Жеке басына туындаған мәселелері бойынша кірер есігі қалмай, тауы шағылған адам енді қайда барамын деп ойланады. Біреулері қолын бір сілтеп, жылы жауып қойса, бірі ең соңғы үмітім деп, аудан әкімінің алдына баруды жөн санайды. Қазіргі күні аудан әкімінің қабылдауына кіру аса қиын шаруа емес.
2016 жылдың 12 шілдесінде аудан әкімі Р.Н.Сағандықов Самар ауылында азаматтарды жеке шаруаларымен қабылдады. Ауыл тұрғындарының қойған сауалдарының басым көпшілігі тұрғын үймен қамтамасыз ету, мүгедек балалар мен тұрмысы төмен отбасыларына материалдық көмек сұрау болып келеді.

Қабылдау барысында Самар ауылының аэропорт аумағының тұрғындары мал жайылымының жетіспеушілігі, мал жаю ақысының қымбаттығы мен табында бұқаның жоқтығы, бақташылардың мал иелерімен шарт жасаспайтыны, малға жауапкершіліктің жоқтығы сияқты бірқатар мәселелер айтылды. Ауыл азаматтарының са-уалдарын тыңдаған аудан басшысы сұрақ негізінен ауылдық округ әкімшілігі құзырында шешілуі тиіс деп атап өтті.
Самар ауылының тұрғыны зейнеткер М.Қойшыбаев ауданаралық аурухананың қызметкерлеріне шағымданды. Оның айтуынша, медицина қызметкерлері кепілдендірілген тегін медициналық көмек көрсету аясында оған облыстық ауруханаға тиісті дәрігерге жолдама бермеген. Ақыры өзі коммерциялық дәрігерге көрініп, ота жасатып, аман қалыпты.
Аудан басшысының ауылдық кездесуі ашық әңгіме түрінде өтті. Азаматтардың барлық сауалдары мен арыз-тілектеріне тиісінше жауаптар қайтарылып, оның бірқатары аудан әкімінің бақылауына алынды.

Қанат АПСАДЫҚОВА

Пікір: