Шығыстың батыр, аты аңызға айналған ұлдары, барлаушы Қасым Қайсеновті білмейтін жан жоқ шығар. Оны тек қазақ жерінде ғана емес, Украйнада да құрмет тұтады. Қасым Қайсеновтың жазған шығармалары  көпшілік сүйіп оқитын бірегей туындылар қатарында.

Халық қаһарманының шығармалары бойынша әдебиеттік оқу  Самар орталық кітапханасында өтті. Жазушының «Отан үшін», Жау тылында», «Партизан анасы», «Карпатта», «Днепрдегі кездесу», «Зоя радистка», «Ажал аузынан», «Отряд ізімен» атты шығармаларынан үзінділерді Н.Нұржанқызы, Ажар Мұхамадиева, Дамир Кеңесов, Дильназ Алиназинова, Архат Нұрмұхамбет, Райхан Шәкерова, Бекзат Садықов, Тимур Шкибаев жатқа айтты. Бұл оқушыларды Ж.Болғанбаев атындағы орта мектептің қазақ тілі мен әдебиеті пәнінің мұғалімі Б.Хасенова дайындаған.

Кітапханашы Г.Бакиева балаларға алғыс айта отырып, барлығын марапаттап, сыйлықтар ұсынды. Аты аңызға айналған жазушы, партизан Қасым Қайсеновтің шығармасымен таныса отырып, оқушылар өздерінің Ұлы Отан соғысы туралы түсініктерін кеңейте түсті, патриоттық сезімдерін ұштап, кітап оқуға деген құмарлықтары артты.

Клара НҰРПЕЙІСОВА

Ұлы Жеңістің 70 жылдық мерейтойына орай, Көкпекті ауылындағы «Балерке» балабақшасының бүлдіршіндері Жеңіс саябағындағы ескерткішке гүл шоқтарын қойып, ардагерлер рухына тағзым етті.

«Тәрбие - тал бесіктен» демекші, балдырғандарды адамгершілікке, Отанын сүюге, оны қорғауға баулып, патриоттық тәрбие беру және ардагерлерді сыйлай білуге, оларды құрмет тұтуға үйрету мақсатында «Жеңіс жалауы» атты іс-шара өтті.

Әскери киімдерін киіп, қолдарына гүл ұстаған бүлдіршіндер ата-аналар мен келген қонақтарға өз өнерлерін көрсетіп, зор қошеметке ие болды.

Концерт барысында Жұлдыз тобы «Мен солдат боламын», «Бауыржан Момышұлы» әндерін, ал, Күншуақ тобы «Катюша» әнін орындап, мерекелік іс-шараны мәресіне жеткізді.

Майдан даласында қан кешіп, Отан үшін от кешкен Батырларды ұлықтаған жас ұрпақтың санасында бұл сәт мәңгі сақталары анық.

Жанерке АБЫЛХАН