Отанымыздың өсіп-өркендеуіне, еліміздің бейбітшілікте тыныш өмір кешуіне ардақты да аяу-лы қарттарымыздың қосқан үлесі зор. Қарттар күні - саналы ғұмырларын Отан деп, тынымсыз еңбектерімен мемлекетіміздің негізін салуға жол ашқан алдыңғы буын аға-апаларымыздың төл мерекесі деп білеміз. Олардың өмір жолдары бүгінгі ұрпаққа теңдессіз үлгі-өнеге. Қарттар – біздің асыл қазынамыз. Үлгілімалшы селолық округінде 1 қазан мен 1 қараша аралығында қайырымдылық айлығын өткізу бойынша жоспар құрылып, соған сәйкес жұмыстар басталып кетті.

Үлгілімалшы селолық округінде 1 қазан – Халықаралық қарттар күніне орай «Қарттар - тарих, қазына, ел қазығы» тақырыбында мерекелік іс-шара өтті. «Бекзат» шаруа қожалығының басшысы Б.Бақатбаевтың демеушілігімен округке қарасты 4 елдімекеннің үлкендеріне арналып ақ дастарқан жайылып, құттықтау тілектер арналды. Шара барысында құрметті қонақтарға арналып ән мен биден шашу шашылды. Мерекеге жиналған қазыналы қарттарымыз бірін бірі көріп, ел амандығын сұрасып, мәре-сәре болды.
Округ әкімі Мерей Нығметжанұлы ақ дас-тарқанға жиналған асыл қарттарымызға құттықтау лебізін арнап, жылы көңілін білдірді. Сонымен қоса, ауыл әкімі көп балалы ана К.Үзікбаеваның үйіне арнайы кіріп, сый-сияпат ұсынды, құрмет көрсетті.
«Ақылды қария – ағып жатқан дария» деп тегін айтпаса керек. Имандылық, ұрпақ тәрбиесі, ауылдың береке-бірлігі тілге тиек етілген, баталы тілектер айтылған, әсем ән шырқалып, көңілді би орындалған өнегесі мол, маңызы зор мерекелік басқосу осылай өз бастауын алды..
Асыл қарттарымыз – ұлы бәйтерек болса, біз соның бүршігіміз. Ауызы дуалы, сөзі берекелі, ісі тыңғылықты, ойы терең, ақылы телегей теңіз аталарымыз бен апаларымыздың мейрамы құтты болсын!

М.Мұратқанқызы, клуб меңгерушісі

Пікір: