9 cәуір күні аудан әкімінің міндетін атқарушы Рамиль Сагандыков республикалық олимпиада жүлдегері Анна Роздоминаны қабылдады. Мемлекеттік тілді жетік меңгерген озық шәкіртті айтулы жеңісімен құттықтай отырып, Рамиль Нығметжанұлы алдағы уақытта Аняны тек қана биік шыңдардан көретінімізге сенім білдірді. Кездесу барысында аудан басшысы дарынды оқушыларға үнемі қолдау көрсетіп отыру қажеттілігіне баса назар аударды.

Көкпекті орта мектебінің 10 сынып оқушысы, оқу озаты Анна Раздомина жақында республикалық олимпиаданың облыстық кезеңінде қазақ тілі пәнінен жүлделі І орынға ие болып, республикалық кезеңге жолдама алған болатын. 24-29 наурызда Атырау қаласында өткен республикалық олимпиадаға қатысып, ҚР Білім және Ғылым Министрлігінің ІІ дәрежелі дипломымен және күміс медальмен марапатталды. Дарынды қыздың бұл жетістігі, әрине аудан мәртебесін Республика көлеміне көтерді десек артық айтпағанымыз. Аняның жеңісіне оның тәрбиеленіп өсіп келе жатқан ыстық ұясы Көкпекті балалар үйіндегі тәрбиешілерінің де төбелері көкке жеткендей болғаны рас.

Сондай-ақ, талапты қыздың қазақ тілін жетік меңгеруіне ықпал жасап, білім нәрімен сусындатқан ұстазы М.Құрманғалиеваға шәкіртінің алғысы шексіз. Ұстазының үмітін ақтап, жеңіспен оралған дарынды қызға Көкпекті орта мектебінің демеушісі Бекбердинова Шолпан Майданқызы бағалы сыйлық ұсынып, қолдау көрсетті. Мектеп директоры Аслан Танысбаев пен мектеп ұстаздары демеушілік көрсеткен жомарт жандарға алғыстарын білдіріп, білім шыңының биігінен көрінген Аннаға болашақта шығармашылық табыс тіледі.

Ж.Қарымсақова, қазақ тілі мен әдебиеті пәні мұғалімі

Наурыз айының 18 жұлдызында Көкпекті орта мектебінде Ұлы Отан соғысының ардагері Мұстафа Халиуллиннің 90 жылдық мерейтойына арналған «Ұмытылмас сол күндер...» атты мерекелік кеш өтті.

Мереке мектеп оқушылары қойған көрініспен басталып, ардагерлерге арнап 6 сынып оқушысы Алдажұман Нұрәлидің орындауындағы «Прадедушка» әнімен жалғасты. Кешке соғыс ардагерлері Бирюков Илья Николаевич, Түсіпбеков Аркадий, Цепков Петр Иванович және тыл ардагерлері Түсіпбекова Қапия, Козловская Нина Тимофеевна, Сорокина Мария Родионовна, Искаков Менташ Рустамұлы арнайы шақырылды.

Сонымен қатар ел ағаларынан аудан әкімінің орынбасары Клара Рафикқызы Смаилова, білім бөлімінің басшысы Шолпан Нұрғазықызы Мұстафинова, ардагерлер кеңесінің төрағасы Атымтай Жылқыбайұлы Әбенов, аудандық қорғаныс істер бөлімінің басшысы Ринат Жақанұлы Абдрахмановтар қатысты.

Кеш барысында Мұстафа атаның өмір жолына арналған слайд көрсетіліп, батыр атаның көрген қиындықтары мен жасаған ерліктері баяндалды. Слайд аяқталғаннан соң, Отаны үшін, халқы үшін жанын қиған, тарих тақтасына есімдері алтын әріптермен жазылған, соңындағы ұрпағына бейбіт өмір сыйлаған соғыс құрбандарын еске алып, 1 минуттік үнсіздік жарияланды.

Кеш ортасында арнайы шақырылан ел ағаларына сөз беріліп, олар, соғыс ардагеріне ақ тілектерін білдірді.

Мұстафа атаға арналған мерекелік шара Алпысбаев Жарболдың орындауындағы «Көк тудың желбірегені» әнімен аяқталды.

От кешіп, қан жұтқан сол бір жылдар барған сайын бізден алыстауда. Майдан мен тылдың аты аңызға айналған ерлері барған сайын азая түсуде. Бірақ, олар жасаған Ұлы Ерлік ешқашан ұмытылмақ емес, зұлым жаумен шайқаста әке, аға, бауырымыз қанын төгіп, қолымыз жеткен Жеңіс шапағы кейінгі ұрпақтарға жетпек. Тоқсанның төріне жеткен Мұстафа Халиуллинге Ұлы Жеңістің 70 жылдығын тамашалаңыз, жасыңыз жүзге жетсін демекпіз.

Жанерке АБЫЛХАН