Жаз жайнатып, күн күлдіріп, біз лагерьге барамыз,-деп оқу жылы аяқталысымен мектеп оқушылары жазғы лагерьге баруға асығады. Жайраңдаған жаздың қуаныш пен шаттыққа толы ұмытылмас естеліктері балалардың осындай жазғы демалыс лагерінен бастау алары сөзсіз.

Жазғы балажай балалардың жазғы демалысында денсаулығын нығайтып, дене тәрбиесін шыңдап, күш жинауға, білімін толықтырып, жаңа әсер алуына ықпал жасайды. Осы мақсатта ұйымдастырылған Көкпекті орта метебіндегі «Солнышко» мектепалды лагері 2маусым күні өз есігін айқара ашты. Төрт маусымнан тұратын балажайдың алғашқы кезеңі қызыққа толы, түрлі ойындармен балаларға қуаныш сыйлады.

Маусымның әр күнінде мерекелік және балалар денсаулығын жақсарту бағытындағы іс-шаралар, спорттық жарыстар мен ойындар ұйымдастырылады. Лагерьде балалар демалысының басы-қасында жүрген мұғалімдер әр балаға ерекше ықылас бөліп, олардың сабақ барысында ашылмаған жаңа қырынан танылуына, мұғаліммен, оқушылармен достар боп сырласуына қажетті барлық жағдайды жасауға тырысып бақты. Мәселен, әр топта ойын-сауықпен қатар әр-түрлі спорттық ойындар, психологиялық тренингтер, дәрігер тарапынан медициналық таза ауада өткізілетін гимнастикалық жаттығулар,экскурсия мен серуендер үнемі өткізіліп тұрды. Ал, балалардың достық қарым-қатынасы, азаматтық сезімдерінің қалыптасуы үшін лагерьде жорықтар, көңілді кештер өткізілді. Лагерьге келген оқушылардың денсаулығынмектеп медбикесі күнделікті тексеріп,олармен сауықтыру іс-шараларын жүргізді.Балалардың сапалы тамақтануы да назардан тыс қалмай, тағам мәзірі жіті қадағаланды.

Күндерін таңертеңгі жаттығудан бастаған балалардың демалыстарын тиімді әрі қызықты ұйымдастыру бағытында жұмыс жоспары жасақталып, әр күні әр тақырыпта шаралар өткізілді. Атап айтқанда, "Көрікті менің ауылым!", "Денің сау болсын десең...", "Жаңылтпаштан жаңылмас, жұмбақ айтып жарыстырар", "Жаз аруы-2014", "Жігіт сұлтаны", " Ертегілер еліне саяхат" , "Мемлекеттік рәміздер-ұлттық мақтанышым" т.б танымдық сағаттарға балалардың барлығы белсене қатысты. Сайыстардан орын алған балалар мақтау қағаздарымен және естелік сыйлықтармен марапатталды. Балалар, сондай-ақ мұражайға, спорт кешеніне, саябаққа барып, әсем табиғатты тамашалады. Балалардың жазғы демалысы қауіпсіз түрде өтуі мақсатында Көкпекті аудандық төтенше жағдайлар бөлімінің әдіскері С.Тілебалдин және жол полиция қызметкері А.Зарықпаев балалармен кездесу өткізіп, қауіпсіздік ережелері бойынша нұсқаулықпен таныстырды. Кездесу барысында оқушылар ағаларының айтқан ескертулерін мұқият тыңдап, ойға түйіп алды.

Бұл лагерьде балалар демалумен қатар білім көкжиектерін кеңейтіп, шығармашылыққа бейімделеді және денсаулықтарын нығайтады.

-Жыл сайын әр ауысым бойынша әлеуметтік жағынан аз қамтылған отбасының балалары лагерьдің белгіленген кестесіне сай демалады. Балалардың бос уақытын тиімді әрі қызықты ұйымдастыру бағытында жұмыс жоспары құрылып, шаралар өткізіледі. Балалар таза ауада шынығып қана қоймай, туған өлкеміздің ғажап табиғатымен және тамыры терең тарихына қанық болады. Олардың бойынаадамгершілік қасиеттерді сіңіру –біздің басты мақсатымыз,-дейді Көкпекті орта мектебі директорының міндетін атқарушы Шолпан Ғабдуллина.

Балалардың әр күнін көңілді өткізуге атсалысып жүрген мектеп директорының тәрбие ісі бойынша орынбасарының міндетін атқарушы, бастауыш сынып және денешынықтыру пәні мұғалімдерінің, медбикенің, дәмді ас мәзірін даярлайтын аспазшылардың еңбегі зор екендігі анық.

Балалардың жүрегіне ізгілік пен қуаныш сыйлай ашылған жазғы «Солнышко» демалыс лагерінде демалушылар бос уақыттарын мағыналы өткізіп қана қоймай, белгілі бір бағытта білімдері мен қабілеттерін жетілдіріп қайтқаны сөзсіз.

Раушан Қанапиянова,

Көкпекті орта мектебінің мұғалімі

Биыл білім беру саласында ұлттық бірыңғай тест тапсыру енгізілгеніне он жыл толды. Он жыл дегенде алғаш рет біздің аудан басшылығының талмай атқарған еңбегінің арқасында тест тапсыру орталығы өз ауданымызда ашылды. Ашылғаны жаңа болса да, оның жұмысының ұйымдастырылуына БҒМ–нен келген мамандар жоғары баға берді.

Ал осы он жылдың ішінде дәстүрлі түрде мектеп бітіруші түлектерге арналып аудан әкімінің балы өткізіледі. Мектеп бітірушілер кешіне биыл да жүзге жуық бала қатысты. Олардың арасында «Алтын белгі» иегерлері Ақбота Мұқатаева (І.Жансүгіров ОМ), Қымбат Қожамбетова (Октябрь ОМ), Ақмаржан Бекбердинова (Көкжайық ОМ), Виктория Гармашова (Көкпекті ОМ), Темірхан Зарыпханов (Ж.Болғанбаев атындағы ОМ), Нұрлан Құмаров (Ж.Шайжүнісов атындағы ОМ), «Үздік аттестат» иегерлері Алуа Құсманова  (Преображенка ОМ), Кәмила Аққозинова (№1 Самар ОМ), Дәуітбай Дәурен (№1 Самар ОМ)  болды. Сонымен бірге, олимпиадаларға қатысқан, спортта үздік болған түлектер де аудан әкімінің мектеп бітірушілер кешіне шақырылды. Биыл аудан бойынша 21 түлек 100-ден жоғары балл жинады. 

Мектеп бітіруші түлектерді аудан әкімі Д.М.Мусин құттықтады. – Қазіргі сәт барлықтарыңыздың да, балалар мен олардың ата-аналары, ұстаздары үшін толқулы болып тұрғанын түсініп тұрмын. Сендерге сәттілік тілеймін. Үлкен өмір жолына сендер еліміздегі жауапты сәтте аттағалы тұрсыңдар. «Қазақстан – 2050» Стратегиясын жүзеге асыру сендердің міндеттеріңнің бірі болмақ. Сол сенім үдесінен шығуға тырысыңдар. Өздерің таңдаған мамандықты игере отырып, еліміздің дамуына үлес қосады деп сенемін. Алға қойған мақсаттарыңызға жете беріңіздер, сәт сапар!, - деді Дүйсенғазы Мағауяұлы. Биыл аудан бойынша ҰБТ нәтижесі 78,6 баллды құрады. Бұл - өткен жылғымен салыстырғанда жоғары көрсеткіш. Бұл ауданымызда ҰБТ орталығының ашылуына да тікелей байланысты. Аудан әкімі атынан барлық түлектер естелік сыйлықтар мен аттестаттарын қолдарына алды.

Мектеп түлектерін, ата-аналар мен ұстаздар  қауымын аудандық мәслихат хатшысы Р.Беспаев құттықтады. Сонымен бірге, биыл мектепті немересі аяқтап жатқан Қ.Аухадиев атындағы ауылдық округтің ардагерлер кеңесінің төрайымы Т.Шнайдер ізгі тілегін айтып, жылы лебізін жеткізді. Мектеп түлектері атынан аудан бойынша ең жоғары 122 балл жиған К.Аққозинова құттықтау сөз алып, аудан әкіміне, ұстаздарға  алғысын айтты.

Кереметтей шоу бағдарлама ұйымдастырылып, концерттік нөмірлердің барлығы да бүгінгі кеш иелеріне арналды. А.Дарибаеваның орындауындағы вальс әуеніне түлектер соңғы билерін билесе, «Дәншік» балабақшасының кішкентай тәрбиеленушілері мен тәрбиешілері билеген «Дочки-матери» биі көптің көңілінен шықты. Түлектер кешінің құрметіне аудандық «Толағай сазы» ұлттық аспаптар оркестрі тамаша күйлерді шебер орындады.

Кештің шарықтау шегінде түлектер «Асыл армандар» гүлінің ішіндегі шарларды ұшырды, ал айналмалы орынтақта орнатылған алып қоңырау барлық түлектер үшін соңғы рет шырқалды.

Қажет Жүнісбеков, Ж.Шайжүнісов атындағы орта мектептің директоры:

-Түлектерді, ата-аналар мен ұстаздарды тағы да өмір белесінен өту күнімен шын жүректен құттықтаймын. Біздің мектеп биыл тамаша жетістікке жетті. Отыз екі түлектің 20-сы ҰБТ тапсырып, тоғыз жыл бойы болмаған айтулы оқиға – «Алтын белгіге» қол жеткіздік. Былтырғыға қарағанда ҰБТ бойынша көрсеткіш 8 пайызға артты. Бұл - мектеп үшін жақсы жетістік.

Қадыр Қайырғазинов, Көкжота орта мектебінің директоры:

-Биыл біздің мектеп ҰБТ-ға жүз пайыз қатысты. Былтырғыға қарағанда көрсеткіш 11 пайызға жоғары. Төрт оқушы екпінді болып аяқтады. Бүгінгі мереке күні барлық түлектерді үлкен өмірге аяқ басуларымен құттықтай отырып, сәттілік тілеймін. Түлектерге жылда осындай  тамаша мереке ұйымдастыратын аудан әкіміне, аудандық білім беру бөліміне мектеп ұжымы, ата-аналар атынан алғыс айтамын.

Роза Төлегенқызы, байырғы ұстаз:

-Мен және менің отбасым үшін бүгін қуанышты сәт. Осыдан он жыл бұрын қызым Альмира Ж.Болғанбаев атындағы орта мектепті «Алтын белгіге» аяқтаған болатын. Енді, міне, бүгін немерем Темірхан «Алтын белгі» алды. Әр отбасында осындай қуаныштар бола берсін. Барлығына ана және ұстаз ретінде нұрлы болашақ тілеймін.

Клара НҰРПЕЙІСОВА