Биыл Семей қаласының Шәкәрім атындағы университетіне 90 жыл толып отыр. Мереке аясында бірқатар іс-шаралар ұйымдастыру жоспарланған. Осы орайда, облыс әкімі Нұрлан Ұранхаев «Білімді жастар – өңірдің әлеуметтік-экономикалық дамуының басты қозғаушы күші» тақырыбында дәріс өткізіп, жастарға өз тәжірибесімен бөлісіп, болашаққа деген көзқарасын білдірді.
Дәріс барысында облыс әкімі IT саласы мен жасанды интеллектті дамыту жоспарына тоқталды. Ол креативті индустрияның және жастардың ғылыми зерттеулері мен стартаптарын қолдаудың маңыздылығын атап өтті.
«Жаңадан құрылған Абай облысының дамуы – өздеріңіздей мамандар қолында. Кез келген қоғам үшін сапалы маман әрқашан бағалы. Сондықтан, осында отырған әр маман, Семейді, Абай елін көркейтуге күш салады деп сенемін», - деп қосты Нұрлан Ұранхаев.

Студенттер өз кезегінде жастар бағдарламасы, ғылым, ақпараттық технологиялар, креативті индустрия және т.б. салаларға қатысты сауалдарын қойды. Айта кетсек, жиналғандар үшін ғылыми көрме ұйымдастырылды.
Бұл көрмеде біздің ауданымыздан шыққан Көкпекті орта мектебінің түлегі Исатай Айпқазы қатысты. Исатай Қайратұлы бүгінде Семей қаласының Шәкәрім атындағы университетінде биотехнология мамандығы бойынша білім алуда. Ол ғылыми көрмеде гидропоника арқылы өсімдіктерді өсіруге арналған қондырғы туралы жұмысын ұсынып, таныстырды.
Көкпекті жерінен шыққан талапты жастардың облыс көлемінде еңбегі көрмеге қойылып, бағаланып жатқаны біздер үшін үлкен мақтаныш. Мемлекет тірегі Исатай сынды білімді, дарынды жастар екенін айта келе, жас жеткіншектердің сапалы білім алып, саналы азамат атанып, ел үшін адал еңбек ететіндеріне сенім мол.

Пікір: