Гитарамен «Жас қалам» әнін шырқап отырған «Толағай» вокалдық-аспаптық ансамблінің ал-ғашқы құрамындағы жігіттер. Қатарынан жеті жыл бойы дәл осы 23 ақпан күні өткізіліп келе жатқан ретро әндер кешінің бастамашылары да солар еді. 1985 жылы құрылған бұл топтың атағы сол кезде шарықтап тұрды. Бірнеше жыл бойы сахнадан түспей өнер көрсетіп, кешкі би кештерінде талай жас олардың шырқаған махаббат туралы сырлы әндерінің әуенімен табысқан еді. Виктор Бауэр, Қайрат Әткешев, Асыл Мұқашев, Вячеслав Тупицын, Серік Рсымбетов бүгінгі кештің гүліне айналды.
Көрермендер бұл ән кешін асыға күткен еді. Өйткені олардың басым бөлігі жастық шағының әндерін тыңдауға жиналған орта жастан асып қалған адамдар болатын. Қазақтың халық әндері, көше әндері мен 70-80 жылдардағы эстрадалық әуендер, романстар олар-дың қай-қайсысының болсын көңіл қылын тербеткендей. Толағайлықтардың әрқайсысы жеке-жеке ән шырқады. Олардың соңы-нан ерген жас буын, қа-зіргі күні өнердің «жілігін шағып, майын ішті»-деуге келетін Шәміл Ибраев, Нұрлан Тоянкенов, Гүл-зира Әткешова, Клара Сәдуақасова, Кеней Зейнолла, Марат Әбілмәжінов, Нұрлан Қайратұлы, Жаңа-бай Хасенов, Толғанай Айдынқызы және басқалары тамылжыта шырқаған әндер жастық шаққа саяхат жасатып қана қоймай, осы күні көңілді кеш сыйлады. Кештің көркі «Інжу-маржан» әжелер ансамблі орындаған сыған романсы болды. Кешті жүргізушілер А.Сүлейменов пен А.Адамов та шеберліктерімен, жеңіл әзіл-дерімен көрерменді шаттандырып отырды. Осылайша биыл құрылғандарына 45 жылдығын атағалы отырған «Толағай» ВАА жігіттері осындай игілікті шараны өткізуге көмек берген аудандық мәдениет және тілдерді дамыту бөліміне, Демалыс орталығына, барлық әртістерге және бас демеуші кәсіпкер А.Бойковқа алғыс айтты. Келесі кездескенше, достар!
Клара НҰРПЕЙІСОВА

Соңғы жылдары облысымызда хоккей ойындарын барлық ауылдарда дамытуға на- зар аударылуда.
Көпшілік ауылдарда қорапшалар жасалынған, қыс мезгілінде мектеп оқушылары мен тұрғындар спорттың осы түрімен шұғылданып, салауаттылық өмір салтын ұстануда. Біздің ауылдағы хоккей командасының мүшелері демеушілер мен мектеп әкімшілігінің көмегі арқасында толықтай спорттық құрал, киіммен қамтылды. Аудан мектептерінің хоккей командаларының арасында жолдастық кездесулер жыл сайын тұрақты өткізіліп тұрады. Оған біздің команда да қатысып, бірнеше рет жүлдегер болды. Өткен жылы Үлкенбөкен мектебінің оқушыларынан жасақталған команда аудан намысын облыстық чемпионатта қорғап келді.
Ауылдағы хоккей қорапшасы алаңының кү-тімі, қарынан тазалануы, спортшылардың дайындығы дене шынықтыру пәнінің мұғалімі Есет Нұрғазыұлы Тұқышевтің басшылығымен атқарылуда.
Ауыл тұрғындары мен кәсіпкерлер, мекте-біміздің бұрынғы жылдарғы түлектері ауыл спортын дамытуға қолдау білдіріп тұрады. Осының бір айғағы, биылғы жауған қалың қарды тазалауға мектеп ұстаздары бірнеше рет көмектесті. Олардан қалыспай өздерінің меншік техникаларымен жекелеген азаматтар да қолғабыс жасады.
Жуықта қалың жауған қарды өз техникаларымен Досан Алпысов пен Александр Курбатов ізгі көмектерін көрсетіп, 2 күн ішінде тазалап берді. Бұл көмекке балалар мен ата-аналар алғыстарын жаудыруда.
«Жоғарыдағы азаматтарға барлық мектеп ұжымы, оқушылар мен ата-аналар атынан алғысымды айтамын» – дейді Есет Нұрғазыұлы.Иә, осындай үлгілі, берекелі істеріміз көп болсын!

Қамқаш Шошайұлы,
Үлкенбөкен ауылы

Торықса да өмірде жасымаған,
Керегі де өзіңнен осы маған.
Басымды иіп өтермін мәңгілікке,
Жырларыңа тағдырдан жасымаған.
Қарсы жүзіп толқынға өмір кемең,
Арпалыспен түбі бір жеңем- деген.
Өміріме үлгі етіп келем сені,
Сен тірісің, өлмейсің, соған сенем.
М.Мақатаевтың туғанына 85 жыл толуына орай өткізілген «Поэзия кеші» жыр алыбы Мұқаңа деген өзінің жүрекжарды шумағымен шашу шашқан қарапайым ғана азамат Әмір Сіләмнің осындай өлең жолдарымен басталды.
Тағдырдың асқар шыңдарында талмай құ-лаш сермеген мұзбалақ қырандай қалықтаған Мұқаңның ғұмыры тым келте болса да, соңына қалдырған аманаты өлеңі исі қазақтың рухына мәңгілік арқау болатыны сөзсіз. Тассайдағы ақынның туған күніне арналған «Поэзия, менімен егіз бе едің» деген айдармен өткізілген музыкалы көркем-сазды бағдарлама соның айғағындай. Шағын ғана ауыл болса да өміріне өнерді тел ұстайтын тассайлықтар жыр дүлдүлін пір тұтатынын көрсете білді.
Поэзия кешінде Мұқағалидың өлеңдері оқы-лып, ақын өлеңдеріне әр кезеңдерде жазылған әндер орындалды. Әсем ән мен көсем жыр сайысында балалармен бірге үлкендер де сахна төріне шығып өз өнерлерін ортаға салып, қайран Мұқаңның қысқа ғұмырының қас-қағым сәттерінен үзінділер қойылды. М.Мақатаевтың «Сәби – Ана» өлеңін сюжетін арқау етіп қойылған сахналық қойылымда сөз атасының қадірін қатты қадірлейтін ұстаз, қазақ тілі мен әдебиеті пәнінің мұғалімі Мақпал Қапасова «Ананың монологін» сезімді баурайтын әсерлі мақаммен оқығанда, ана бейнесін сомдаған Шынар Ғалиеваның кәсіби шеберліктерін көргенде, сондай-ақ, заңғар ақынның торығып, жан күйзелісіне түсіп, тірліктен түңілген кездегі жан толғанысын естігенде кірпіктері шыланып, жастықтың қуаты бойында тасқындай тасыған кездегі құдіретті жырларына көрермен құшырлана қол соғып қоштап отырысты. Әдебиетші ұстаз Гүлмира Мұхаметқалиеваның өнегелі шәкірттері Мұқағали жырларынан үзінділерді кейіпкер образына кіріп көркем орындай білсе, балғын әнші Жанболат Сақыпжанов пен мектеп өрендерінің орындаған әндері мен Жібек Мақсұтхан орындаған «Саржайлау» сахна сәнін ажарландыра түсті.
Кішкене ғана балдырған Ақерке Қасенова «Шеше, сен бақыттысың» атты өлеңді риясыз бала көңілмен әрі асқан сезімталдықпен оқығанда, көптің көңілі босап, аналар жаулығымен көздерін сүртісіп отырды. Беу, дүние-ай!
Сегіз де қырлы, бір сырлы, әрі ұстаз әрі өнерпаз Нығметжан Смағұловтың орындауындағы «Құмған алған» мен «Арулар» әні, әнші Шынар Бүкембаеваның сыңғырлата салған «Жапырақ жүрек жас қайыңы» мен көңілді сырға бөктіріп, өткен шақтарды ойыңа түсіретін ойлы да мұңлы әуен «Күрең күзді» нақышына келтіре орындаған Гүлнара Қамзина мен ән ажарын енгізген жас бишілер Айым мен Зура және Жанболат пен Еламан және аталмыш шараның режиссері, бес аспап өнер иесі Шынар Ғалиева шырқаған Мұқаңның жастықтың жетегінде жүрген кездерінде туындаған әні «Ұнатамын мен сені» мен көркемөнерпаз Гүлжан Шмашева орындаған «Махаббат монологі» сияқты ән-жырдан шашу шашылды.
Көрермен қауым «Есіңе мені алғайсың» әнін бір кісідей қосыла шырқап, ақын рухымен қол бұлғай қоштасты.

Ақпан айының 5-7 аралығында Семей қаласында қоян-қолтық ұрыстың NOMAD MMA стилі бойынша ШҚО чемпионаты өтті. Бұл чемпионат Шығыс Қазақстан облыстық федерациясының 15 жылдығына арналды. Жарысқа облыстың барлық өңірінен үш жүзге тарта спортшы қатысты. Көкпекті ауданының құрама командасынан 17 адам барды.
Қоян – қолтық ұрыс, спортшыдан тек қана шапшаңдықты, төзімділікті талап етіп қоймай, дәлдік пен жігерлі болуды да қажетсінеді. Біздің командадағы спортшылар осындай балалар десем, артық айтқандық емес. Сондықтан да осыншама командалар арасында жалпыкомандалық екінші орынға ие болған жасөспірімдер ауданның абыро-йын асқақтатып қайтты.
Жүлделі орын алуға коман-даның әр мүшесі үлес қосты деу-ге болады. Бес бала өз салмақ дәрежесі бойынша бірінші орынға ие болды, атап айтсақ: Әли Махабеков, Сәбит Әкімбеков, Елдар Ермеков, Кәрімхан Ибраев, Санжар Жұмағалиев ерледі. Ал қыздар арасында Дарья Кондрашина, Юлия Шушакова, ұлдар арасында Дастан Жандарбеков, Тимур Жұ-манов, Аңсар Болатов, Ерназар Мақсұтов, Динияр Галиев, Рамир Айдаров, Ернұр Қайырлы, Далел Мәліков екінші орын алып команда қоржынына мол ұпай салды. Барлық жүлдегерлер өздеріне лайық марапатқа ие болды.
Бұл оқушылардың жарысқа қатысуына зор ықпал етіп, көмек қолын берген мектеп әкім-шіліктері мен ұжымдарына және Дарья Кон-драшинаға қаржылай көмек көрсеткен кәсіпкер В.Виничукке, аудандық «Жұлдыз»-«Новая жизнь» газетінің редакциясына алғыс айтамыз. Сіздердің еңбектеріңіз еш болмай, біздің команданың мүшелері жақсы нәтижеге жете білді. Алда әлі талай алар белесіміз бар.
Р. Жүнісов,
жаттықтырушы