Қайырымдылық – қазақ халқының ең ізгі де асыл қасиеттерінің бірі. Мүмкіндігі шектеулі қамқорлыққа алынған балаларға аялы алақанын тосып, жүрек жылуын ұсыну, сауабы мол іске атсалысу әрбір адамның азаматтық парызы. 

Ақпан айының 3 күні Көкпекті ауданында ұзақ жылдар дәрігер болып, адал қызмет көрсеткен жерлесіміз Жұлдыз Слямбекқызы Юсупованы еске түсіруге арналған волейбол ойынынан турнир өткізілді. Ақ халатты абзал жанға арналған еске алу турнирінің ашылу рәсіміне тума-туыстарымен қатар, дос-тары, қызметтестері өзі білім алған мектебінің ұжымы, жалпы алтын қолды дәрігерді танитын игі жақсылар түгел жиналды.
Турнир өткізуге мұрындық болған, көмек көрсеткен аудандық аурухана басшылығы және Көкпекті орта мектебінің ұжымы, достары болды. Жұлдыз білікті дәрігер еді. Оның айтылған сөзге мән беруі, орынды қалжыңы, әдемі әзілі және жүріс-тұрысы әрбір науқастың бойында өмірге деген құштарлық, сенімділік тудыратын. Ол күнделікті өмірде ағайын-туыс арасында сыйлы, үнемі жақындарының қасынан табылатын, ақыл-кеңесін, көмегін аямайтын абзал жан еді.

Көкпекті ауданының білім беру, дене шынықтыру және спорт бөлімімен келісілген жоспарға сәйкес Балалар өнер мектебінің ұйымдастыруымен «Нашақорлыққа жол жоқ!» тақырыбында аудандық плакаттар байқауы өтті. Қазіргі күннің тәртібінде тұрған аса маңызды әлеуметтік мәселені балалар көзімен байқауды, өскелең ұрпаққа салауатты өмір салтын насихаттауды мақсат еткен шараға аудан көлеміндегі барлық білім ордаларынан жас қылқалам шеберлері қатысып, өз дауыстарын, айтпақ ойларын шағын плакатқа сыйғызыпты.

«Кәрі құдаң — қыс келіп әлек салды» деп Абай жырлағандай, биылғы қытымыр қыстың әуресі мен азабы аз болып тұрған жоқ. Қазір қыстың нағыз күшіне енетін кезеңі өтіп жатыр. Қыстың қаңтар, ақпан айлары бұрқасынды, боранды болып келеді. Қарлы боран қатты аязбен қабаттасса аса қиын жағдай туындайды. Ауа-райының аяқ астынан құбылуы таң қалдыратын жағдай емес. Қоңыр күздің жылы күндерін көзден аяқ асты бұлбұл ұшырған таяудағы аязды күндер елдің есін әбден алды. Осы орайда Көкпекті орталық аудандық аурухананың дәрігер-реаниматолог, анезтезиолог және реанимация бөлімінің меңгерушісі Сәбит Жолдасбекұлы Жалбағаевты сөзге тартқан едік.
– Кейбір адамдар күн суытса болды берекесі қашып, тоңғақ келеді. Оның себебі неде?
– Мұны «суықтық аллергия» деп атайды. Сәл тоңа бастаса мұрны бітіп, түшкіріп, көзінен жас ағып, денесіне бөртпе-қызамық шығып, тіпті «Квинке іркілі» де пайда болады. Ұзақ уақыт суық жел өтінде қалған адам – өмірге қауіпті, анафилактикалық шокқа ұшырауы да мүмкін. «Суықтық аллергия» дегенімізді – иммундық жүйенің суыққа қарсы жасаған беталбаты әрекеті деп түсінген жөн. Егер иммунологтың көмегіне дер кезінде жүгінер болса, бұл дерттен де айығуға әбден болады. Сонымен қатар қысқы кезде ауада азот қос тотығы, автомобиль мен пештен шығатын түтіндер ұлғая түседі. Осыған байланысты суық және лас ауадан сақтандыру үшін аллергиктер мен астматиктерге арнайы термомаскалар ойлап тапты.