Жуырда көңілді саз бен әсем назын жеткізе білген жайдарманшылар көкпектілік жанкүйердің көңілдерін өз әзілдерімен жадырата білді. Жастар орталығы мекемесінің ұйымдастыруымен Қазақстан Республикасы Тәуелсіздігінің 25 жылдығына орай аудан орталығы Көкпекті ауылының Қ.Алтынбаев атындағы мәдениет үйінде «Тәуелсіздік ұландары» атты «Маусымашар - 2016» фестивалі өтті.

Биғаш ауылдық округінде Наурыз мерекесі «Қош келдің, Наурыз!» атты мерекелік думан Маяковский негізгі мектебінде өтті. Мектептің іші сырты мерекеге сай безендірілді. Мектеп асханасында дәстүрлі наурыз көже пісіріліп, ауыл тұрғындарының ұйымдастыруымен әр көше дас-тархан жайды. Дастарханға қыстан қалған сүр ет, май, құрт тағы басқа ұлттық тағамдар қойылды. Ал, концерттік бағдарлама шымылдығын мектеп директоры С.Қалиев құттықтау жылы лебізімен ашса, ауыл тұрғыны Ж.Көпесов халыққа ақ батасын берді. Ақ жаулықты әжеміз Р.Саржанова жылы тілегін білдіріп, шашау шашты. Сонымен бірге, алтын алқа иегері көп балалы ана ауылымыздың береке-бірлігі нығая берсін, жаңа жыл жаңа бақыт, молшылық, табыс әкелсін деген ниетпен пәле-жаладан аршалап, шырақ жақты. Мерекелік концертті әр көше тұрғындары ұсынды. Спорттық жарыстан теннис және әйелдер, әжелер арасында қол күресі ұйымдастырылды. Жарыс барысында жеңімпаздарға арнайы демеушілер ұсынған сыйлықтар ұсынылды. Мереке соңы ауыл жастары үшін ұйымдастырылған думанды кешпен жалғасты.

Ж.Байсеңгірова,
клуб меңгерушісі

Дәстүрлі дінінен, ділі мен тілінен, әдет-ғұрпынан, тамырлы тарихынан ажыраған елдің болашағы жоқ. Сол үшін халқымыздың рухани құндылықтары мен асыл дінімізді, еліміздің өткенін саралап, құнттай білген жөн. Қазақ халқының ислам дінімен таныс болғанына мың екі жүз жылдан астам уақыт өтті. Содан бері салт-санасы, әдет-ғұрпы, әдебиеті мен мәдениеті мұсылмандыққа бейімделіп, ақырында Ислам діні халық ділімен біте қайнасып, ұлттық болмыстың ажырамас бөлігіне айналды.
Тарих беттерінен басқыншы елдердің бодан жұрттың ұлттық белгілерін, наным-сенімдерін ұмыттыруға тырысқанын, сөйтіп, өздерінің мәдени құндылықтарын тілі мен дінін тықпалағанын көреміз. Ал, өзінің тілі мен дінін, дәстүрі мен тарихын ұмытып, басқаны сіңіріп алған ел тәуелсіздігінен айырылады. Ислам діні мұны құптамайды. Оның келуімен ата-бабаларымыздың азаттыққа, дербестікке қол жеткізуі, қазақ қазақ болып, жоңғар қалмақтарымен арадағы үш жүз жылдық аумалы-төкпелі арпалыста өткен заманда да, одан кейін орыс отарында болғанда, Кеңес империясының атеистік идеологиясы үстемдік еткенде де ұлттық болмысымыздың сақталып қалуына себеп болған мұсылманшылық ұстанымымыз екені анық. Ендеше, арамызға от ала келген жат ағымдарға да сол арқылы қарсы тұра аламыз. Осыған орай аудан мешітінің бас имамы Кенжебек Қалиакпарұлымен тілдескен едік.
- Қазақстан мұсылмандары діни басқармасы өз қызметі аясында имам-молдалар мен жалпы дін қызметкерлері үшін 2016 жылды «Дін және тарих тағылымы» жылы деп жариялады. Бұл туралы Бас мүфти Ержан қажы Малғажыұлы Астанада өткен жиналыста мәлімдеп, осынау игі бастама аясында ата-бабамыздан қалған асыл жауһарларды қайта жарыққа шығарудың орайлы сәті, мол мүмкіндігі туғаны және әлем кітапханаларының сирек қорларында шаң басып жатқан ескі кітаптарды жарыққа шығарып, халықтың игілігіне ұсыну – бүгінгі ұрпақтың абыройлы міндеті санайтынын айтты. Сондай-ақ, осындай ізгі ниеттің нәтижесінде Діни басқарманың ғалымдары «Дәстүрлі Ислам жауһарлары» атты кітап дайындағаны, Алла қаласа, жуырда тұсауы кесілетіні, сонымен қатар тарихи діни оқу орындары туралы деректі фильмдер де түсірілетінін жеткізді Бас мүфти.

Хоккей ойыны - ауыл балаларына бұрын қол жетпес арман болатын. Тәуелсіздік алғаннан бері спорттың жан-жақты дамуына көңіл аудару арқасында ауыл өміріне сан түрлі спорт түрі ене бастады. Бұл ойынның дамуына, аудан, ауыл әкімшілігі, мектептер, кәсіпкерлер ұйым-дасқан түрде атсалысты. Әр мектеп ауласында, ауылдарда хоккей қорапшаларын салу үрдісі бірнеше жылдан бері қолға алынған болатын. Осыған орай, балалардың хоккейге деген қызушылығы артты.
Облыс бойынша жыл сайын «Жұлдызша» турнирі өте бастады. Бұған әр ауыл, әр ауданнан хоккей командасы құрылып, осы турнирге қатысқан әр ауданның командалары ынталы болды. «Жұлдызша» турнирі 10-13 және 14-16 жастағы балаларды қамтыды. Бұл хоккей ойыны үш кезеңнен тұрды. 1 кезең 12 ақпанда Көкпекті ауылында Үлкенбөкен, Үлгілімалшы, Теректі ауылдық округтердің балалары арасында, ал, 2 кезең Жарма ауданы Бақыршық ауылында өткен болатын. Мұнда көкпектілік хоккейшілер Тарбағатай, Зайсан, Үржар аудандары командаларымен бақ сынасты. Соңғы, шешуші 3 кезең наурыз мерекесі қарсаңында 18-23 наурыз аралығында Өскемен қаласында өтті. Аталмыш турнирге әртүрлі қала мен аудандардан барлығы 8 команда ойын көрсетті. Біздің хоккейшілеріміздің кішкентайлардан құралған топтары 5 орынға ие болды.