Дәстүрлі садақ ату спорты Көкпекті ауданында қарқынды даму жолына түсті. Басты ұйытқы Көкпекті аудандық Ұлттық спорт ойындары орталығы. 21 мамыр күні Көкпектіде облыстық ашық жарыс өтті. Игілікті дәстүр 26 мамыры күні Егінбұлақ ауылында өткен аудандық жарысқа ұласты.

Егінбұлақ ауылында өткен аудандық жарысқа барлығы 34 мерген қатысты. Жарыстың бас демеушісі Егінбұлақ ауылының тумасы, белгілі кәсіпкер Дамир Геккель. Жүлде қорына қомақты қаражат қойылған сайысқа Көкпекті ауданының Шұғылбай, Ақой, Ажа, Тассай, Үлкенбөкен, Көкпекті, Биғаш және Егінбұлақ ауылының садақшылары қатысты.

Шалғайдағы ауыл халқына тамаша көңіл-күй мен тың серпіліс сыйлаған жарыстың қорытындысы бойынша Көкпекті аудандық Ұлттық спорт ойындары орталығының маманы Елдос Төкенов жеңіске жетті. Жүлделі 2 орынды Жақия Шайжүнісов атындағы орта мектеп ұстазы Нұрбек Құнанбаев иеленді. 3 орынды Арнұр Маутқанов олжалады.
- «Бүгін туған ауылымыз Егінбұлақта ұлан-асыр той болып жатыр. Аядай ғана ауылда дүниеге келіп, кіндігіміз кесілді. Заманында тіршілігі қайнап жатқан ауылда балдәурен балалық шағымыз өтті. Қазіргі уақытта Алматы қаласында тұрамын. Жол құрылысымен айналысатын «DDM Group» ЖШС құрдым. Шалғайда жүрсек те туған жер бізге қашан да ыстық. Ауылда әкем мен шешем, бауырларым, туысқандар тұрады. Қазір аз ғана тұрғыны қалған ауылдың әрбір адамы жақынымдай. Жыл сайын ауылда халықтың көңіл-күйін көтеру мақсатында ұлттық спорт ойындарын өткіземіз. Биылғы жылы командалық көкпар мен дәстүрлі садақ ату жарысын жасадық. Бұл игілікті дәстүр жыл сайын жалғаса бермек,» - дейді Дамир Викторұлы.
Барлық жеңімпаздар мен жүлдегерлер қаржылай сыйлық, жеңімпаз медалі және мадақтама қағазымен марапатталды. Аудан садақшылары маусым айында Семей қаласында өтетін облыс чемпионатына дайындық жаттығуларын бастады.

Пікір: