Семей қаласында 20-21 қараша күндері денешынықтыру- сауықтыру кешенінде самбодан шығысқазақстандық біріншілік өтті. Әуезов орта мектебінің бас жаттықтырушысы А.Ізғұттинов бастап, төрт оқушыны дайындап, жарысқа апарды. Спортшыларымыз үш жүзден аса самбошылар арасында топ жарып, жүлделі орындарға ие болғанын мақтанышпен айта аламыз. Самбошылар Әділ Мәуітбеков 1-орын, Азамат Ноғайбаев 2-орын, Алдияр Қапсадықов 3-орын алып, өз салмақтарында осындай жетістікке жетті.

Қазақ күресінің қыр-сырын меңгеріп жүрген талапты спортшыларымыздың жеңістері мұнымен шектелмейтіні анық.

Қазақ елінің көк байрағын жоғары көтеріп, абыройын асқақтата беріңдер, демекпіз.

М.Садықова, тәрбие ісінің меңгерушісі, Әуезов орта мектебі, Тассай ауылы

Өткен аптада Көкпекті ауданында Дәулет Тұрлыханов атындағы спорт кешенінде Тәуелсіздік күніне арналған қазақша күрестен аудандық жарыс өтті.

Бұл күні ұлттық спорт түрі- қазақша күрес жарысына 1999 жылдан бастап 2003 жылы туған жасөспірімдер қатысты. Турнир барысында ауданымыздың түкпір-түкпірінен келген жас спортшылар бақ сынады. Екі қатар төселген күрес кілемінде қара терге түскен палуандар. «Бап шаба ма, бақ шаба ма» дегендей, жарыс барысында жер бауырлап жатқан қарсыласының белінен алып, ыңғайлы жағына аударып тастау әркімнің арманы болды.

Жарысқа қатысқан Көкжайық орта мектебінің оқушылары арасынан 6 «Ә» сынып оқушысы Мерей Қайратов пен 8 «Ә» сынып оқушысы Құштар Серікұлы – ІІІ орынды иеленіп, жас жаттықтырушы Данияр Орынбековтің сенімін ақтады.  Болашақта команданың басқа мүшелері де өздерінің шеберліктерін шыңдай түсетініне сенім мол. Аудан спортының дамуына үлес қосып жүрген жаттықтырушының шәкірттері әлі де жақсы нәтиже көрсетуге тырысады деп ойлаймыз.

Назгүл МУРСАЛИМОВА

Аудан орталығында 2004-2005 жылдары бой көтерген Орталық мешіт үйі соңғы жылдары сыртқы табиғат құбылыстарының әсерінен күмбездері мен мұнараларының сыны кетіп, жүдеу тартып тұрғаны көзі түскен мұсылман қауымның көңіліне қаяу салатын күйде еді. Өткен жылы қоршаулары жөнделіп, қақпасы тұрғызылған мешітті абаттандыру жұмыстары саябырсып қалған болатын.

Міне, жақында аудан әкімі Дүйсенғазы Мусиннің ұсынысымен жерлесіміз «Ромат» фармацевтикалық компаниясының президенті Тұрарбек Рақышев «Туған жерге тағзым» акциясы аясында мешітті күрделі жөндеу жұмыстарын бастағанын жамағат үшін қуанышты оқиға деуге болады. Мешіт күмбезінің жаңарып, сырт келбетіне өзгеріс енгенін байқаған біз, Көкпекті орталық мешітінің бас имамы Ерзат қажы Ахметханұлымен әңгімелескен едік.

-Аудан әкімінің ұсынысын жерде қалдырмай бүгінде Павлодар қаласында тұратын қолы ашық азамат, жерлесіміз, академик, экономика ғылымдарының докторы, профессор Тұрарбек Әмірханұлы Рақышев мешітті күрделі жөндеуден өткізу жобасын өзі жасап, жұмысшыларын әкеліп іске кірісіп те кетті. Күмбезді жаңалау жұмысына арнайы Қарағанды қаласынан сапалы металл жеткізіп, көгілдір түспен жасатты. Бұл жұмыстарға қомақты қаржы жұмсалғаны анық. Ауа райының қолайсыздығына байланысты ендігі кезектегі ішкі, сыртқы, кіре берісті жөндеу және ауладағы көркейту жұмыстары келесі жылы күн жылынғанда жалғасатын болады. Мешіт ұжымы мен жамағаттары, Көкпекті ауданының ақсақалдары және ауылдағы бүкіл мұсылман қауымның атынан туған жеріне тағзым етіп, көмек қолын созған Тұрарбек Әмірханұлының бұл игі ісіне аса зор ризашылығымызды білдіреміз. Алланың разылығына бөленсін, жүзеге асырып жатқан ісі өрге жүзіп, өзіне және отбасына денсаулық пен бақ-береке берсін дегіміз келеді, - деді Ерзат қажы қуанышымен бөлісіп.

Осындай жаны жайсаң азаматтардың ізгілігі, имандылығы мен кеңпейілділігі басқа да қалталы азаматтарға үлгі болары сөзсіз.

Бақыт МҮЛІКОВА, Көкпекті мешітінің жамағаты

Жұмыс бабы бойынша іс сапарда Тассай ауылдық округінде біз жеке кәсіпкер, Тассайда Ұлы Жеңістің 70 жылдық мерей тойына дайындық жүргізуші қоғамдық жұмыстардың төрағасы Жанат Ибрағимовпен тілдесуді жөн көрдік.

Жанат аға біздің –неліктен 70 жылдыққа дайындық жұмыстарын қолыңызға алдыңыз, деген сұрағымызға, таңдана жауап қайтарды: қалайша ат салыспаймын? Бұл біздің жерлестеріміз, біздің тарихымыз, бұл біз үшін қасиетті  ,соны біз келер ұрпаққа ұмыттырмауымыз керек. Сонымен қатар бұл ескерткіш, ауылымыздың көркі. Ауыл тұрғындарынан басқа кім бұл істі қолға алады. Ата-бабамызға тағзым ретінде жасалып жатқан титтей болсын жұмысымызға қалайша көмек қолын созбасқа. Ауыз бірлік болса жұмыста берекелі болады. Ауылда жұмыс қызып тұр, сондықтан қазір әр тұрғынның еңбек етіп, қаражат табуға мүмкіндігі бар. Ең бастысы ерінбей еңбек ету. Ал, майдан даласында қаза тапқан жерлестеріміз үшін жасалған ескерткішті жөндеу жұмыстарына селқос қарайтын адам болмайтын деп ойлаймын.