Сонау алыста қалған 1991 жыл-дың 16 желтоқсанында Қазақстан Республикасының тәуелсіздігі туралы Конституциялық заң қабылданған болатын. Бұл қоғамның, адам құ-қықтары мен бостандықтарының, меншіктің, саяси плюрализмнің және билік бөлінуінің негізгі қағидаларын бейнелейтін құқықтық, саяси және идеологиялық құжат. Осы іргелі ережелер Конституцияның негізін қалады. Еліміздің азаматтары үшін осы бір ерекше күн ел тарихының ескі сатысының аяқталып, жаңа дәуірдің басталуы.
Тәуелсіздік – бұл біздің басты байлығымыз, баға жеткізгісіз жетістігіміз. Жас елдің тарихындағы жаңа дәуір шынтуайтында өзінің бастауын Тәуелсіздіктен алады. Сондықтан Тәуелсіздік мерейтойы ерекше мәнге ие. Ел Тәуелсіздігінің 24 жылы ішінде елімізді дүниежүзі танып, Елбасының ерен еңбегінің, сындарлы саясатының арқасында саяси-экономикалық, әлеуметтік табыстарға қол жеткізуге мүмкіндік алдық. Қазіргі уақытта Қазақстан кемелді тәуелсіз мемлекетке айналды. Тәуелсіздік – тәңірдің біздің ұрпаққа берген үлкен бақыты, халқымыздың мәңгілік құндылығы. Біз бүгінге дейінгі барлық жетістіктерімізге Тәуелсіздіктің арқасында қол жеткіздік. Жиырма төрт жыл ішінде елдің әл-ауқатын көтеріп, төл мәдениетіміз бен мемлекеттік тілді жаңғырту ісінде қыруар жұмыстар жасадық. Елімізде білім, ғылым, денсаулық, спорт салалары айрықша даму үстінде.
Тәуелсіздік – біздің ең басты игілігіміз, баға жетпес құндылығымыз. Жас мемлекет тарихындағы жаңа дәуір дәл осы Тәуелсіздіктен бастау алады. Дәуір жасампаздығы сенімді және серпінді дамуға байланысты. Сондықтан да Тәуелсіздік ерекше маңызға ие.
Қ.Ильясов,
Көкпекті аудандық
әділет басқармасы басшысы

Көкпекті аудандық сотында тағы бір қылмыстық іс қаралды. Сотталушы А. деген тепсе темір үзетін жас жігіт өзінің алғашында жасаған қылмысы үшін қоғамнан оқшаулаусыз жазаға сотталған болатын.
Мұндай жаза алғандарды пробация қызметінің сақшылары бақылауда ұстайды. Яғни, олардың қылмысты қайталап жасамауы, тәртіп бұзбауын қадағалайды. Қоғамнан оқшаулаусыз жазасы тағайындалғандар пробация қызметінде тіркеуде тұрғандықтан, жұмыс істеп, қоғамдық тәртіпті бұзбай, айналасына зиян шектірмеуі бойынша бақылауға алынады. Олардың арасында үгіт-насихат жұмысы жүргізіледі. Ал бұл жазаны өтеп жүргендер бірнеше рет тәртіп бұзса, немесе қайталап қылмыс істесе, бұрынғы белгіленген жаза бас бостандығынан айыруға алмастырылады.
Бүгінгі қаралып отырған қылмыстық істе азамат А. бірнеше рет ескерту алғанына қарамастан, өзінің аудан аумағынан ешқайда кетпеу туралы берген қолхатындағы уәдені орындамай, аудан түгіл облыс аумағынан шығып кеткен. Сондықтан оған іздеу жарияланып, Ресеймен шекаралас облыстың бірінен шекарадан асуға әрекет жасаған жерінде ұсталған. Енді оның ісі пробация қызметінің ұсынысымен сотта қаралып, бұрынғы жазасынан қалған бір жарым жылға уақытты жалпы режимдегі түзету колониясында атқаратын болады.
Жас жігіттің тұрақты жұмыс орны жоқ. Өзі көрші ауданның тумасы. Алғашында жеңіл жазаға кесілгенімен, өкінішке орай өзінің еркіндігін бағалай алмады.
Клара НҰРПЕЙІСОВА