Жақында «Елім-ай» ЖШС-де Ұлттық кәсіпкерлер палатасының бастамасымен «Сиыр етін өндіру технологиясы және ірі қара мал бордақылауды қарқынды ұйымдастыру» тақырыбында семинар болып өтті. Ауыл шаруашылығы мамандары аталмыш жиыннан қандай артықшылықтар алғанын Кәсіпкерлер палатасының аудандық филиалы директоры Әлия Мұқашева айтып берді.
- Аталмыш семинар 2 күн бойы өткізілді. 30 шаруа қожалығының өкілдері арнайы сертификатқа ие болды. Шаруашылық иелеріне дәріс беру үшін Астана қаласынан арнайы Жангелді Жарқымбаев келіп, аталған саладағы жаңа технологияларды жүзеге асыру бойынша шеберлік сыныбын өткізді. Тыңдаушыларды қызықтырған барлық сұрақтарға жауап беріп, түсіндіру жұмыстарын жүргізді. Осы тұста жиын өтетін орынды ұсынған «Елім-ай» ЖШС-нің семинарға ерекше дайындығын атап өткім келеді.

Кәсіпкерлер палатасының ұйымдастыруымен өтетін мұндай семинарлардың еліміздің барлық өңірлерін қамтып өткізіліп жатқалы бірнеше жыл болды. Әр жиынның тақырыбы ауыл шаруашылығының нақты саласына арналады. Мәселен, былтырғы жылғы семинарда өсімдік шаруашылығы талқыланған болатын.
Әлия Орынбекқызының аудандық филиал ауыл шаруашылығын дамыту және кәсіпкерлік салаларында біліктілігін арттырғысы келетін әр адамға қолдау танытуға дайын екенін айтады. Таяуда «Аға сеньорлар» жобасын іске асыру жұмыстары басталады. Аталмыш бағдарлама аясында шаруашылық басшылары біліктіліктерін Канада, АҚШ және Германия сияқты елдерде көтеру мүмкіндігіне ие бола алады.

Жансая СМАҒҰЛОВА

Пікір: