЗДЕРГЕ АМАНАТ - ЕРТЕҢІ ЕЛІМНІҢ
Бодандықтың бұғаулы құрығында,
Білмей кеткен «еркіндік» ұғымын да.
Бейбіт күнді аңсаған талай бабам,
Бостандықтың бақытты тұғырында!

Өсиетін орындап бабалардың,
Тәуелсіздік құнын мен бағалармын,
Болашақты жастарға сеніп берсе,
Әлі талай асуды ала алармын.

Гүлдендірер елімді, өте күшті қарқынмен,
Қабілетті жастарым - таусылмайтын алтын кен.
Білім алып, әрқашан, ізденетін тоқтаусыз,
Мақтанатын әр кезде, намысты ұл қыз
жастармыз!
Патриоты елімнің, ешуақытта жасыман,
«Тәуелсіздік» - құдірет, қасиетіңе бас ұрам.
Әр қырынан танытар Қазақстан - Отанын
Өсіп жатыр елімде дарыны мол - жас ұлан!
Стратегия қабылдап, Қазақстан сан түрлі,
Солардың нақ жемісі биіктерге талпынды.
Қуанышқа кенелсін Отанымыз әрқашан,
Аман-есен жүрейік, Құдай қолдап халқымды!
Өр жастарды негіз ғып, патриотты өлеңім,
Қазақстан еліме жырдан шашу төгемін.
Қабілетті, дарынды, ниеті ақ жалынды,
Мағжан атам айтқандай
«мен жастарға сенемін»!
Таққан жоқ біздерге өткен күн аз айып,
Дарынды жастарым қалмасын азайып,
Біздерге аманат- ертеңі елімнің
Жастарға дем беріп, сеніммен қарайық!
Көз тігіп келеді еліміз шыңға асқақ,
Жастарым тұрса екен сол жолда көш бастап,
Бір мүдде, бір мақсат, бір болашақ!
«Мәңгілік ел» болуға басайық қадам нақ!

Мемлекет басшысы Н.Ә.Назарбаев:«Біз барша қазақстандықтарды біріктірудің басты факторы болып табылатын қазақ тілінің одан әрі дамуы үшін барлық күш-жігерімізді салуымыз керек. Сонымен бірге, елімізде тұратын барлық халықтардың өкілдері ана тілдерінде еркін сөйлей, оқи алуына, оны дамытуға қолайлы жағдай тудыру қажет» - деп атап көрсеткен болатын.
2016 жылдың 25-27 қаңтар аралығында Шығыс Қазақстан облысы бойынша «КАЗТЕСТ» бағдарламасынан диагностикалық тес-тілеу өткізілді. Ұйымдастырушы Шығыс Қазақ-стан лингвистикалық орталығы (директоры Б.Ағажаева). Бекітілген жоспар бойынша Көкпекті ауылындағы Көкпекті орта мектебіне 25 қаңтар күні Көкпекті, Жарма, Тарбағатай, Зайсан аудандарынан 65 ұстаз қатысқан үлкен жиында Білім және ғылым министрлігінің Ұлттық тестілеу орталығының өкілі Балғожина Шынар Хасенқызы тест сынағын алды.
Аталмыш іс-шараның үйлестірушісі Көкпекті ауданының «Мәдениет және тілдерді дамыту бөліміне» қарасты «Мемлекеттік және басқа тілдерді оқыту орталығы». Орталықтардың рейтингін жасауға орталық тыңдаушыларының «ҚАЗТЕСТ» бағдарламасы бойынша емтихан тапсыру нәтижелері туралы шынайы мәліметтер негіз болады. Рейтинг мәліметтері бұқаралық ақпарат құралдарында кеңінен жарияланатын болады. Сонымен қоса, «ҚАЗТЕСТ» бағдарламасының негізінде білім деңгейін жыл сайын бақылау көзделген.
А.Саржанов,
мәдениет және тілдерді дамыту бөлімінің басшысы

Рождество мерекесі – адамзаттың жақсылық, мейірім-ділік, есіркеу және сүйіс-пеншілік сияқты айнымас асыл құндылықтарының белгісі ре-тінде аталады. Қаңтардың 6-7 күндері Самар ауылындағы Святопокров храмында осы мерекеге арналған діни рәсімдер өтті. Алтыншы қаңтар күні түнімен Сочельник, яғни мереке алдындағы күн аталды. Онда шіркеуге келушілер діни уағыз тыңдап, екінші күні де таңертеңнен Иса пайғамбарға мадақ жырлар айтылып, уағыз тыңдалд. Шіркеуге келушілер өздерінің, туған-туыстарының денсаулығын тілеп, шырақ қойды. Шіркеуге мерекеге орай құлшылыққа жиналған қауымды Самар ауылдық округінің әкімі С.Дүсіпов құттықтады.
«Христиан православие шір-кеуі мемлекет пен діни бірлестіктердің арасында, оның ішінде біздің ауданымызда оң қарым-қатынастардың дамуына, қоғамымызда бейбітшілік пен келісімнің нығаюына үлкен үлес қосып келеді. Бұл терең құрметке және қадірлеушілікке лайық», - деді Салауат Қалымжанұлы. «Қазақстанда православие ең көп тараған конфессияның бірі болып табылады. Бізде Рождествоның Құрбан айтпен бірге демалыс күні болып жарияланғаны