Әрбір адамның асыл да бағалы қазынасы – денсаулық. Спорт-денсаулық кепілі деп бекер айтылмаса керек. 20 қаңтар күні Көкпекті орта мектебінде ұстаздар бірлестіктерінің арасында Астана қаласының 20 жылдығына арналған көңілді старт өтті.
Сайысқа 6 команда қатысты. Олар: «Улыбка», «Ну, погоди 13 класс», «Қыран», «Жұлдыз», «Бодрячки», «Ну, погоди». Ойынның бағдарламасы өте қызықты құрылған. Мұғалімдер доппен, арқанмен, обручпен жүгіру сияқты әртүрлі қызықты сайыстарда өз мүмкіндіктерін көрсетті. Сайыстың әрбір бөлімі қызығушылық пен сайыскерлер арасындағы жеңіс үшін ұмтылысқа толы болды. Сайыс көрермендері мен жанкүйерлері тарапынан асқан белсенділік сезілді.

Спорттық мереке барлық мектеп ұжымына көтеріңкі көңіл күй сыйлаумен қатар, жеңісті команданы анықтауға деген қызығушылықтарын оята түсті.
Ауданымыздың беделді азаматтары Е.Нияз-баев, С.Мұқашев, Б.Мүрсәлімова қазылық еткен әділқазылар алқасының шешімі бойынша Бас жүлде «Улыбка» командасына, 1-орын «Жұлдыз», 2-орын «Ну, погоди 13 класс», 3-орын «Ну, погоди!» командаларының еншісіне бұйырды. Сонымен қатар, сайыс барысында ерекше алғырлығымен, жеңіске деген жоғары ұмтылысымен көзге түскен мұғалімдер де жеке марапатталды. Барлық командалар мен жеке қатысушылар бағалы сыйлықтармен марапатталды.
Сайыс соңында мектеп директоры А.Таныспаев барлық сайыскерлерді құттықтап, қатысушыларды салауатты өмір салтын сақтануға, спортпен шұғылдануға шақырды.
«Дені саудың – жаны сау», - дегендей, спортпен шұғылданайық, ағайын!

Ә.Таныспаева,
аға тәлімгер, Көкпекті орта мектебі

Пікір: