04 Маусым 2014

ЖАҒДАЙ ЖАСАЛҒАНМЕН, ЖҰМЫС ӘЛСІЗ

Article Details

Бұл 29 мамыр күні аудан әкімі Д.М.Мусиннің төрағалық етуімен  Белое ауылында өткен жұмыс кеңесі барысында айқындалды. Аталмыш жиынға ауылдық округ әкімдері, аудандағы мәдениет саласының барлық өкілдері және Белое ауылының тұрғындары қатысты. Жұмыс кеңесі барысында мәдениет және тілдерді дамыту бөлімінің басшысы Ә.Саржанов, бөлімге қарасты мекемелер басшылары тыңдалып, келелі мәселелер мен оларды шешудің жолдары талқыланды. Аудан әкімі Подгорное ауылында өтетін Ұлы Жеңістің 70 жылдық мерейтойы мен мерекелік шаралардың дайындық барысына баса назар аударды.

Алғашқы сөз кезегін алған аудандық мәдениет және тілдерді дамыту бөлімінің басшысы Әлібек Саржанов соңғы жарты жылда атқарылған жұмыстарға тоқтала келіп, мемлекеттік тіл, ономастика бойынша өткізілген шараларды атап өтті. Ал, бүгінгі таңда орын алып отырған келелі мәселелер ретінде ауылдық кітапханашылардың штаттық жұмысының аздығын, мәдениет қызметкерлеріне стипендиаттар тағайындау қажет екенін атады. Алайда, ауданның мәдени өмірінде орын алып отырған орасан кемшіліктер әлдеқайда көп. Осы мәселелерді көтерген аудан әкімі, ең алдымен, ауданның өзінің жеке қазақтың халық аспаптары оркестрінің жоқтығына тоқталды. Иә, шынымен де, кезінде аттары республика көлеміне мәшһүр болып, талайдың таңдайын қақтырған «Шалқыма» сынды оркестрі болған Көкпектінің бүгінде сахнасы жұтаң, ауыз толтырып айтарлықтай ұлттық аспаптарда ойнайтын өнер ұжымы жоқ. Бұл мәселені аудан әкімі осыдан бірнеше жыл бұрын көтеріп, нақты тапсырмалар жүктеген болатын. Алайда, арада 5 жыл уақыт өтсе де, оркестр құрылмады, тапсырма өз орындаушысын таппады. Оркестр құруға ауданда жағдай жасалмаған деген желеуді алға тартуға әсте келмес. Аудан әкімінің бастамасымен ауданның ірі екі елдімекеніндегі Мәдениет ошақтары, сонымен қатар, шағын ауылдардағы клубтар толық жөндеуден өткізіліп, халық игілігіне ұсынылған болатын. Алайда, артылған үміттер, құйылған қаржы өзін ақтамады. Бұл, әрине, ауданның мәдени өміріне жауапты басшының әлсіз жұмысының жемісі. Ол, тіпті, оркестр құрамына қанша өнерпаз кіру керектігінен де бейхабар болып шықты. Аудан басшысы осы тапсырма бойынша ешқандай жұмыс атқарылмағандығын айта келіп, мәдениет саласының жұмысына жетекшілік ететін орынбасарына ескерту жасады. – 2011 жылы мен нақты тапсырма берген болатынмын. Алайда, бүгінгі күнге ешқандай жұмыс атқарылмаған, алға жылжушылық жоқ. Мәдениет үйінде оркестр құру үшін барлық жағдай жасалған. Қажетті аспаптар толық құрамда бар, тіпті, музыканттарға пәтер жағы да қарастырылған. Мен сендерге оркестр құру туралы бастаманы көтердім, қолайлы ортаны қалыптастырдым, ал сендер бұның күлін көкке ұшырдыңдар. Бөлім тарапынан оркестр құру мақсатында ешқандай жұмыс жасалмайды. 5 жылда аудан бойынша екі қобызшы бар деген ұят емес пе! Біз уақыт талабына сай жұмыс жасауымыз керек. Осы мәселе бойынша орынбасарым К.Смаилова мен мәдениет және тілдерді дамыту бөлімінің басшысы Ә.Саржановқа халық аспаптары өркестрін ұйымдастырып, олардың мектеп түлектеріне арналып өткізілетін аудан әкімі балында өнер көрсетуін тапсырамын, - деді Дүйсенғазы Мағауяұлы. Сонымен қатар, оркестр құрылымы мен оған жаңа мамандарды тарту бойынша жұмыс жоспарын құру тапсырылды.

Екінші көтерілген мәселе – Ұлы Жеңістің 70 жылдық мерейтойы бойынша дайындық, осы бағытта бүгінгіге дейін атқарылған жұмыстар. Аудан әкімінің бұл сұрағы жауапсыз қалды. Аталмыш мереке бойынша тапсырмалардың берілгеніне біраз уақыт болса да, өз ниетімен бастама көтеріп, ұсыныс жасаған ешкім болмады. Ал, уақыт өз орнында тұрмайды. Сонда бас көтерер мәдениет қызметкерлері қайда қарап жүр? Дайындық жұмыстары неге әлі күнге дейін қолға алынбаған? Бұл сұрақтар ашық күйінде қалды. Осыған орай, Дүйсенғазы Мағауяұлы 2015 жылға арналған Ұлы Жеңістің мерейтойына дайындық және оны өткізу бойынша жоспар құруды тапсырды.

Келесі кезекте ауылдағы өнерпаздарды түрлі деңгейдегі байқауларға қатыстыру үрдісі төмен екендігі аталды. – Қазіргі таңда ауданымызда еліміздің ең талантты әншілерімен теңдес, ерекше дарын иелері бар. Алайда, олар тек аудан көлеміндегі шағын концерттерде ән шырқайды. Неге соларды облыс, республика деңгейінде өтетін байқауларға қатыстырмасқа? Ән өнерін асқақтатып жүрген жеткіншектер де бар. Неге олар «Әнші балапан» байқауына қатыспайды? Өзінің шығармашылық еңбегімен халықтың көңілін көтеріп, дауысымен жан-жүректі жадыратып, елге қуаныш сыйлай білетін жергілікті өнерпаздардың шашбауын көтеруіміз керек. Ол ауданның беделі емес пе? Ал, сахнаға бар ғұмырын арнап, талай жылдар халық игілігіне жұмыс жасаған мәдениет саласының ардагерлерінің көбі бүгінде атақ-дәрежесіз, еш құрметке бөленбеген. Бұл мәдениет бөлімі басшысы мен оған жетекшілік ететін орган тарапынан жіберілген қателік, – деді Дүйсенғазы Мағауяұлы.

Аудан әкімі наразылығын тудырған тағы бір мәселе – аудандық мұражай әлі күнге дейін облыстық теңгерімге өткізілмеген. Бұл аудан үшін қаншалықты маңызға ие екенін ескерсек, осы тапсырманың атқарылмауы - мәдениет және тілдерді дамыту бөлімі қызметкерлеріне артылар сын. Осы бөлімнің басшысы Ә.Саржановтың айтуынша, мұражайды облыстық теңгерімге өткізу үшін ондағы тарихи жәдігерлердің саны 5 мың дананы құрауы тиіс. Мұражайдағы жәдігерлер аталған көлемде болмағандықтан, олар тапсырманы жүзеге асыра алмай отырған жайы бар көрінеді. Алайда, тарихи тамыры терең, әлімсақтан негізі бар біздің өлке тарихи жәдігерлерден кенде емес екені баршаға мәлім. Олай болса, мәселе жәдігерлердің санында емес, іздестіру, зерттеу жұмыстарының әлсіздігінде болып тұр.

Аудан тарихы демекші, мәдениет және тілдерді дамыту бөлімінің басшысы, тіпті, аудан орталығы - Көкпектінің іргетасы қашан қаланғанынан да бейхабар күйде екен. Білмеуі заңды да. Себебі, қазіргі таңға дейін болжаммен айтылған бірнеше жылдың қайсысы дұрыс екенін зерттеген ешкім жоқ. Осы жағдайды қолға алып, бақылауға тиіс болған аталмыш бөлім еш әрекет жасамауда.

Аудан көлемінде тілдерді дамыту бойынша жүргізіліп жатқан жұмыстар да көңіл көншітерлік емес. – Мен осы бағытта атқарылып жатқан мардымды істерді көріп жүрген жоқпын. Тіпті, мемлекеттік қызметкерлерді былай қойғанда, әкімдікте отырған басшылар қазақ тілін білмейді. Неге сондай азаматтармен жұмыс жасамасқа? Мемлекеттік тілдің мәртебесін көтеру сіздердің тікелей міндеттеріңіз, - дей келе аудан әкімі жұмыстың нашар жүргізіліп жатқандығын айтты. Сонымен қатар, ауданда мемлекеттік тілден өзге тілдерді оқыту мәселесі де қолға алынбаған. Мәселен, үш тұғырлы тілдің бірі - ағылшын тілін оқыту бойынша ауданда бірде бір үйірме жоқ. Осы мақсатта аудан әкімі жазғы уақытта «Ағылшын филологиясы» мамандығында білім алып жатқан ауылдың студенттеріне ұсыныс жасап, тегін үйірме ашу туралы бастаманы көтерді. Егер бұл іс қолға алынса, ауыл балалары шет тілін меңгеріп, ал студенттер қосымша ақша табуға мүмкіндік алады.

Ауданның мәдениет саласын бәсекеге қабілетті қылудың жолдары жайлы Қ.Алтынбаев атындағы Мәдениет үйінің директоры Нұрлан Тоянкенов баяндап берді. Алайда, ауданда «дыбыс жазу студиясының» ашылуынан басқа ауыз толтырып айтарлықтай жұмыстар атқарылмаған. - Тіпті, ауданның бетке ұстар өнер ұжымы «Толағай» тобын алып қарайықшы - жаттанды әндер мен көзге жауыр болған костюмдер. Көздің жауын алатын, жаныңды елітетін сахналық номерлер жоқ, - деді аудан басшысы. Сондай-ақ, мерекелік шаралардан өзге жастар мен зейнеткерлердің бос уақытын ұйымдастыру қолға алынбаған. Әсіресе, жазғы демалыс кезінде оқушыларға арналып концерттік бағдарламалар, тіл мәселесі тақырыбындағы дөңгелек үстел, жиындар өткізілсе, және оған тәрбиесі «қиын» жасөспірімдер мен балалар үйінің тәрбиеленушілері тартылса, олардың бос уақыттары тиімді өткізіліп, құқықбұзушылықтар орын алмас еді. Осы мәселе бойынша аудан әкімі Көкпекті және Самар Мәдениет үйлері әртістерінің өзара тәжірибе алмастыру концерттік бағдарламаларын жандандыру, шағын ауылдарды назардан шығармай, олардың халқы үшін концерттік кештер мен басқа да мәдени шаралар ұйымдастыру сынды тапсырмалар қойды.

Жиын барысында сөз алған Көкпекті аудандық кітапхана директоры С.Қасымова кітапхана жұмысы, техникалық базаның жандануы мен келіп түскен жаңа кітаптар жайлы айтып өтті. Алайда, аудан әкімі оқырмандарды тарту бойынша жүргізіліп жатқан жұмыстың әлсіз екенін атады. – Кітапханада өзіңе бай рухани азық алатындай кітаптар қоры мол. Бірақ, оларды оқитын, қызығатын оқырмандар күннен күнге азайып келеді. Әсіресе, оқушылар, жас жеткіншектер кітап оқуға мүлде қызығушылық танытпайды. Осы мақсатта кітап көрмелерін, әдеби кештер ұйымдастыру қажет. Аталған бағытта қандай жұмыстар жүргізіп жатырсыздар? – деді Дүйсенғазы Мағауяұлы. Бұл сауалға С.Қасымова көшпелі кітапхана ұйымдастыруды қолға алғалы отырғандарын жеткізді. Алайда, бұл жұмыстар неге ертерек қолға алынбағаны белгісіз.

Ал, жарыссөзге қатысқан Самар ауылының өнерпаздары жеке көлік бөлу мен сахналық костюмдердің тапшылығы мәселесін көтерді. Аудан басшысы өз кезегінде бұл мәселелер келесі жылдың ақпан айына дейін шешімін табатынын жеткізіп, Ә.Саржановқа бюджеттен қаражат бөлуді қарастыруды тапсырды. Сонымен қатар, О.Гебель классификацияны көтеру үшін курстарға білім алуға жіберу туралы өтінішін білдірді.

Аудан әкімінің орынбасары К.Смаилова аталған барлық мәселе бойынша қатаң шаралар қолданылып, тиісті жұмыстар қолға алынатынын жеткізді.

Кездесуді қорытындылай келе,  аудан әкімі Мәдениет және тілдерді дамыту бөлімінің жұмысына төмен баға берді. Ауданға жаңа кадрларды тарту мәселесі де қолға алынбаған. Күрделі жөндеуден өткізілген Белое және Преображенка ауылдарының клубтарында материалдық-техникалық база – сахналық костюмдер мен музыкалық аспаптардың жоқтығы салдарынан ешқандай шаралар жүргізілмейді. – Ауданның мәдениет саласында 100-ге жуық маман қызмет жасайды. Алайда, жұмыс нәтижесі жоқ. Бұл жерде осы бөлімнің жұмысын қадағалайтын жетекші органның да жіберген қателіктері бар. Алдағы уақытта тың бастамалар көтеріп, жиналған мәлеселердің шешу жолдарын қарастырып, оларды қысқа мерзім ішінде жүзеге асыру қажет, - деді аудан әкімі.

Кеңес отырысы соңында Дүйсенғазы Мағауяұлы барлық жиналған қауымды аудан өмірінде зор маңызға ие мәдени шара – Подгорное ауылында өтетін Ұлы Жеңістің 70 жылдық мерейтойына дайындықтың барысына белсене атсалысып, азаматтық көзқарас танытуға шақырды.

Арайлым МИРАТҚЫЗЫ

Read more

ӘР БАЛАҒА МАХАББАТ, МЕЙІРІМ, ШУАҚ, ШАПАҒАТ!

Article Details

Балаларды қорғау күні – жыл сайын әлемнің 30-дан астам елінде аталып өтілетін халықаралық мереке. Бұл күні еліміздің барлық өңірінде қиын сәттерге тап болып, тағдырдың теперішін көрген балаларға, мүмкіндігі шектеулі жандар мен ата-анасының қамқорлығынсыз қалған балдырғандарға арналған мерекелік шаралар, қайырымдылық акциялар өткізіледі. Біздің аудан да бұл үрдістен шет қалмады. Үлкенбөкен ауылында ұйымдастырылған балалардың көңілді мерекесіне аудан әкімі Д.М.Мусин қатысты. Ол өзімен бірге балаларға арнап ойыншықтар мен тәтті сәлем-сауқытын ала келді.

Мектептің акт залына салтанатты киінген балалар және олардың аналары, апалары мен аталары жиналды. Барлық жерден балдырғандардың шаттық күлкілері мен қуанышты дауыстары жаңғырып тұрды. Шараны жүргізушілер сахна төріне мерекенің басты қатысушылары – ауылдық округтегі балалар бақшасының түлектерін шақырды. Бүлдіршіндер бар ынталарын сала отырып, өлең жолдарын оқыды, ән шырқады. Алғашқы құттықтау сөзді алған аудан әкімі барша жиналған балаларға жүрекжарды тілегін арнады. – Балалар – біздің болашағымыз. Елбасы Н.Назарбаевтың алдыға қойған міндеттерін жүзеге асырып, әлемнің дамыған отыз елінің қатарына ену үшін, ең алдымен, біз дені сау, білімді ұрпақ тәрбиелеуіміз керек. Сол себептен, қазірден балаларымызға барынша көңіл бөліп, олардың ойдағыдай дамуы үшін барлық керектіні беруге тиіспіз. Қымбатты балалар және қадірлі ата-аналар, барлықтарыңызды осындай жарқын мерекемен құттықтаймын. Отбасыларыңызға бақ-береке, бақыт пен сәттілік тілеймін.

Ауылдық округ әкімі Н.Назарханов пен ауыл ақсақалы К.Баймолдиннің құттықтауында аға буынның ізін жалғастырушы ұрпаққа деген, өз елінің патриоттары болып өсіп келе жатқан округтің жеткіншектеріне деген мақтаныш сөздер айтылды.

Балдырғандардың шаттығын бөлісе келген қиял-ғажайып ертегілерінің кейіпкерлері қосыла ән шырқап, би биледі. Әсерлі және көрнекті қойылымдардың бірін бүгінде тәртіпті оқушылардың қатарында жүрген, өткен жылдарда балабақшамен қош айтысқан түлектер көрсетті.

Ал, бүгінгі бүлдіршіндерге – биылғы жылдың түлектері үшін мектеп табалдырығын аттайтын маңызды сәт алда. Аз қамтылған отбасы балаларына ауыл демеушілері «Мейірім» қайырымдылық акциясы аясында мектепке қажетті сыйлықтар табыс етті. Үлкенбөкен мектебін осыдан бірнеше жыл бұрын бітірген түлектер мерекеде  білім ордасына бағалы сыйлықтар табыстады. Мерекелік шара балалардың асфальтқа сурет салу байқауымен өз мәресіне жетті.

1 маусым күні Көкпекті ауданының орталық алаңы, мәдениет үйі, бүкіл көшелері жүздері бал-бұл жанып, бейне бір ханзадалар мен ханшайымдардай болып жасанған, қолдарында түрлі-түсті шарлары бар балдай тәтті сәбилер мен бүлдіршіндердің сыңғырлаған шат күлкісіне, былдырлаған періште үндеріне толып, ерекше арайлы түрге енді. Өйткені, жадыраған жайдары жаз айының алғашқы күні балдырғандардың алаңсыз ойнайтын, олардың бақытты балалық шағын паш ететін шаттыққа толы мерекесін ала келіп еді.

Кең ауқымдылығымен ерекшеленген жарқын мерекенің бұл жолғы ұйымдастырушылары - аудан орталығындағы «Балалар өнер мектебінің» қызметкерлері. Міне, бүлдіршіндер асыға күткен мерекелік концерттік бағдарламаның шымылдығын Дильназ, Мадияр және Ясмин атты балғын жүргізушілер ашты. Олар жауқазындай жайнаған бөбектерге ыстық лебіздерін арнай келе, алғашқы құттықтау тілегін жолдау құрметін аудан әкімінің орынбасары Клара Рафикқызына берді.

-Балалық шақ – бұл ең бақытты және алаңсыз кезең, айналадағылардың бәрі үлкен және жарқын, ал адамдар – мейірімді. Әлемде қуанышты, бақытты бала күлкісінен керемет не бар. Бүгін сендермен қатар бүкіл әлем балалары бұл әсерлі де жарқын мерекені тойлауда. Қымбатты балақайлар! Сендерді қуаныш пен шаттыққа толы мерекемен шын жүректен құттықтаймын! Әр жаңа атқан таңдарың ересектердің махаббаты мен қамқорлығына бөленсін, ал балалық шақ тек бақытты және жылы естеліктер қалдырсын! – деп ізгі тілегін жеткізді.

Кеш жүргізушілері іс-шараның бағдарламасымен таныстырып, балдырғандарды қолөнер бұйымдарынан жайылған көрмелерге, асфальт бетінде сурет салу байқауына,интелектуальдық және спорттық ойын түрлеріне қатысуға шақырды.

КӨКПЕКТІНІҢ БӘЙШЕШЕКТЕРІ-2014

Аудандық білім беру бөлімінің ұйымдастыруымен балабақша, мектепалды даярлық топтарының бүлдіршіндері арасында «Көкпекті бәйшешектері» деген атпен өткізілген шығармашылық өнер сайысы көрерменнің көз қуанышына айналды. Құртақандай ғана сайыскерлер өзін өзі таныстыру, өнер сайысы кезеңдеріне тамылжыта ән салып, мың бұрала би де билеп бойында бар өнерлерін жан сала паш етті. Ал, шығармашылық жұмыстарының көрмесі әділқазылар алқасының алдына жайылды. Киім кию үлгісі, өнері, шығармашылығы жағынан бірінен бірі асып түсіп жатқан балапандардың сайыс қорытындысын шығарып, сарапқа салу, әділ баға берушілер үшін оңайға соқпағаны рас. Ақыры, байқау қорытындысына барынша әділ баға беріліп, бас жүлдені Ж.Шайжүнісов атындағы ОМ Ахан Дильназ жеңіп алды. I орынды М.Әуезов атындағы ОМ Ізғұтты Айзере, II орынды І. Жансүгіров атындағы ОМ Махаббатова Дильназ иемденсе, Миролюбовкалық Сабазова Әдемі III орынға лайық деп танылды. Сондай-ақ, Ж.Шайжүнісов атындағы ОМ Ахан Гауһар «Кішкентай ханшайым», Шұғылбайдан Әділханов Досжан «Өнерлі бала» атақтарына ие болды. Ал, Баяхмет Нұрай, Жақыпбекова Ислана, Жаңбырбаева Жанайым сынды бүлдіршін ханшайымдар белсенді қатысқаны үшін марапатталып, барлық қатысушыларға әдемі ойыншықтар сый-сияпаттар ұсынылды. Бір айта кетерлігі, айшықты шараның қызығына қызық қосқан «Балерке» балабақшасы бүлдіршіндерінің балдай тәтті тілдерімен оқыған тақпақтары, әндері мен билері де мерекенің көрігін онан сайын қыздыра түсті бұл күні.

Алаңда өткізілген «Әлем балалар көзімен» тақырыбында асфальтта сурет салу байқауынан 1 орын Н.Қабдрешева, «Үздік батпырауық» сайысынан 1 орын Шәріптоғай мектебінің оқушысы М.Маркенова,«Батпақ» ойынында 1 орын № 1 команда ойыншылары Б.Тлеухан, А.Әсенов, Д.Фахрутдинова, С.Астанин, О.Елисеева алды. Ал, «Көңілді старттардан» 1 орынды Көкпекті балалар үйінің командасы жеңіп алды. Барлық ойынға қатысушылар мақтау қағазымен марапатталды.

БАР ЖАҚСЫЛЫҚ БАЛАЛАРҒА

Дәл осы сәтте мәдениет үйі ғимаратындағы би залында да Көкпекті аймағы бойынша Оңалту орталығы қызметкерлерінің  ұйымдастыруымен «Бар жақсылық балаларға» атты сазды ойын-сауық бағдарламасы барлық шаттығымен, қуанышты дүбірімен өтіп жатты. Аудан әкімнің орынбасары К.Смаилованың қызмет алушы балғындарға арнаған мерекелік ізгі құттықтауынан соң, С.Көпесовтың орындауындағы әсем де көңілді ән «Мерекенің» әуенімен педагогтар мен балалар, әлеуметтік қызметкерлер қосыла жаңа заман биін биледі. Сондай-ақ, тәрбиешілер ертегі кейіпкерлері - жылқы, қонжық, қоян, сайқымазақ кейпінде киімдерін киініп алып, балаларға шексіз шаттық сыйлауда болды. Қуаныш одан әрі жалғасып, айнала қол ұстасып, бәрі бірлесе «толқиды теңіз», «мысық пен тышқан», «ақсерек-көксерек», «ручеек» қызықты ойындарын ойнады, шыркөбелек қалықтап вальс, қара жорға, өзбек, аққу билерін нақышына келтіре орындады. Әсіресе, көрерменнің көзайымына айналған дене шынықтыру пәні мұғалімі Жан Нұрсапаев пен Артем Дюсюповтың орындауындағы «Ертегілер» әнін ерекше атап кеткен жөн. Мерекелік ойын-сауықта өнерлерімен ерекшеленген 3 балаға аудан әкімінің сыйлығы берілді. Олар: Дюсюпов Артем, Оразалина Шырын, Мейіржанов Қанағат сынды өнерлі балақайлар. Бұл күнгі балалардың бақыты мен  шаттығында шек болған жоқ. Бірінен бірі өткен сүйкімді, бар сән-салтанаты жарасқан балалардың көңілді мерекесіне оңалту орталығы Көкпекті бойынша 65 балаға тәттілер мен жеміс-жидектер толтырылған дорбалар мен аудандық кәсіпкерлер Палатасының директоры Ә.Мұқашеваның әр балаға арналған ойыншықтары тапсырылса, «Нұр Отан» партиясы аудандық филиалы тәттілер, торттар, жеміс-жидектер мен сусындар жайылған дастарханын ұсынды.

Күн шуағын төгіп, аспан нұрланып тұрған бұл күні – Самар ауылында Балаларды қорғау күні аталды. Алаңға үлкені бар, кішісі бар жиналған бала кереметтей көп болды. Аталары мен әжелері немерелерімен, жас отбасылары, тіпті, бүкіл отбасымен келгендер де бар екен. Көңілді шуыл, әуен бүкіл алаңға жаңғырығып тұр. Қолдарына қызылды-жасылды шар, түрлі ойыншықтар ұстаған балалар мәз-мейрам.

Алаң төріндегі сахнаға күн мен көңілді жолбарыс баласы шығып, балалар үшін көңілді мереке басталып кетті. Бұл күн олар үшін ұмытылмас жарқын сәттердің біріне айналғаны анық. Жарқыраған Күн мен Жолбарыс балаларға түрлі ойындар ойнатты. Мысалы, «теңіз қандай болады?» деген сауалға  «сары, қара, қызыл, тұзды теңіз» деген жауап берген балалар сыйлық алды. Мерекеге жиналғандарды Самар ауылдық округінің әкімі С.Дүсіпов құттықтады. Ол балаларға және олардың ата-аналарына, әжелері мен аталарына зор денсаулық тіледі.

Мерекелік концертке жас бүлдіршіндер белсене қатысты. «Дәншік» балабақшасының, Самар бастауыш мектебінің, Ж.Болғанбаев атындағы орта мектептің кішкентай өнерпаздарының концертін тамашалағандар дән риза болысты. Балалар шығармашылық үйінің ұйымдастыруымен балдырғандар асфальтқа сурет салды. Бір қызығы биыл олардың арасында ешқандай бәйге жарияланған жоқ. Ең кішкентай суретші екі жастағы болса, ересегі он бір, он екі жасар болды. Елуге жуық суретшінің барлығына бірдей сыйлық таратылды.

Мерекелік шарадан мекемелер де сырт қалған жоқ. Мысалы, Самар МӘМ ұжымының кәсіподағы балаларға тәтті шырын мен шоколад таратты. 

Мерекеге белсене қатысқан балаларға ауылдық округ әкімінің және мәдениет үйі атынан мадақтамалар табыс етілді. «Шашбаулым», «Самарчанка» би топтары, Бинұр Тілеубекова, Яна Габизуллина, Амина, Дарибаева, Анеля Боданева, Мадина Мұхтарбек және басқалары осындай марапатқа лайық деп танылды. Мерекенің қызықты болып өтуіне «Мәмбет» шаруа қожалығы, кәсіпкер Л.Федорова демеушілік жасады.

Бұл күні Самар ауылындағы спорттық модульдің футбол алаңында оқушылардың орта буын жастағы командалары арасында футболдан жарыс өтті. Бұл жарыста Самар ЖБСМ-нің 2006 жылғы туылған ұлдар командасы бірінші орын алды.

Жазды барлығымыз да жақсы көреміз. Жаз - ол көңілді демалыс, суға түсу, лагерьге бару, үлкендеге көмектесу, бау-бақша күту, балалар сөзімен айтқанда, таусылмайтын қызық кезең. Жаздың алғашқы күні Баларады қорғау күні болуы да тегін емес секілді. «Үлкендердің осындай мереке ұйымдастырғанына біз кереметтей қуаныштымыз», дейді олар. Осындай қуаныштар жаз бойы бола берсін.

Біздің тілшілер

 

БАЛАЛЫҚ ШАҚТЫҢ БАЛ СӘТТЕРІ

1 маусым – Үлгілімалшы ауылында Балалар күніне арналған «Балғын балалар -біздің болашағымыз» атты мерекелік шара жоғарғы деңгейде өтті. Жиналған қауымды ауыл әкімі А.Смағұлов және әйелдер алқасының мүшесі К.Айдарханова, ардагер ұстаз Қ.Айжақсина құттықтап, жылы лебіздерін білдірді. Ауылымыздың музыканты Б.Байтұновтың сүйемелдеуімен балалар мерекелік әндер шырқады, би биледі. Жас ұрпақтың спортқа деген қызығушылығын арттыру және салауатты өмір салтын насихаттау мақсатында веложарыс ұйымдастырылды. Бас жүлдеге ауылдың тумасы, Семей қаласының тұрғыны О.Игимбаев велосипед тігіп, ол қарсыластарынан оқ бойы оза шапқан М.Қизатовқа бұйырды. Спорт ардагері М.Айжақсин жарыс жүлдегерлеріне сыйлықтар мен мадақтамалар тапсырды. Мерекенің ойдағыдай өтуіне «КалМухЖом-Ахмет», «Елтай», «Сейіт», «Мейіргүл» т.б шаруа қожалықтары демеушілік жасап, балаларға тәтті-дәмділер мен сусындар сыйға тартылды.

М.Мырзабекова,

Үлгілімалшы ауылының жастар маманы

Read more

КЕЛІСІП ПІШКЕН ТОН КЕЛТЕ БОЛМАЙДЫ

Article Details

Өткенмен ешкімнің жоқ таласпағы,

Тарихқа тағзым ету нақ асқары.

Ұрпаққа үлгі болып мәңгі тұрсын,

Ерлердің монументі Қараштағы.

Адамзат тарихындағы жойқын соғыс - Ұлы Отан соғысы аяқталғанына келесі жылы 70 жыл толады. Бұл дата барша қазақстандықтар үшін үлкен маңызға ие. Себебі, барша адамзатқа ортақ құндылық – бейбітшілік үшін қару асынып, өр кеуделерін оққа тосқан жауынгерлердің құрамында қазақ жерінің айбынды жігіттері де болды. Әсіресе, бұл мереке Подгорное ауылы үшін ерекше болмақ. Өйткені, осы ауылдан шыққан Иван Яроцкии, Николай Фонов, Сергей Седнев есімді үш батыр жеңістің бір табан жақындай түсуіне себепкер болып, сол жолда өздерінің өмірлерін құрбан қылды. Біздің мақсатымыз – аталмыш ауылды өз атына сай қылып, гүлдендіру, көріктендіру. Себебі, осындай батырларымен мақтана алатын шағын ауыл облыста, тіпті, республикада жоқ десек, артық айтқандық емес.

Read more