Аудан әкімі Асхат Сайдахметұлы мәдениет үйінде жол саласының ардагері Гүлдарай Закариянқызы Мұхамадиеваны 60 жасқа толған мерейтойымен құттықтап, алғыс хаты мен естелік сыйлығын табыс етті. Жалпақ жұртқа сыйлы мерейтой иесі өз еңбек жолын қатардағы қарапайым жұмысшыдан бастап, жол маманы, мекеме басшысы болып, жауапты қызметтерді абыроймен атқаруда.

- Әрдайым арамызда ақылшы ұстаз, ардақты ардагер, абыройлы азаматшамыз болып аман-есен жүре беріңіз. Сіздің еңбегіңіз жас ұрпаққа үлгі боларлық. Бар ғұмырыңызды осы салаға арнаған жұмыстың қыр сырын меңгерген білікті маман бола жүріп, басшылық қызметіңізді абыройлы атқарып келесіз. Сізге ұзақ ғұмыр, мықты денсаулық, отбасыңызға амандық тілеймін, - деді аудан басшысы.
Сонымен қатар, кездесуде «Қазақавтожол» ЖШС-нің бас директоры Ұлан Әліповтың атынан өндірістің басқарма басшысы Бақытжан Елеу-месов құттықтап, жылы лебізі мен алғыс хатын табыстады. Гүлдарай Закриянқызы табысты басшылық етіп отырған Жол пайдалану учаскесі – 29 мекемесі республикалық маңыздағы жолдарда қызмет атқарады. Аталмыш учаскеге Жарма ауданына қарасты Кеңтарлау ауылынан бас-тап Боғас бекетіне дейінгі 162 шақырым республикалық маңыздағы жол жатады. Мерейтой иесі Гүлдарай Закариянқызы осы салада 1979 жылдан бастап табанды қызмет атқарып келеді. Ұжымның алдында беделді, елге абыройлы жерлесіміздің мерейтойы – аудан үшін айтулы оқиға. Қыста қарлы боранмен алысып, жолда қалған жолаушыға жәрдем бере жүріп қауырт жұмыс істейтін ұжым жаз уақытында да қол қусырып отырмайды. Күн жылынып, көктем келе жолды қалыпқа келтіру бағытындағы тынымсыз еңбек басталады. Білікті басшысымен елге үлгі болып отырған еңбекқор ұжымға тек қана жеміс тілейміз!

Пікір: