Еліміздің болашағын баянды етіп сақтаудың кілті — рухани жаңғыруда екені анық. Кітапты жанымызға серік ету арқылы осы көздеген межемізге адаспай тауып жете аламыз. 14 ақпан – халықаралық кітап сыйлау күні. Мейрам 2012 жылдан бері тойланса, ауданымызда жыл өткен сайын кең ауқымда аталып өтіп жатыр. 

Халықаралық кітап сыйлау күніне орай Көкпекті орта мектебі «Шын жүректен кітап сыйлайық» атты арнайы акция ұйымдастырды. Іс-шараға аудан әкімі Әділет Нұрсағатұлы, аудандық білім бөлімінің басшысы Аслан Балабекұлы, ішкі саясат бөлімінің басшысы Азат Қайратұлы қатысты. Басты мақсат оқырмандарды кітап оқуға деген сүйіспеншілігін арттырып, кітап қорын көркем әдебиетпен толықтыру болып табылады. Аудан әкімі акцияға атсалысып, білім ордасына өз атынан кітап тарту етті.

Сонымен қатар жақында 85 жастағы жалғызбасты Арабеж Фелисада апамыздың үйінің ауласын қардан тазалау кезінде апамыздың ес-түссіз жатқанын байқап, жедел жәрдем шақырып, оның өмірін сақтап қалған «Жас Сарбаз» сыныбының оқушылары Расул Бақтыбеков, Ертай Айыпқазы, Ерасыл Дәуітхан және олардың офицер-тәрбиешісі Талғат Тоқтарұлы Кюбаевты арнайы марапаттады.
- Оқушылар мен олардың тәрбиешісінің бұл ісі қайырымды және ерлікке пара-пар әрекет. Осындай жанашыр, батыл жастарымыздың бары қуантады! Бұл – нағыз тәрбиенің, адамгершіліктің, елге деген жанашырлықтың көрінісі,- деді аудан әкімі Әділет Қожанбаев өз сөзінде.

Пікір: