Желтоқсанның төрті күні аудандық Оқушылар шығармашылық сарайының мәжіліс залында «Ардагерлер кеңесі» Республикалық қоғамдық бірлестігі Көкпекті аудандық филиалының Пленумы өтті. Пленумның негізгі тақырыбы – Қасымжомарт Кемелұлы Тоқаевтың «Адал адам, адал еңбек, адал табыс» бағдарламасының Көкпекті ауданы ардагерлер ұйымдарында орындалу барысы туралы. Пленумге Көкпекті ауданы әкімінің орынбасары Марат Қапарұлы Теміржанов, БАҚ өкілдері және ауданымыз бойынша 45 Пленум мүшесінің 37-сі қатысты. Пленум аясында аудандық білім саласы ардагерлері кеңесінің «Бір тұтас тәрбие» бағдарламасы бойынша көрмесі қойылды. 

Жиынды алдымен Көкпекті аудандық ардагерлер кеңесінің төрағасы, Көкпекті ауданының құрметті азаматы Мукашев Сләмбек Насырбайұлы баяндамамен бастады. Баяндамада негізгі тақырып қозғалумен қатар аудандық ардагерлер кеңесінің атқарған жұмыстары айтылды. Бұл баяндамадан біз ауданымызда 2108 зейнеткер бар екенін, оның ішінде жалғыз басты қарттардың саны – 104, тыл еңбеккерлері және оған теңелгендер саны – 43, ҚР Қарулы күштерінің ардагері – 2, саяси қуғын-сүргін құрбандары – 17, 1 топ мүгедектері – 4, 2 топ мүгедектері – 17, 3 топ мүгедектері – 5 адам екенін білдік. Ардагерлер ұйымы 2024 жылдың 10 айында 163 іс-шара өткізген. Сонымен қатар Ардагерлер кеңесінің ұйымдастыруымен аудан бойынша зейнеткерлерге кең көлемде материалдық қайырымдылық көмектер көрсетілді.

Сләмбек Насырбайұлынан кейін мінберге тарихшы-өлкетанушы Малгаждаров Қайрат Қапайұлы көтеріліп, Қасымжомарт Кемелұлы Тоқаевтың «Адал адам, адал еңбек, адал табыс» бағдарламасы жайлы сөз қозғады.
Үшінші баяндаманы Көкпекті ауданының педагог-ардагерлер кеңесінің төрайымы Тыныбаева Шарипа Саруарқызы оқыды. Шарипа Саруарқызының айтуы бойынша, Көкпекті ауданы бойынша былтыр -219 ардагер ұстаз тіркелген, ал 2023-2024 оқу жылында - 266 ардагер (15 педагог зейнетке шықты, жабылған мектептерден - 32 ардагер ұстаз қосылды). Білім министрі Ғани Бейсенбаевтың алғыс хатымен былтырғы жылы 24 ардагер марапаталды, осы жылы - 36, барлығы 60 адам болды. 80-нен асқан, 90 жастағы педагог ардагерлер елеусіз қалған жоқ. Жалпы Көкпекті ауданында қай салада болмасын ардагерлер мен зейнеткерлердің үлкен белсенділік көрсететіні қуантады. Шарипа Саруарқызы сондай-ақ аудан әкімінің орынбасары Марат Қапарұлына биылғы жылы аудандағы қатары мол ардагердің ішінен екі-ақ адам курорт жолдамасына қол жеткізгенін айтып, келесі жылы барынша мол зейнеткердің аудан көмегі арқылы демалыс және сауықтыру курорттарына жолдама алғандары дұрыс болар еді деген өтінішін білдірді.
Жиын қорытындысы Көкпекті аудандық ардагерлер кеңесінің қаулысымен аяқталды. Қаулы бойынша Сләмбек Насырбайұлы оқыған баяндамадағы ақпараттың назарға алынуы, Көкпекті ауданы бойынша білім бөлімінде, әр саладағы ардагерлер ұйымдарында Қасымжомарт Кемелұлы Тоқаевтың «Адал адам, адал еңбек, адал табыс» бағдарламасының негізінде ұлттық құндылықтардың насихатталуын қадағалау, ұлттық мүдде, ар талабы бағытының ескерілуі, нашақорлық пен ойынқұмарлыққа қарсы тәрбие жұмыстарының жасалуы, жастар мен оқушыларды зиянды әдеттерден аулақ болуға шақыру, ұрпақ тәрбиесі мәселелері, ауылдық округтерде тұратын тыл еңбеккерлерінің құқығын қорғау және т.б. мәселелер басты назарда болатыны айтылды.

Пікір: