Көкпекті ауылының орталығы биылғы жылы көз алдымызда келбеттене түсуде. «Жәрдем» және «Дильназ» дүкендерінің алдындағы алаңда автотұрақ құрылысын жасау жұмыстары тез арада жүргізіліп, пайдалануға берілді. Бұл игі істі мықты техникалардың күшімен сапалы әрі жылдам орындаған «Көкпекті жолдары» ЖШС-ның басшысы Г.Нұрғалиеваға және ұжым жұмысшыларына Көкпекті ауданының автокөлік жүргізушілері дән риза.

Көкпекті ауылын абаттандыру жұмыстары тек мұнымен шектелген жоқ. «ДЭУ-29» ЖШС басшысы Гулрайхан Мухамадиева Төлебаев көшесі бойын зират маңына дейінгі жолды грейдерлеу, тегістеу жұмыстарын жүргізді.
Сондай-ақ, Көкпекті ауылдық округіне қарасты Шәріптоғай ауылының екі көшесінде «Көкпекті жолдары» ЖШС-нің басшысы Гүлназ Нұрғалиева өз қаражатымен жолды тегістеп, құмтас төсеу жұмыстарын жүргізді. Ал, бизнестің әлеуметтік жауапкершілігін басты ұстанымына айналдырған Көкпекті аудандық мәсли-хатының депутаты, кәсіпкер А.Бойков аталмыш ауылдағы өзен арнасын қалпына келтіру жұмыстарын жүргізуге көмегін тигізді.
Туған ауылдың көркіне көрік қосу, келбетін ажарландыру жұмыстарының барлығы, халық игілігі үшін атқарылуда. Сондықтан, «Ауылым – алтын бесігім» деп жар құлағы жастыққа тимей, патриоттық рухты үлгі етіп жүрген іскер азаматтарға қолға алған істеріңізде биік табыс-тар мен берекеге жетіңіздер дейміз.

Пікір: