Әлемді фашизм басқыншылығынан азат етіп, бейбітшілік ұрығын себуге себепші болған сол бір Жеңістің биыл 70 жылдығын біздің елімізде де кең ауқымда атап өтуге даярлық баяғыда бас-талып кетті. Жыл басынан бері Жеңістің мерейтойына арналған іс-шаралар барлық мектептер, кітапханалар және мекеме, ұжымдарда жоспарлы түрде өтуде. Солардың қатарында Самар аграрлық-техникалық колледжі де бар. Колледждің мереке қарсаңындағы қарбаластары туралы директордың орынбасары Шәмшинұр Мұхтарқызы Қарымбаева әңгімелейді.

- Біздің мекеме жасөспірімдерге кәсіби білім берумен қатар олардың патриоттық тәрбиесіне де айрықша мән береді. Еліміздегі айтулы оқиғалар Қазақ хандығының 550, Ассамблеяның 20 жылдығы және Ұлы Жеңістің 70 жылдық мерейтойын атап өтуге біз жыл басынан бері жүйелі жоспар жасап, оны орындауды ерекше бақылауға алғанбыз. Жоспар бойынша қарастырылған шаралардың барлығына да студенттер толық қамтылып, ешқайсысы да сырт қалмауы басты мақсат етіп қойылды.

Ал енді тақырыптық кештер, ашық сабақтар мен кездесулер әр топта өтті. Атап айтсақ, №33 топта (топ жетекшісі Б.Дүсіпов) өткен ашық сабақ тарихи-өлкетану мұражай және орталық кітапхана мен бірлесе ұйымдастырылған. Онда соғысқа қатысқан жерлестеріміз туралы тың мәліметтер ұсынылып, жаңадан жасалған слайдтар көрсетілді. «Естелік кітабы» бойынша студенттер өздерінің таныстарын, туыстарын тізімнен тауып, олар жа-йында мәліметтер жинады. Мектеп кітапханашысы Д.Көшерова өткізген «Батыр қыздар» атты тәрбие сағаты Батыр қыздарымыз Әлия Молдағұлова мен Мәншүк Мәметоваға арналды. Ұлы Отан соғысы ардагерлері туралы түсірілген деректіі фильмді көріп, оны талқылауға арналған сынып сағаты да аса мәнді болды.

Колледждің әскери даярлық пәнінің мұғалімі Қ.Оспановтың ұйымдастыруымен Ауған жауын-герлерімен өткен кездесу аса тартымды болды. Инернационалист жауынгерлер студенттерге бүгінгі бейбіт күннің маңызы туралы жете айтып берді десе болғандай. Олардың барлығы да осы колледж қабырғасынан шыққан. Білім беру мекемесінің қабырғасында алған оқу, тәжірибе біліктіліктерінің өмірде сол атаусыз соғыс кезінде кәдеге асқанын баса айтты. Бұл бүгінгі студент үшін есте сақтарлықтай, үлгі боларлықтай өнеге. Қазіргі күні студенттер өздерінің ұстаздарымен бірге «Даңқ бұрышын» жабдықтап жатыр. «Отан үшін от кешкендер», «Батыр қыздар» атты стендтер жасалған. Олар колледж дәліздерінің көрнекі жерлерінде ілініп тұр. Сонымен бірге, оқушылар арасында саптық сайыс, суреттер   сайысы, патриоттық әндер сайысы, жыр мүшәйрасы өткізілді. Бұл шара әлденеше кезеңдерден тұрып, қорытындысы мамыр айында шығарылады.

Мереке күні жақындаған сайын маңызы арта түседі. Колледж студенттері ауыл тазалығы, абаттандыру жұмыстарына да белсене қатысады. Олар ауылдағы Даңқ мемориалы, Ауғандық жауынгерлер саябағына да қамқорлық жасайды. Патриоттық тәрбие тек қана кітаптан оқып, сурет пен кино көрумен шектелмейді. Әр студент патриоттық шаралардың бел ортасында бірге жүріп, оны ұйымдастырып, өткізуде де белсенділік танытуы тиіс. Сонда ғана олардың бойында еліне, жеріне, Отанға деген сүйіспеншілік пен намыс, жігер оянады. Біздің педагогтық ұжымның да алға қойған мақсаты осы.

Жазып алған Клара НҰРПЕЙІСОВА 

Ағымдағы жылдың наурыз айында, Көкпекті орта мектебінде Абай Құнанбаевтың 170 жылдығына орай аудандық «Абай оқулары» атты сайыс өтті.

Сайысты ұйымдастырудағы басты мақсат - А.Құнанбаев өлеңдерін жатқа және мәнерлеп оқуға, Абай әндерін орындай білу, Абай шығармашылығын өскелең ұрпаққа жан-жақты таныту, Абай мұрасын дәріптеп өсуге тәрбиелеу. Сайысқа ауданға қарасты барлық мектеп оқушылары қатысты. Мектеп акт залы қатысушыларға лық толы болды. ««Ер Тарғын», «Қобыландыны» оқып байқа, Абайды оқы, таңырқа, басыңды шайқа», -деп Сұлтанмахмұт Торайғыров бекер айтпаған. Абайдың шығармаларын оқыған адам Абайдың өзімен тілдескендей күй кешіп қана қоймайды, дананы тани білетін адам оны білгеннің үстіне біле бергісі келеді.

Ендеше, «Арттағыға сөзің мен ісің қалса, өлсең де өлмегенмен боласың тең», - деп Абай атамыз біліп айтқандай. Сайыс барысында «Өлең сөздің патшасы, сөз сарасы» атты жатқа оқу номинациясы бойынша бас жүлдені Әуезов атындағы орта мектептің 9 сынып оқушысы Ақтолқын Дауытқанова иеленсе, «Әнді сүйсең, менше сүй» номинациясынан бас жүлдені Казнаковка орта мектебінің 8 сынып оқушысы Елназ Бақытбекова, ал «Жүйріктен жүйрік озар» ақынға арнау номинациясын Абай атындағы мектеп-балабақша кешенінің 9 сынып оқушысы Айдын Тоқсанов қоржынына еншіледі. Әділқазы алқасының тарапынан орын алған оқушыларға мақтау қағаздары мен бағалы сыйлықтар табыс етілді.

Г.Мұхаметқалиева, қазақ тілі мен әдебиеті

пәні мұғалімі, Әуезов атындағы орта мектеп

Жаңа жылдың алдында Елбасы «Қазақстан Республикасының кейбір заңнамалық актілерге кәсіпкерлік қызмет үшін жағдайды түбегейлі жақсарту мәселелері бойынша өзгерістер мен толықтырулар» туралы Қазақстан Республикасының Заңына қол қойды. Осыған орай «Жол жүрісі туралы» Заңы қайта жанданып, бірнеше тармақ өзгерді. Көлік жүргізуге сенімхат алынып тасталды, сонымен қатар, пайдалану мерзімі 7 жылдан кем емес, не болмаса коммерциялық қызметте пайдаланылмайтын көліктерге міндетті техникалық байқау жүргізу қысқартылды. Сондай-ақ, «Жол қозғалысы» туралы Заңына сәйкес, «Елді мекендердегі жолдар мен көше бойларының арнайы белгіленген орындарынан басқа жеріне көлік қоюға салынған тыйым» нормасы алынып тасталды.

Сонымен қатар, осы жылдың 7қаңтарынан бастап Жол қозғалыс ережесінің жаңа редакциясы жұмыс істей бастады. Ал, «Нормативтік құқықтық актілер» туралы заңға сәйкес, «Бір деңгейдегі нормативтік құқықтық актілердің нормаларында қайшылықтар болған кезде қолданысқа кейінірек енгізілген актінің нормалары қолданылады», яғни қазіргі жағдайда жаңа жол қозғалыс ережесінің заңды күші бар.

Тағы бір айта кететін, ҚР ІІМ-нің баспасөз қызметі 1 қаңтардан бастап, сенімхатты алып тастау және көлікті қоюға тыйым салу бойынша нормалар жүзеге асырылады, олармен заң талаптарына сай өзгерістер енгізу бойынша Үкіметтің қаулы жобасы дайындалып жатқаны туралы мәлімдеді.

Құжаттамаларға жеңілдіктер енгізумен қатар, құқықбұзушылық үшін қатаң жаза қолдану да енгізілді. Жаңа жылдан бастап «Әкімшілік құқық бұзушылық туралы» Қазақстан Республикасының Кодексі заңды күшіне енгені туралы естеріңізге сала кетейін. Онда анықталған нормаларды сақталмағаны үшін айыппұл сомасы өсті. Мысалы, маневр жасау ережесі бұзылғаны үшін санкциялар 3-тен 5-ке дейін АЕК мөлшерінде өсті. 1 қаңтардан бастап 1 АЕК/айлық есептік көрсеткіш/-1982 теңге.

Сонымен бірге, көлік басқару құқығынан айырылған тұлға, мас күйінде көлік жүргізе отырып, абайсызда адам денсаулығына орта ауырлықтағы зиян келтіріп алғаны үшін жаңа Қылмыстық кодексте бас бостандығынан айыру жазасын тағайындау көрсетілген. Сол себепті, көлік жүргізу құқығынан айырылған тұлғаларға рөлге отырмас бұрын, ақыры неге алып келіп соғатынын ойлауы қажет.

Жүргізушілерге қысқартылған өндіріс тәртібімен айыппұлды 50% жеңілдікпен төлеуге мүмкіндік пайда болды. Ол үшін құқықбұзушы құқықбұзушылық жасалған мезеттен бастап 7 күн ішінде төлеуі керек. Осы кезде қысқартылған өндіріс, егер жүргізуші жасалған құқықбұзушылық фактісімен келісіп, кінәсін мойындап, еркіті түрде айыппұлды төлеуге дайын және ешқандай кінә қоймаған жағдайда жүзеге асырылады.

Бірақ, айта кетер жайт, бұл жеңілдік егер құқықбұзушылық сертификатталған арнайы автоматты тәртіпте жұмыс істейтін бақылау –өлшеу техникалық құрылғысымен тіркелген жағдайда, айыппұлдың толық сомасын төлеуге тура келеді.

Темір тұлпарды тізгіндеген әрбір жүргізушіні қазір қолданысқа енген және енетін жол жүру ережесі туралы заң алаңдатпай қоймайды. Енді күндіз де көлік шамын жағып жүруіміз міндетті. Себебі жаңа ЖҚЕ-не сәйкес күндізгі жүру жарығын пайдалану қажет, яғни, көлік құралын жүргізіп келе жатқанын білдіру мақсатында, көліктің жақын жарық шамы күндізгі уақытта да жанып тұруы қажет. Егер жол ережесін бұзған жағдайда жол-патрульдік полициясының қызметкері сізді тоқтатар болса, көліктен түспей оны күту де жаңа ережеде қарастырылған.

Жол жүру Ережесінде 12 жасқа дейінгі балаларға да көңіл бөлінген. Оларды арнайы ұстап тұратын құрылғысыз тасымалдауға тыйым салынған. Сол себепті автобөлегіш, жастықша-бустерлер және басқа да баланы қауіпсіздік белдігімен ұстап тұруға арналған белдіктерді қолдану қажет.

Күре жолда жылдамдықты 100-ден асырсаңыз, бұл да заң бұзғандығыңыз. Көлік сыртына сурет жапсыруға да енді қатаң тыйым салынады.

Сондай-ақ, ЖЖЕ-де көмекші құрал арықыл жүретін көлік жүргізушілерге жағдай жасалды. Көлік құралын басқаратын мүгедектерге немесе олардың қамқоршыларына тыйым салатын жол белгілеріне таратылмайды. Мысалы: «Көлік қоюға тыйым салынады». Шектелген мүмкіндіктері бар адамдар көлік құралын елді мекендердегі көлік қоюға тыйым салынған жол белгілеріне көлікті тоқтата алады. Егер ол жаяу жүргіншілерге кедергі келтірмесе, онда автокөлік тыйым салынған белгінің қасында қалдыруға болды.

Жаңа жылдан бастап Денсаулық сақтау министрлігі дәрі қобдишасының құрамын өзгертті, бірақ дәрі қобдишасының жаңадан сатып алуға жүргізушілер міндетті емес. Тек қана жетпейтін дәрі-дәрмекті сатып алса болғаны. Осылайша өз бетімен дәрі қобдишасын жасақтап алуға болады. Дәрі-дәрмек қобдишасының жаңа құрамы еуропа және Россия мен Беларусия мемлекеттерінің дәрі –дәрмек қобдишасының құрамына сәйкес әзірленген.

Барлық көлік жүргізушілеріне айтарым жолда зейін болыңыздар, ЖЖЕ қатаң сақтаңыздар және көлік - жол жүру құралы ғана емес, ол жоғары қауіптілік көзі екенін ұмытпаңыздар!

 Н.Нұралинов. Көкпекті ауданының

№ 2 аудандық сотының төрағасы 

Ағымдағы жылдың 14 наурызында Көкпекті ауылының Ж.Шай-жүнісов атындағы орта мектепте аудандық Жастар орталығының ұйымдастыруымен Қазақстан Халқы Ассамблеясының 20 жылдығына орай «Жастар тандауы – салауатты өмір» атты мекемелер мен ұйымдар арасында шағын футболдан турнир өткізілді. Турнирге Ж.Шайжүнісов атындағы орта мектеп, қазынашылық басқармасы, аудан әкімі аппараты, РЭС, қазақтелеком, аудандық орталық аурухана, Көкпекті жас-тары және Жастар командалары қатысты. Тартысты өткен турнирде «Жастар» командасы – 1 орын, «Көкпекті жастары» - 2 орын және Ж.Шайжүнісов атындағы орта мектеп - 3 орынға табан тіреді. Турнир нәтижесі бойынша Қожаев Азамат (Қазақтелеком) «Үздік ойын-шы» номинациясымен марапатталды. Барлық жүлдегерлер мен жеңімпаздар турнир соңынан мадақтау қағаздары және бағалы сыйлықтармен марапатталды.

 Бірлік Бексолтанов, Жастар орталығының маманы