Өткен аптада Көкпекті ауылының "Елім-ай" мейрамханасында ауданның бетке ұстар шаруа қожалық басшылары мен кәсіпкерлері бас қосты. Оларды шақырған ауданымыздың әкімі Әділет Қожанбаев Көкпекті ауданының аграрлық саланы дамытқан, ауыл шаруашылығына маманданған өңір екенін тілге тиек етті. Ол шаруа қожалық басшылары арасында әлеуметтік жауапкершілікті сезінетін жаны жомарт жандар көп екенін айтты.
Кездесу барысында аудан әкімі ауданымыздың әлеуметтік-экономикалық көрсеткіштері мен даму жоспарларын талқылап, кәсіпкерлермен өзекті мәселелер бойынша пікір алмасты. «Еліміздің Президенті Қасым-Жомарт Кемелұлы былтыр ауылшаруашылық қызметкерлері форумында әр азамат өзінің аймағын, туған өлкесін дамытуға үлес қосуы керек екенін айтқан, - деп бастады сөзін Әділет Нұрсағатұлы:

– Көкпекті ауданында ауылшаруашылығы мақсатындағы жердің жалпы көлемі 557 663 гектар, оның ішінде жайылым – 390 199 га, егістік жер – 124 389 га, шабындық – 43 045 га. Ауданымыздың 2024 жылғы кірісі 1,4 млрд теңге шамасында болса, ауылшаруашылық саласының үлесі 6,6 пайыз яғни, 90 млн теңге шамасында. Салыс-тырмалы түрде алатын болсақ, бір аудандық ауруханамыздың өзі 2024 жылы 96 млн теңге салық түсірген. Әрине, шаруа қожалықтары басшылары арасында ауданға қамқорлықпен қарайтын, әлеуметтік жауапкершілікті сезінетін азаматтар көп. Мысалы, Дидар Тукушев балуанымыз қазақ күресінен Көшпенділер ойындарының алтынын алып, ауданымыздың абыройын асқақтатқанда «Елім-ай» ШҚ басшысы Болат Миғражұлы мен Жәлел Қажымұқанұлы қосылып жаңа автокөлік сыйға тартты. Ол қазақ күресімен айналысып жүрген жас балуандардың барлығына қосымша мотивация беретін қадам. Ауданымызда бюджеттен тыс қалған әлеуметтік және қоғамдық проб-лемалар өте көп. Мысалы, кейбір тұрғындардың үйлері өртенсе, күтпеген оқыс жағдайлар орын алса әкімшілік қауқарсыз болып қалуы мүмкін. Мәдениет пен спорт саласы да қамқорлықты қажет етеді. Көкпекті ауданының имиджін көтеретін мәдени-спорттық іс-шаралар өткізу қажет. Сондықтан құрметті кәсіпкерлер, құрметті қожалық басшылары баршаларыңызды ауданымыздың игілігіне жұмыс істейтін ортақ қор құруға шақырамын», - деп жиналғандарға үлкен ой тастады.
Шаруа қожалық басшылары араларынан ақсақал ретінде ұзақ жылдар бойы аудан көлемінде демеушілікпен айналысып, талайдың алғысын алып жүрген кәсіпкер Владимир Виничукты сайлады. Ол шаруа қожалық басшылары атынан сөйлеп, бұл бастаманы шын жүректен қолдайтынын жеткізді. «Елім-ай» ШҚ басшысы Болат Бекбердинов микрофонды алып, бұл бастамаға 20 млн қаражат қосатынын айтты. Ортаға шығып, ақша қосқандар аз болмады. Сол жиында жалпы 111 млн теңге қаражат жиналды.
Қор 4 негізгі бағытта жұмыс істейтін болады: Бұқаралық мәдени-спорттық іс-шараларды өткізу, рухани-танымдық жобаларға демеушілік жасау, қайырымдылық шараларын ұйымдастыру, білікті кадрларды тарту және мамандарды оқыту. Бұл қордың барлық жұмысы бизнестің әлеуметтік жауапкершілігі аясында жүзеге асырылмақ. Сондай-ақ қордағы қаржыны дұрыс игеру үшін қамқоршылық кеңесі құрылып, оның мүшелері бизнес өкілдері арасынан сайланды.

Фархат Маратұлы

Пікір: