Қазақстан Республикасы Парламенті Сенатының депутаты Тастекеев Қайрат Құлбайұлы 3 шілде күні Көкпекті ауданының тұрғындарымен кездесу өткізді. Аудандық әкімдіктің мәжіліс залында өткен кездесуге аудандық мәслихат төрағасы Талғат Сарманов, аудан әкімінің орынбасарлары, аудандық мәслихат депутаттары, құқық қорғау органдарының өкілдері, ардагерлер, мемлекеттік қызметкерлер, бұқаралық ақпарат құралдары өкілдері және тұрғындар қатысты.

Кездесу барысында Қайрат Тастекеев жиынға қатысушыларға Парламент Сенатында атқарылып жатқан жұмыстармен таныстырып, жаңадан қабылданған заң жобалары мен өзгерістерге тоқталды. Атап айтқанда, «Мемлекеттік сатып алулар туралы» заңға өзгерістер енгізу қарастырылып жатқанын жеткізді. Көкпекті аудандық мәслихат депутаты Дархан Дүйсембаев мемлекеттік сатып алу туралы заңға өзгеріс енгізу барысында мердігер ұйымдар конкурс кезінде жобаны жүзеге асыруға бөлінген қаражат бағасын төмендетудің шекті пайызын міндеттеу қажеттігі туралы ұсыныс енгізді. Сондай-ақ Көкпекті ауданына қатысты бірқатар өзекті мәселелер Сенат депутатына жеткізілді. Мәслихат депутаты Асыл Төлешова халықаралық «Омск-Майқапшағай» автокөлік жолының Қалтабау-Көкпекті арасындағы бөлігін жөндеу жұмыстарын тездетуге ықпал ету туралы халықтың мұң-мұқтажын айтты. Сонымен бірге Асыл Советбекқызы азық-түлік бағасының қымбаттауына байланысты мониторнг топтарының құзыреттілігін арттыру қажеттігін ортаға салды.
Елжанды азамат, белгілі заңгер Қайдар Асқарұлы сенаторға мемлекеттік тіл мәртебесі туралы ойын ашық айтты. Сондай-ақ жергілікті жерлердегі жер комиссияларының жұмысын жетілдіру керек деген ұсынысын жеткізді. Аудандық аурухана бас дәрігерінің міндетін атқарушы Махат Габдуллин халық қалаулысына аурухананы күрделі жөндеуден өткізу үшін бюджеттен қаражат бөлінуіне ықпал ету туралы өтінішін білдірді.
- Абай облысынан сайланған Сенат депутаты болған соң бүгінгі күні Көкпекті ауданының халқымен кездесуге арнайы келіп отырмын. Таяуда Сенат қабырғасында «Шет елдерге заңсыз шығарылған активтерді елге қайтару туралы» заң жобасын қабылдадық. Жемқорлардың 30 жыл бойы жеген ақшалары, зауыттары мен фабрикалары елге қайтарылатын болады. Ол қаражат үй және жол салуға, халықтың әлеуметтік жағдайын түзетуге жұмсалатын болады. Қазіргі кезде депутаттардың барлығы ашық сөйлейді, ашық айтады, тиісті жұмыстар жүргізіліп жатыр. Барлық сұрақтар мен ұсыныстарды жазып алдым. Аурухана мәселесі халық үшін өте өзекті. Дәрігерлердің жұмыс істейтін орны таза, жылы, кез келген уақытта ем алушыларға қажетті көмек беруге қажетті құрал-жабдықтармен қамтылған болуы керек деп ойлаймын. Мемлекеттік тіл мәртебесін көтеру үшін әрбір азамат өзінен және отбасынан бастау керек, - деді сенатор Қайрат Тастекеев.
Жиын соңында аудан әкімінің орынбасары Дәурен Қойгелдин Сенат депутатына көкпектіліктердің атынан алғыс айтып, жұмысына жеміс тіледі.

Пікір: