Көкпар – қазақтың ұлттық ат спорты ойындарының бірі және бірегейі. Бұл ойын түрінің теңдессіз екендігін әлем халқы мойындап отыр. «Көкпар» ойыны жігіттердің күш-жігерін, төзімділігін, батылдығы мен ептілігін, ат үстінде мығым отыруын қалыптастырады.
Өткен аптада ауданымызға таны-мал атымтай жомарт жан «Рустам» ШҚ басшысы Қайрат Дюсембаевтың ұйымдастыруымен жау-жүрек бабаларымыздан қалған асыл мұраның бірі – көкпар ойыны өтті. «Көкпар» Қайрат ағамыздың ұлының сүндет тойы құрметіне берілді.

Ер жігіттің ат құлағында ойнайтын шеберлігі, ептілігі мен күш-қайраты сыналатын осынау ұлттық ойын түріне Ұлан ауданы, Көкжайық, Үлгілімалшы, Көкжота ауылдарынан көкпаршылар қатысты. Көкпарға қатысқан көкпаршылар салымдарын алды. Сондай-ақ, аударыспақ ойыны да ойнатылып, жеңімпаздар марапатталды. Көкпар соңында Ақой ауылындағы тойханада арнайы дастархан жайылды.
Қазақ қыраннан қырағылықты, тұлпардан тектілікті бойына сіңірген халық. Ендеше, ендігі парыз – ұлттық ойынымызды келешек ұрпаққа аманат ету.

Ерлан Әзімбаев, «Көкжайық жастары»
ұйымының мүшесі

Пікір: