Көкпекті ауданы Үлкенбөкен ауылында жаңа мешіт пен қатымхана ашылды. Алла үйін жеке кәсіпкер, Үлкенбөкен ауылының тумасы Ринат Солтабаев салып берді.
Қараша айының 10 жұлдызында Үлкенбөкен ауылында жаңа мешіттің ашылу рәсімі салтанатты түрде аталып өтті. Ауыл тұрғындарын қуанышқа бөлеген жиынға Көкпекті ауданының әкімі Ділдәбек Оразбаев, Қазақстан Мұсылмандары Діни Басқармасының Абай облысы бойынша өкіл имамы Асқар қажы Әбітайұлы, еліміздің барлық түкпірінен келген құрметті қонақтар қатысты.

Сәулетті мешіт пен 500 орындық ауқымды қатымхананы Үлкенбөкен ауылында туып-өсіп, өркендеген Солтабаевтар әулеті жерлестеріне тарту етті. Өңірімізге белгілі кәсіпкер, жомарт жанды меценат Ринат Солтабаев бас болып, ағайындарын жұмылдырып, жерлестеріне имандылық ордасын салып беруді ұйғарған екен. Мешітке осы ауылға маңдай тері сіңген еңбекқор азамат, әкелері Тұрарбек Тілеубергенұлының атын берді.
Мешіт құрылысы 2023 жылдың мамыр айында басталып, 6 айдың ішінде толық аяқталған. Алла үйіне келушілерге барлық жағдай жасалған. Үздік сәулет үлгісіндегі мешіт, дәрет алу ғимараты, 500 орындық қатымхана - барлығы да заманауи үлгіде жасақталған.
Қуанышты шараға көптеп жиналған Үлкенбөкен ауылының тұрғындары мен мәртебелі меймандарды аудан әкімі Ділдәбек Оразбаев айтулы шарамен құттықтады.
- Құрметті жерлестер, қадірменді қонақтар! Баршаңызды Үлкенбөкен ауылында бой көтерген зәулім мешіт пен қатымхананың ашылуымен шын жүректен құттықтаймын. Мешіт - жер бетіндегі имандылық үйі. Жақсылықтың жаршысы. Қайырымды істердің ошағы. Бүгін ашылып отырған Тұрарбек Тілеубергенұлы атындағы мешіт осынау игіліктердің бастауы болғай деп тілейміз. Ауыл жамағатының арманы орындалды. Қуаныштарыңыз құтты болсын! Ауыл халқына осындай сый жасаған елжанды азамат Ринат Тұрарбекұлына, барша Солтабаевтар әулетіне ерекше алғыс білдіреміз. Жаңадан бой көтерген мешіттің ішіне жамағат толып, асыл дінімізге қалтқысыз қызмет ете берсін, - деді Ділдәбек Тәжібайұлы.
Аудан әкімі Ділдәбек Оразбаев туған жеріне деген сүйіспеншілік пен қамқорлықтың жарқын үлгісін көрсеткен азаматтарға лайықты марапат жасады. Солтабаевтар әулетінің алтын діңгегі, Ринаттың анасы Күлзипа Құсайынқызы «Асыл Ана» меделімен және Данияр Тұрарбекұлы «Толағай табыстары» медалімен марапатталды. Сондай-ақ мешіт құрылысына атсалысқан Нұрлыбек Ташубаев, Мұратбек Әбілқайырұлы, Кулянда Ешенқызы, Ержан Жотабаев, Светлана Пышная және ауылдық округ әкімі Қайрат Жылқышевқа аудан әкімі «Алғыс хат» табыстады.
Абай облысының бас имамы Асқар қажы Әбітайұлы, облыс әкімінің кеңесшісі Талғат Мәзібаев, Тұрарбек Тілеубергенұлының інісі Тұрсын аға, ауылдың үлкені Ғабидолла ақсақал ауыл тұрғындарын жаңа мешіттің ашылуымен құттықтап, ізгілік пен қайырымдылықтың ғасырлар бойы өшпейтінін айта келе, игі іске атсалысқан барша азаматтарға алғыстарын білдірді.
Жаңа нысанның лентасын ауыл ақсақалдары және Абай облысының бас имамы Асқар қажы Әбітайұлы қиып, имандылық ордасының іші мұсылман жамағатына толуына тілек білдіріп, Алланың үйіне алғашқы діни кітаптарын табыстады. Ауыл үлкендері батасын жаудырып, ақ жаулықты әжелер шашу шашты.
Жамағатпен алғашқы жұма намазы оқылып, ел игілігі мен әлем тыныштығы үшін дұға жасалды. Артынан ас беріліп, Тұрарбек Тілеубергенұлының рухына бағышталып құран-қатым түсірілді.
Имандылық шарасында елімізге танымал айтыс ақындары сөз сайыстырды. Алаштың атақты ақындары, жыр додасының хас шеберлері Балғынбек Имашев пен Айшолпан Төлеутай, Сырым Әуезхан мен Дидар Қамиевтың сөз саптаулары мен орамды ойлары өнерсүйер қауымның құлақ құрышын қандырды.

Пікір: