Ақпанның 12-сі күні аудан әкімі Әділет Қожанбаев бастаған дербес бөлім басшылары Семей қаласына барып, Шәкәрім атындағы университеттің бітіруші түлектерімен кездесу өткізді. Бұл кездесудің басты мақсаты – жастарды ауданымыздың жетістіктерімен таныстырып, оларды өңірімізге жұмысқа шақыру болды. Кездесу барысында аудан басшысы түлектерге ауданымыздағы білім беру, денсаулық сақтау, мемлекеттік қызмет және ауыл шаруашылығы салаларындағы бос жұмыс орындары туралы толық ақпарат беріп, жас мамандар үшін жасалып жатқан мемлекеттік қолдау шаралары туралы айтып берді. Сонымен қатар “Дипломмен ауылға” бағдарламасының мүмкіндіктерін және аудан кәсіпкерлері бастамасымен құрылған арнайы қордан білікті мамандарға қаржылай қолдау көрсетілетінін жеткізді.

Кездесуден бұрын университет қабырғасында ауданымыздан келген сала мамандарының қатысуымен бос жұмыс орындар жәрмеңкесі ұйымдастырылған еді. Бұл шара түлектердің болашақ жұмыс орындарымен танысып, қажетті ақпарат алуына үлкен мүмкіндік берді. «Ауданымызға келіп, қызмет етуге ниетті әрбір жас маманға қолдау көрсетуге әрқашан дайынбыз!»- деді Әділет Нұрсағатұлы жиылған студент жастарға.
Келесі кезекте Көкпекті ауданынан барған делегация Алаштың тұңғыш білім ордасы – Мұхтар Әуезов атындағы педагогикалық колледждің “Ес-Аймақ” рухани орталығына ат басын бұрып, Семей қаласында білім алып жатқан ауданымыздың студенттерімен кездесті. Кездесу барысында Әділет Нұрсағатұлы студенттерге ауданымыздағы білім беру, денсаулық сақтау, мемлекеттік қызмет және ауыл шаруашылығы салаларындағы бос жұмыс орындары туралы ақпарат беріп, Көкпекті ауданының озық тұстары туралы сөз сөйлеп, туған өңірге келіп, қызмет етуге шақырды. Сондай-ақ студенттердің көкейінде жүрген сұрақтарын тыңдап, ауданымыздан барған топ оларға толыққанды жауап берді.
Ауданымыздың басшысы Семей қаласына іс-сапар барысында ауданымыздың студенттерімен кездесуді бастамас бұрын, Алаштың тұңғыш білім ордасы – Мұхтар Әуезов атындағы педагогикалық колледждің директоры Шағангүл Алдамжарқызымен кездесті. Шағангүл Алдамжарқызы 122 жылдық тарихы бар бұл оқу орнының өткенінен сыр шертіп, бүгінгі жетістіктері мен атқарылып жатқан жұмыстары туралы кеңінен баяндады. Әділет Нұрсағатұлы оқу орнын осындай жоғары деңгейде ұстап, оның дамуына сүбелі үлес қосып отырған Шағангүл Алдамжарқызының еңбегін ерекше атап өтті.

Фархат Маратұлы

Пікір: