2016 жылы 16 желтоқсанда, Қазақстан Рес-публикасы Тәуелсіздігінің 25 жылдық мерейтойы күні, Самар ауылының перзентханасында еліміздің жаңа азаматы дүниеге келді.
Миролюбовка ауылының тұрғыны Анжела Ивановна Валтышева аман-есен ер бала босанды. Осыған орай, аудан әкімінің орынбасары Ерлан Қабайұлы Қалдыбаев аудан әкімінің атынан жас ананы құттықтап, естелік сыйлықтар табыс етті. Өз кезегінде, Анжела, аудан басшылығына шын көңілден алғысын білдірді.

Біздің корр.

Қазақ халқының бостандығы мен тәуелсіздікке апарған ұлы да, ұзаққа созылған жол тайғақ кешуден тұрады. Бұл жолда ата-бабаларымыз ұлан-ғасыр жерімізді сырт жаулардан қорғау үшін ғасырлар бойы күресіп келді. Талай батыр ұл-қыздарымыз толарсақтан саз кешіп, еркіндікті аңсады. Ұлы даламызды қазіргі ұрпаққа аманат етіп қалдырды. Тәуелсіздігіміз жарияланған күн – Отанымыздың тарихында алтын әріппен жазылып, көкейімізден кетпейтіндей сезімде қалатын күн. Тәуелсіздігімізді ардақтау, оны ерекше атап өтудің жөні бір бөлек. Бодандықтан шығып, бостандыққа жеткен, елдігімізді аңсап, ертеңгі күнге жеткізген 16 желтоқсан – Тәуелсіздік күні ұлық мерекемізге 25 жыл толды.

Қазақстандықтар үшін теңдесі жоқ тарихи күн - Төл Тәуелсіздіктің 25 жылдығы қарсаңында өткен қайырымдылық акциясы негізінде аудан әкімінің орынбасарлары Алмагүл Жанахметқызы Әкімова, Марат Қапарұлы Теміржанов, Ерлан Қабайұлы Қалдыбаевтың басшылығымен ауылдық округ әкімдері және баспасөз өкілдерімен бірге Ұлы Отан соғысы ардагерлерін арнайы барып, Ұлттық мерекемен құттықтап, оларға кәдесыйлар табыстап шықты.

Бүгін ауыл тірлігін тіптен ерте бастап кетті. Күн шығардағы шыңылтырды суықты елемей алма бетінің ұшын аяз сорып қызартса да қыңқ етпей мерекелік күйге еніп қарбаласып кеткен қауымның қағанағы қарқ. Өйткені, бүгін Тұңғыш Президентіміз жалпы Қазақ елінің тумысында тұңғыш рет президент деген сөзді иеленген күні желтоқсан айының бірінші жұлдызы. Қан мен термен келген азаттықтың аясында пайда болған қастерлі күн болатын.