Материалдар

Ағымдағы айдың 24 жұлдызында ауданымызда дауларды сотқа дейін реттеуді енгізу және бітімгершілік процедурасының жан-жақты дамуы саласындағы өзара ынтымақтастық туралы меморандумға қол қойылды.
Рәсімге Көкпекті аудандық сот төрағасы, №2 аудандық сот төрағасы, аудандық әкімшілік, Қоғамдық келісім орталығы, Көкпекті аудандық Әділет басқармасы, аудандық ішкі істер бөлімі, «Білім беру, дене шынықтыру және спорт бөлімі» ММ, мемлекеттік кіріс басқармасы, «Нұр Отан» партиясы Көкпекті аудандық филиалы, аудандық кәсіпкерлер палатасы филиалы, «Қазақтелеком» АҚ өкілдері және Көкпекті ауданының заңгері Қ.Шайзадинов қатысты.

Жалпы негізбен алып қарағанда, қазақ халқы үшін бітімгершілік қағида ретінде қалыптасқан. Ол заң қазақ халқының дәстүрлі билер мен ата – бабалар тағылымын, әдет-ғұрпын, тәрбиесін қалпына келтіру мақсатында жасалған ірі қадамдардың бірі және бірегейі. Үлкен даудың бетін қайтарып, жанжалдасқан екі жақты құда етіп қоятын қазақтың даналығына не жетсін?! Ұрыс, даудан іргесін аулақ салып, ал, ел арасы мен ағайын ішінен іріткі шықса, істі ушықтырмай ауыл ақсақалының, ел ағасының алдына барып шешетін халықпыз. Айналып келгенде медиация халқымыздың қанында бар, салт-дәстүріне жат емес.
«Медиация - тараптардың ерікті келісі бойынша жүзеге асырылатын, олардың мүдделерін қорғай отырып қолайлы шешімге қол жеткізу мақсатында медиатордың көмегімен тараптар арасындағы дау жанжалды реттеу тәсілін рәсімдеу, яғни - үшінші бейтарап көзқарасты ұстанатын адамның қатысуымен дау-жанжалды шешудің баламалы әдісі. Бұл ұғымның басты мақсаты – екі жақты да қанағаттандыратын шешім шығаруға қол жеткізу. Осы мақсат-міндеттерін қолдана алсақ, біраз мәселені оңтайлы шешуге зор мүмкіндік болар еді», - деді аудандық сот төрағасы Әділ Бақытбекұлы.
Бір айта кетерлігі, медиаторлар даулар мен жанжалдарды шешудің балама тәсілдерін қолдану саласында өзара қолдау көрсететін болады. Бүгінде ауданымыздың барлық ауылдық округтерінің әкімшілік ғимаратында медиаторлар кабинеті ашылып, кәсіби емес медиаторлар жұмыстарын атқарып жүр. Комиссия мүшелері сөз сөйлегеннен кейін аталған меморандумға қол қою рәсімі өтті.

Жансая СМАҒҰЛОВА

Пікір: