Өткен айда Тәуелсіздіктің 25 жылдығын мерекелеуге байланысты Павлодар қаласында М-1 спорты бойынша Қазақстан Республикасының кубогі өтті. Республикалық спорт додасында Шығыс Қазақстан облысы атынан Көкпекті ауданының командалары қатысып, қанжы-ғалары майланып қайтты. Аталмыш команданың құрамында Көкпекті, А.Пушкин және Новотимофеевка орта мектебінің жас спортшылары бар.
Керекуде өткен тартысты жарыста бойындағы бар күш-қайратын, батылдығы мен жоғарғы даярлығын көрсеткен жас ұландар аудан намысын қолдан бермей, жүлделі орындарға ие болып оралды. Атап айтатын болсақ, Көкпекті мектебінің спортшылары Е.Ермеков І-орын, Р.Айдаров, Т.Жұманов, И.Аманжолов ІІ-орындар алды. Бұл жеңімпаздарды жаттықтырып, жеке басының өнегесімен, ақыл-кеңесімен бабына келтіріп, бәйгеге қосқан жас ұстаз Руслан Жүнісовке ата-аналар дән риза. Ал, ІІ-орын алған А.С.Пушкин атындағы орта мектептің жас батыры М.Тұрсынов тың жаттықтырушысы Т.Тоқтасыновқа және Новотимофеевка орта мектебінің жаттықтырушысы Т.Қалиевке аудан спортын дамытуға қосып жүрген қомақты үлестері үшін аудандық білім беру және спорт бөлімі тарапынан үлкен алғыс айтқымыз келеді.

Жас батырлардың жаттықтырушылары бал-ғындардың ата-аналарына да өз кезегінде ал-ғыс білдіреді. Өйткені, олар жас ұрпақты салауатты өмір салтына баулып, патриоттық рухта тәрбиелеу ісінде белсенділік танытып, қаржылай демеушілік көрсетіп отыр. Мүмкін, келешекте бүгінгі жеңімпаздарымыз аудан, облыс намысын ғана емес Қазақ Елінің Туын аспандататын спорт саңлақтары болар.
Құрметті аудан спортының қоржынына өз ұпайларын қосып жүрген балғындар! Жеңісті күндерің көп болсын!

Бақыт МҮЛІКОВА

Пікір: