Бүгінгі күні фубол әлемдегі ең дамыған, кең тараған спорт түріне жатады. Ол бізге      Англиядан келді десек те, Ежелгі Египетте және майя үнділерінде оған ұқсас ойындар болған. Футбол жылдамдықты, тапқырлықты, шешім қабылдай білу мен төзімділікті      дамытады. Жыл сайын футбол өзінің тартымдылығымен, тартысты ойынымен, қайткенде де жеңіске жетуге деген құштарлығымен ойнаушылардың қатарына мыңдаған ұл балалар мен ерлерді еліктіреді.

Миллиондаған адамдар бос уақыттарында футбол ойнаса, миллиардтаған адам әлемдік чемпионатты қалт жібермей тамашалайды. Кәсіби ойыншылар, футбол жұлдыздары қаншама адамның табынушысына айналған. Атақты Пеле, Диего Марадона, Роналдо, Зидан, Месси, Криштиано Роналду, Месут Озил және көптеген футболшыны жанкүйерлер пір тұтады.
Футболды сүйетін, еліктіріп әкететін осы әдемі ойынды жақсы көретіндер біздің ауданда да жетерлік. Жаз айларында аудан орталығы мен Самар ауылындағы футбол алаңдары ешқашан бос болмайды. Алаңнан жанұшыра доп қуалап жүрген жас жеткіншектерді де, ересек адамдарды да, олардың ойынын тамашалап отырған жанкүйерлерді де көруге болады.
Осы ойынның жанашырлары Көкпекті ауылында Әуесқой футбол лигасын құрды, ол үзбей жаттығу жүргізіп, түрлі жарыстарға қатыса отырып, өз ойын техникалары мен шеберліктерін шыңдай түсуге ықпал етеді.

Тамылжыған көктеммен ілесе келетін көркем мереке күні адамзаттың бесігін тербетіп отырған қымбат жандарға сөздердің маржаны, ең асылы арналатыны рас. Осыған орай, біз Көкпекті ауданы Тассай ауылындағы Батыр ана Кәмен Шақанқызы туралы әңгімелеп, ұзақ та бақытты өмір сүрудің қандай құпиясы бар екенін білгіміз, оған жүрекжарды жылы лебізімізді арнағымыз келді.
Кәмен Шақанқызы бүгінгі күні сексеннің сеңгірінен асып, тоқсанды толтыруға аяқ басқан, дүниеге әкелген балаларының қызығына бөленіп отырған аруана. Дүйсенбек ақсақал екеуі 11 баланы дүниеге әкеліп, ұлын ұяға, қызын қияға қондырған Батыр ана қосағымен қоса ағарып, бүгінгі күні Тассай ауылында бақытты қарттық өмірлерін сүруде. Балалық шағы ел басына күн туған аласапыран уақытқа тап келгенімен қоса, Кәмен әже кішкентайынан жетімдіктің кермек дәмін татып өсті. Сол жылдары ата-анасыз қалған тұл жетімдерге пана болған Көкпекті балалар үйіне әкелініп, Ж.Шайжүнісов сынды ұлағатты ұстаз алдын көреді. Көп ұзамай балалар үйінен қашып кеткен жұдырықтай панасыз қыз нағашы әженің қолында, басына түскен тағдырдың қатал сынына қасқая қарсы тұрып, бала болса да қиындыққа мойынұсынбай шыныға түскен болатын. Кәмен әженің айтуынша, ол кісі 13 жасында Сүлейменов Дүйсенбекке тұрмысқа шыққан. «Содан бастап 42 жыл бойы қой бақтық, жаз жайлау, қыс қыстауда жүріп талай қиындықты бастан кештік. Бүгінде еліміз егемендік алғанын көргеніме шүкіршілік етемін. Қазір ақсақалымыз екеуміз кіші келіндерім Ғалия мен Нұргүлдің күтіміндеміз. Ұрпақтарым тіл-көзден аман болсын, бүгінде 37 немере, 47 шөбере сүйіп, қазіргідей тәуелсіз, береке-бірлігі жарасқан, бейбіт елде тыныштық пен молшылық заманды да көрудеміз. Бір жағынан мал бағып, екінші жағынан бала өсіріп, ердің де

Көк желекті көктеммен бірге көңілге қуаныш сыйлай келетін аяулы аналарымыздың, әпкелеріміздің, қарындастарымыздың төл мерекесі – 8 наурыз мейрамын бәріміз асыға күтеміз.
5 Наурыз күні Самар мәдениет үйінде мерекелік жиын өтті. Бұл күні самарлық ер-азаматтар гүл, сыйлық дайындап, анасының, қарындасының, сүйіктісінің жүрегіне қуаныш сыйлауға асықты. Барша әйелдер қауымын 8 наурыз - Халықаралық төл мерекесімен Көкпекті ауданы әкімінің орынбасары М.Теміржанов құттықтады. «Көктемнің шуақты күндеріндей нәзік жандардың жүздерінде қуаныш пен мейірім шапағаты төгіліп, әр адамның жанына шипа бола беріңдер», - деп тілегін білдірді. «Күннің шуағы – жылы, Ананың құшағы – жылы», – дегендей, дүниеде ананың балаға және барша азамзатқа деген мейірімі мен махаббатынан асқан құдірет жоқ. Ананың аялы алақаны мен жылы құшағын сезініп өскен сәбидің арманы не?!
Ақ жаулықты әжелер, ардақты аналар, қаракөз қарындастарға құттықтау сөздерін Самар ауылдық округінің әкімінің м.а К.Терин, мәслихат депутаты С.Жотабаев арнады - «Сіздер қашанда өздеріңіздің сыйлы, сүйікті, қадірлі екендеріңізді, өздеріңізсіз мына дүние бос екенін ұмытпаңыздар! Сіздердің үйлеріңізде әрдайым татулық, ынтымақ және молшылық орнасын!» Бұл күні дәстүр бойынша бірқатар еңбекшіл және ардақты қызметкерлер ауылдық округ әкімшілігің мадақтамасымен марапатталды, бағалы сыйлықтарға ие болды. Залда жиналған ханымдарға ауылдық округтің шаруа қожалықтары пен жауапкершілігі шектеулі серіктестігі басшылары барлық ер-азаматтардың атынан раушан гүлдерін табыстады, мерекелік жиналыс тамаша концертке ұласты.
Мереке қарсаңында ауылдық округінің қызметкерлері 85 жастан асқан еңбек және тыл ардагерлердің үйіне барып, көктем мерекесімен құттықтап, раушан гүлдерін, сыйлықтар табыстады. Қариялар ризашылықтарын білдіріп, ағынан жарылған тілектерін аямады.
Қанат АПСАДЫҚОВА

Мариногорка ауылдық округінде 27 ақпан күні «Тәуелсіздіктің 25 жылдығына» арналған «Мәмбет» ШҚ жүлдесі үшін волейболдан турнир өткізілді. Турнирге 7 команда: Мариногорка, Самар1, Самар 2, Бастаушы, Миролюбовка, Құлынжон және Белое ауылдық округтерінен келген командалар қатысты. Спорттық сайыс Мемлекеттік Әнұранмен және «Мәмбет» ШҚ басшысы Ж.Мәмбетов, округ әкімі Қ.Сұрашев құттықтау сөзімен ашылды. Келген командаларға «Мәмбет» ШҚ атынан дастархан жайылып, «Мариногорка командасына» Ж.Мәмбетов арнайы форма мен допты сыйлады. Волейбол өте тартысты да, қызықты өтті. Қатысушылар барынша белсенді ойын көрсетіп, финалға 4 команда шықты. Ойын қорытындысы бойынша 1- орынды Құлынжон, 2-орынды Белое және 3-орынды Миролюбовка командалары иеленіп, 1-орынға 50 000 теңге, 2-орынға 30000 теңге, 3-орынға 20000 теңге көлеміндегі ақшалай сыйлықтар және мадақтау қағаздарымен марапатталды. Сондай-ақ, жекелей: «Үздік шабуылшы», «Үздік байланыстырушы», «Үздік ойыншы» атақтары бойынша марапатталып, ақшалай сыйлықтар табысталды. Сайыстың жоғарғы деңгейде өтуіне, спорттың дамуы мен жастарға қолдау көрсеткені үшін «Мәмбет» ШҚ басшысы Ж.Мәмбетовке ауыл жас-тары шексіз алғыстарын білдіреді.
Б.Тегісхан, жастар саясатының маманы