Мәдениет майталмандарының басым бөлігі ауылдан шыққан. Сондықтан, ауыл мәдениеті - қашанда мәнді мәселе.
Көкжайық ауылдық округі өнердің қай саласынан болсын қалыс қалмайды. Бүгінде мәдениет үйі мен кітапхана халық игілігі үшін қызмет көрсетуде. Өнерсүйер қауымның сүйікті мекеніне айналған мәдениет ошағының 40 жылға тарта тарихы бар. Сәулеті келіскен бүгінгі мәдениет үйінің іргетасы 80-ші жылдары қаланғаны көп оқырман үшін беймәлім.

Ағымдағы жылдың 15 қыркүйегінде Қалихан Алтынбаев атындағы аудандық мәдениет үйінде кастинг өтті. Аудандық мәдениет және тілдерді дамыту бөлімі, облыстық мәдениет, архивтер және құжаттама басқармасымен бірлесіп ұйымдастырған байқаудың басты мақсаты - жалпы облыс  және аудандардағы жас таланттарды іздеп, олардың шығармашылығын дамытып, дарынды жастарды анықтау.

Шұғылбай ауылының тіршілігі көз сүйсіндіріп, көңіл толтыратын, тұрғындарының таным түйсігі әлдеқайда жоғары, ынтымағы айрандай ұйыған мекен. Бұл ауылды мұндай деңгейге жеткізген - ынтымағы жарасқан халықтың бірлігі мен еңбек.
Шұғылбай ауылында шағын футбол алаңын қоршау жұмыстары жүргізіліп жатыр. Сондай-ақ, ауыл тұрғындары мен кәсіпкерлердің көмегімен зираттар қоршалды. Енді алдағы уақытта саябақты қайта жөндеу жұмыстары басталады.

Ауылдық округ ақпараты

«Отан - отбасынан басталады». Ал өнегелі отбасы - жарасымды жұптан шығады. Осындай ырыс-ынтымағы, береке-бірлігі жарасқан отырған Губановтар отбасы Көкпекті ауылындағы интернационал отбасылардың бірі. Отағасы Петр Петрович Губанов 1958 жылы Ажа ауылында дүниеге келген.1976 жылы Көкжайық (Ивановка) орта мектебінің 10 сыныбын аяқтайды. Әскери қызметін Польша қаласында өткереді. Аудандық газетте 1976 жылдан бастап фототілші болып қызмет атқарады. Содан 1995 жылы жұмыс штатының қысқаруына байланысты жұмыстан босатылады.
Аудандық газетте жұмыс істеп жүрген кезінде Күлпаш Изажанованы жолықтырып, ғашық болады. Екі ұлттың салт-дәстүрі бойынша той жасап, отау құрады. Осы ауылда туып-өскен ерлі-зайыптылар жергілікті халықпен сіңісіп, ел игілігі жолында еңбек етті. Әке мен ананың ұлағатын тыңдап өскен олар үшін отбасы құндылығы бірінші орында. Содан бері екі ғашықтың бірге өмір сүріп келе жатқанына 36 жылдан астам уақыт өткен. Үш баланы аяғына тік тұрғызып, ұлдарын ұяға, қыздарын қияға қондырған Губановтар бүгінде үбірлі- шүбірлі болып, 8 немере тәрбилеп отырған үлкен әулет. Үйдің тұңғышы Русланның Лимана есімді келіншегі бар. Ал үлкен қызы Индираның жолдасы Рамилдің ұлты татар болса, кенже қызы Маринаның жүрегі қазақ жігіті Құрметке тиселі болыпты.
Орыс ұлтының келіні бола тұра Күлпаш апай ол елдің ұлттық тағамдарын дайындаудың шебері атанған. «Ұлың өссе - ер жеткені, қызың өссе - бой жеткені» дегендей, әр ата-ана «ұлын ұяға, қызын қияға қондыруды» өзіне парыз деп білген. Міне, бүгінде сол парыздарын орындаған Петр аға мен Күлпаш апай мейрамдарда бүкіл бала-шаға, немерелерінің ортасында жиналып, бір шаңырақ астында тату-тәтті өмір сүріп жатыр.