Ұлы Жеңістің 70 жылдық мерейтойы жақындаған сайын ардагерлерге деген сый-құрмет легі арта түсуде. Жер-жерде Ұлы Отан соғысының ардагерлері құрметтеліп, түрлі мерекелік шаралар өткізілуде. Құттықтаулар мен жылы лебіздер, мерейтойлық сыйлықтар толастар емес. Алайда, Отан үшін от кешкен ерлерге қандай сый-құрмет көрсетсек те артық болмас!

Ауданымызда қастерлі де қасиетті мерейтойды лайықты қарсы алуға бағытталған жұмыстар осы негізде жүзеге асырылуда. Әз Наурыз мейрамында үш бірдей соғыс ардагері баспаналы болса, таяуда ғана тыл ардагерлері мерейтойлық медаль тағынды. Бейбіт күн үшін күрескен жеңімпаз жауынгерлер кезекті құрмет белгісін зор мақтаныш, үлкен толқыныспен қарсы алды.

Біздің ардагерлер - Ұлы Отан соғысына қатысушылар Ұлттық Банк арнайы шығарған «Ұлы Жеңіске - 70 жыл» мерейтойлық ескерткіш күміс монеталарды сыйға алды. Монеталар 925/1000 сынамды күмістен, массасы 24 грамм, “proof” сапасымен жасалған. Ел аумағындағы барлық таралымы 7 мың дананы құрайды. Монетаның реверсінде Алматы қаласындағы 28 гвардияшы-панфиловшылар саябағындағы Даңқ мемориалының фрагменті, Ұлы Отан соғысындағы Жеңіс жылын білдіретін «1945» деген жыл атауы мен монетаның соғылған жылын білдіретін «2015» деген жыл атауы орналасқан. Айналдыра мемлекеттік тілде «ҰЛЫ ЖЕҢІСКЕ - 70 ЖЫЛ», орыс тілінде «70 ЛЕТ ВЕЛИКОЙ ПОБЕДЕ» деген жазба бейнеленген және шығыңқы жиек жүргізілген.

Қорғаныс бөлімінің басшысы Ринат                        Абдрахманов, Көкпекті ауылдық округінің әкімі Қайрат Жадрин, Әділет басқармасының басшысы Қанат Ілиясов аудан орталығында тұратын ардагерлердің үйлеріне арнайы барып, мерейтойлық монеталарды табыстады. Жеңімпаз жауынгерлер Бирюков Илья Иванович, Мұстафа Халиуллин, Аркадий Түсіпбеков, Цепков Петр Иванович өздеріне деген құрмет белгісіне аса ризашылықтарын танытып, шын көңілмен алғыстарын жаудырды.

Майдангерлерге естелік монеталарды табыстай отырып, қорғаныс бөлімінің басшысы жүрекжарды тілегін жеткізді. – Біз Сіздердің алдарыңызда төбеміздегі ашық аспан мен бейбітшілік заман үшін мәңгілік қарыздармыз. Сіздердің ерлік жолдарыңыз бен жеңімпаз рухтарыңыз өскелең ұрпақ үшін өшпес өнеге. Ерлік істеріңіз бен қайсарлықтарыңыз бүгінгі отанқорғаушы сарбаздарға үлгі, - деді Ринат Жақанұлы. Бұл – мерейтойлық шаралардың бір бөлігі ғана. Жеңімпаз жауынгерлер ерлігі толассыз мадақталмақ.

Дархан БЕРДІБЕК

Пікір: