08 Шілде 2014

ОҢДЫ ЖҰМЫСТАРЫ АТАЛДЫ

Article Details

ҚОСЫМША РЕЗЕРВТЕРДІҢ НӘТИЖЕСІ МЕН САЛЫҚ БАЗАСЫН ҰЛҒАЙТУ 

Облысәкімінің 4.05.2014 жылғы № 6651 хаттамалықтапсырмасынорындаужәнеауданәкімінің 12 мамырдағысалықбазасынұлғайтужәнеішкікірістердікөбейтужолынқарастыру, «көлеңкелі» экономикаменкүрес, өндіріскөлемінарттырутапсырмасытуралыәңгіме2 шілдекүніМиролюбовкаауылдықокругітұрғындарыныңжиынындажалғасынтапты.

Read more

ЖАСАСЫН ЖАЗ, ЖАСАСЫН КАНИКУЛ!

Article Details

Ж.Болғанбаев атындағы орта мектепте «Балдәурен» жазғы демалыс лагері ұйымдастырылып, ол соңғы қоңырау салтанатынан соң, бір аптадан кейін жұмыс істей бастады.

Жаз мезгілінде балалар демалысын, сауықтырылуын ұйымдастыру, олардың шығармашылық дамуына жағдай жасау үшін мектеп жанындағы жазғы демалу-сауықтыру лагерінің атқарар міндеті зор. «Балдәурен» лагерінің жұмысы төрт ауысымға жоспарланған. Онда көпбалалы және аз қамтылған отбасыларынан 50 оқушы қамтылған.

Жылдағыдай дәл мерзімінде ашылған лагерь жұмысы 1 маусым – Балаларды қорғау күнін атаумен басталды. Лагердің қызықты да, қауырт күндері зулап өте берді. Балалардың мұндағы өмірі спорттық шараларға  қатысу, өлкеміздің табиғатымен танысу, біруақыт еңбекпен айналысу және интеллектуалдық жағынан даму сабақтары мен көңіл көтерулерге толы болды. 

Балалар өздерін «Денсаулық – зор байлық», «Музыкалық қобдиша», «Мен болашақ дизайнермін», КВН, «Ойлан тап», «Мың бір мақал, жүз бір жұмбақ», «Ертегілер еліне саяхат» ойындары, «Кітап менің досым», «Көрікті менің Астанам!» танымдық сағат, «Біздің ауылдың табиғаты» саяхаты мен түрлі спорттық шараларға қатысуда көрсете білді. Саяхат кезінде қауіпсіздік ережелерімен де танысты. «Бұл біздің жадымызда сақталып қалады, болашақта керек болады», - дейді балалар.

«Танысу», «Міне, мен қандаймын», «Коммуникативтік қарым-қатынасқа арналған психологиялық тренинг», «Дос іздеу», «Менің көңіл күйім» сияқты психологиялық тренингтерге қатысу да демалушылар үшін қызықты болды. Мектеп кітапханашысыА.Сағындықова өткізген «Мемлекеттік рәміздер -ұлттық мақтаныш» тәрбие сағаты мен «Қазақстан рәміздері» слайд көру сағаты, «Рәміздер тарихы» танымдық кеші балалардың патриоттық рухын тәрбиелеуге бағытталып, олар өз елдерін мақтан тұтатындарын өлең, тақпақпен жеткізіп, белсенділік танытты.

«Біздің мектептің жазғы лагері басқа да мектеп жанындағы жазғы демалу-сауықтыру лагерімен тығыз байланыста жұмыс істейді. Мысалы, бастауыш мектеп жанындағы «Солнышко» лагерінің балаларымен «Эстафеталық жарыстар» және басқа да іс-шаралар өткізілді. Сондай-ақ, мұражайға, спорт кешеніне, ауылдық кітапханаға және басқа жерлерге саяхат жасадық»,- дейді мектеп директорының тәрбие жөніндегі орынбасары, жазғы демалу-сауықтыру лагерінің басшысыА.Таникенова.- Балалардың демалысы көңілді өтуі үшін әдіскер Ә.Қожахметова,тәрбиешілер, бастауыш сынып мұғалімдері С.Шкибаева,С.Аязбаева,К.Қабланова, Ф.Темірғалиева және басқалары, дене тәрбиесі мұғалімдері А.Әкенев,Т.Анатпаев шығармашылық ізденіспен, жауапкершілікпен қарады.  Лагерь жұмысы шілденің 17-не дейін созылады. Балалардың алдыңғы маусымда демалыста болғандары келесі маусымға да сұранатын жағдай орын алып отыр. Бірақ оған мүмкіндік жоқ, өйткені жазылып қойылған балалар да демалулары керек, - дейді ол.

«Жаз жайнатып, күн күлдіріп, біз лагерьге барамыз,

Бар дауыспен әнге салып, лагерь жырын айтамыз»,- деп балалар ән салады. Жаз қызығы таусылмайды. Олар ертеңгі күні шынығып, шымыр болып, күнге күйіп, денсаулықтарын нығайтып, жаңа тың күшпен мектеп партасына оралады. «Ол туралы ойлау әлі ертерек, жасасын жаз, жасасын каникул!», - дейді оқушылар.

Клара НҰРПЕЙІСВА

Read more

ҚОШ БОЛ, БАЛАБАҚША

Article Details

Өтті қызық көп күндер,

Бес жасқа да жеттіңдер.

Барасыңдар мектепке,

Бір белестен өттіңдер, - деген өлең жолдарымен өз бастауын алған мерекелік шара балғын балдырғандарды, олардың ата-аналары мен барлық тәрбиешілерді шаттыққа кенелтті. Бұл күн – бүлдіршіндердің енді ғана тәй-тәй басып, былдырлап тілі шыға бастаған шағынан тәрбиелеп өсірген балабақшамен қоштасу кеші.Кеше ғана аяқтарын сүріне басқан сол балдырғандар бүгіндері би билеп, ән айтып, әріп танып, сан ажыратып, есеп те шығарады.

Балалар өмірінде қоштасу ертеңгілігі әрқашан да – мереке. Өмірдің белгілі бір белесін артта қалдырып, өмірдің жаңа бастауларына қадам басады. Мұндай оқиға әрбір бала мен ата-анасы үшін өте маңызды. Бұл ата-ана мен баланың бірігіп жасалған алғашқы қадамы болғандықтан өтілген ертеңгілік тек қана жақсы әсерін қалдырды. Шара барысында бүлдіршіндер тәрбиешілеріне, күтушілеріне, аспаз апайларына, музыкалық жетекшілеріне және балабақша меңгерушісіне тақпақтап алғыс айтып, өнерлерін ортаға салды. Атап айтсақ, балдырғандар қосыла шырқаған «Тәрбиеші мұғалім», «Детский сад» әндері, Д.Ермекованың мың бұрала билеген «Шығыс биі», ұл балалардың орындауындағы «Қызыл өрік» биі бөбектердің тыңғылықты дайындықтарын көрсетіп, көрермен көңілінен шықты. Сайқымазақ, буратино сияқты әр түрлі ертегі кейіпкерлеріне енген тәрбиешілер балалармен түрлі ойындар ойнады. Осы ойындар барысында балалар өздерінің оқу, есептеу қабілеттерінің деңгейін көрсетті. Дәрігер ағаларымен бірге дене шынықтыру жаттығуларын да жасады.Кеш барысында балабақша меңгерушісі А.Назарханова ата-аналарды, балаларды бүгінгі күнмен құттықтап, мектепке қадам басқалы тұрған бүлдіршіндерге балабақша өміріне белсенді араласқаны үшін марапаттаулар табыстады. Ата-аналар атынан сөз сөйлеген Р.Ташубаева балаларға мектепте алғыр, тәрбиелі болыңдар деген ақ батасын беріп, осы бүлдіршіндерді тәрбиелеуде зор еңбек сіңірген тәрбиешілерге үлкен аналық алғысын жеткізді.Ертеңгілік соңында әсем киінген бүлдіршіндер жұптасып вальс ырғағымен дөңгелене жүріп, ертеңгілікті аяқтады.

Ауданымыздағы белді балабақшаның бірінен саналатын «Балерке» тәрбиеленушілері алдағы өмірде де өздерін лайықты көрсете аларына ата-аналардың сенімі мол.

Арайлым МИРАТҚЫЗЫ

 

Read more

ЖАЗ ҚЫЗЫҒЫН СЫЙЛАҒАН ЖАЗҒЫ ДЕМАЛЫС

Article Details

Көкпекті оңалту орталығындағы күндізгі келу бөлімшесінің ашылғанына, міне, бір жыл уақыт толып отыр.Қазіргі таңда аталған бөлімшеде 14 мүмкіндігі шектеулі бала қызмет алуда. Орталықта балалар үш топқа бөлінген. Кіші «Шаттық» тобында екі бала болса, орта «Достық» тобында жеті бала қызмет алады. Ал, жоғары «Қуаныш» тобына бес бала келеді. Әр топта балалармен оңалту жұмыстарын жүргізетін өз тәрбиешілері бар. Бекітілген жоспар бойынша топтағы балалармен орталықтың еңбек, дефектолог, хореограф және музыкант сынды мамандары мен тәрбиешілері жұмыс жасайды. Қызмет алушы балалардың бос уақыттарында тәрбиешілер олардың қол моторикасын дамыту мақсатында әр түрлі заттардан мүсіндер жасатып, қызығушылықтарын оятады.

Биылғы жазда балалардың демалысы қызықты әрі танымдық деңгейде өтуі үшін орталықта арнайы жоспар құрылған. Осы жоспарды басшылыққа алған тәрбиешілер жан-жақты жұмыстар жүргізуде. Мәселен, балалардың денсаулығын қалпына келтіру мақсатында «Жеңіс» және «Балалар» саябақтарына, аудандық кітапхана мен мұражайға, «Илья бастауына» серуен құрып, саяхат ұйымдастырылды.«Илья бастауына» көкке шыққан кезде балалар таза ауада демалып, түрлі қызықты ойындар ойнады. «Тығылмаш», «Валейбол», «Теңіз толқыны» сынды ойындардың қызығына батқан балалар бір сергіп қалды. Сонымен қатар, табиғат саясында бесін тамақтарын ішкен оларға бұл саяхаттың пайдасы зор болды. Саябақта серуен құрған сәтте де балалар көңілді уақыттарын өткізіп, соңында естелікке суретке түсті. Ал, аудандық кітапханаға барған кезде бұл жер оларға әрі қызықты, әрі таңсық болды. Сөрелерде тұрған кітаптарға тамсана қарап, ертегі, әңгімелерді рөлдерге бөліп оқудан өзара үздіктерді анықтады. Аудандық мұражайға барған уақыттада балалар жәдігерлермен аса мұқияттылықпен, қызығушылықпен танысты.Бұл жерде олар көне заттар, құнды дүниелер, аудандық мектептер мен балабақшалардың тарихы, қазақ халқының киімдері ментұрмыстық заттары туралы мол мағлұмат алды.

Балалардың жазғы демалысы қауіпсіз түрде өтуі мақсатында Көкпекті аудандық төтенше жағдайлар бөлімнің әдіскері орталықтың қызмет алушыларымен кездесу өткізді. Ондағы басты мақсат –балаларды және олардың ата-аналарын алғашқы көмек көрсетудің қыр-сырына қанық қылу. Кездесу барысында балаларға мультфильмдер,алғашқы көмек көрсету жайлы қысқаша видео жазбалар көрсетілді. Сонымен қатар, балаларға суға түсу ережелері туралы да айтылды.

Бұл жазғы демалыс қызмет алушы балаларға өте қатты ұнауда.

Н.Ауғанбаева, Д.Төлеуғалиқызы,

тәрбиешілер, Көкпекті оңалту орталығы

Read more

ЖАЯУЖОЛДЫҢ ИГІЛІГІН КӨРМЕК

Article Details

Еліміз егемендік алған күннен бастап Елбасы Н.Ә.Назарбаев өңірлерді өркендету, қалалар мен ауылдарды абаттандыру және көгалдандыруға үлкен мән беріп, жүйелі жұмыстың барысын қатаң бақылауда ұстап келеді.

Дана халқымызда «Туған жер – тұғырың» деген аталы сөз бар. Сондықтан, ауылдарымыз бен көшелеріміздің әсем де әдемі, таза да көрікті болуы көпшілікпен бірге атқарылатын, тәрбиелік және мәдени мәні жоғары іс деп білеміз. Ауданымызда  бұл бағытта көптеген игілікті жұмыстар атқарылып келеді. Мәселен, жаяуы да, көліктісі де, жандысы да, жансызы да көше бойымен жүретін көкпектіліктерді бүгіндері қуантып отырған жайт –жаяужолдың төселуі. Аудан орталығында жол жиегін жөндеу жұмыстары қолға алынғандығы жөніндемердігер "Көкпекті Жолдары" ЖШС директоры Г.Нұрғалиева былайша баяндап берді:

-Жобалы-сметалық құжаттарға сәйкес жергілікті бюджеттен жол жөндеу жұмыстарына 21 млн. 539 152 теңге қаражат бөлінген болатын. Бұл Қабанбай батыр көшесінен бастау алатын жаяужол Ж.Шайжүнісов мектебіне дейін, барлығы 1,7 шақырым жолдың бойына төселмек. Қазіргі таңда, өлшеу жұмыстары жасалып жатыр. Алдағы уақытта бордюрлер қоюды қолға алмақпыз. Сондай-ақ, қосымша 8 су жіберу құрылғылары да орнатылуда. Бұған қоса, осы бөлінген қаражатқа Биғашқа шығатын жолға қисық сызықты діңгек орналастырылды.Жобаның жүзеге асырылу мерзімі 2014 жылдың маусым-шілде айларын қамтиды, - дейді ол.

Бұл оқушылардың жүретін жолы екендігін де ескерсек, алдағы уақытта тротуарлар жаяу жүргіншілер мен балалардың қауіпсіздігін  қамтамасыз ететіні сөзсіз. Гүлназ Нұрғалиеваның айтуынша, жол қозғалысының қауіпсіздігі ең маңызды, әрі негізгі мемлекеттік мәселе. Осы мәселені шешу кезінде аса маңыздысы, ол жол қозғалысы мүшелерінің ішіндегі ең кішкентай жаяу жүргіншілеріміз – балалардың қауіпсіздігін қамтамасыз ету.

Жұмыс қарқынды жүріп жатқанымен, орын алып отырған олқылықтар да жоқ емес. –Біз ауылымызды көркейту жолында еңбек етіп жатырмыз. Алайда, мұны кейбір тұрғындар түсінбейді, наразылықтарын білдіруде. Себебі, жаяужол тұрғындардың дәл қақпасының алдынан төселуде. Кейбір үйлерде көліктер тұратын орын бар,оларды да ескеріп жатырмыз. Жаңа жаяужол тұрғындардың игілігі үшін екенін түсінсе дейміз олар, - дейді "Көкпекті Жолдары" ЖШС директоры.

-Туған ауылымыздың көркіне көрік қосу үшін жұмыс істеп жатқанымызға мақтанамыз. Ауылымыздың сәнін келтіруде өз қолтаңбаңды қалдыру да мәртебе әрі материалдық жағынан өзімізге де пайдасы зор, - деді пікірін білдірген жұмысшы жігіттер.

Біз олардың жұмысына сәттілік тілей отырып, көше тұрғындары бұл істің қаншалықты пәрменді болғанын келесі жылы өздері-ақ байқайды демекпіз.

Жібек ЕРЛАНҚЫЗЫ

Read more

ДАЙЫНДЫҚТЫ ҚАЗІРДЕН БАСТАУ КЕРЕК

Article Details

-Ұлы Отан соғысы салған қасіретті көрмеген отбасы жоқ шығар. Сондықтан да, біз өткенімізді ұмытпай, аталарымыз қаһармандықпен алып берген Жеңісті қастерлей білуіміз керек. Өздеріңізге белгілі әлем халқы бұл мерекенің келесі жылы 70 жылдық мерейтойын атап өтеді. Біз де қапы қалмай, дайындықты осы уақыттан бастауымыз керек,- деп бастады аудан әкімі Д.Мусин ауылдық округ әкімдері, мамандары,  шаруашылық басшылары, білім беру мекемелерінің директорлары, қоғамдық ұйымдар жетекшілері мен ауылдың сыйлы адамдары қатысқан жиынды.

Бұл соғыста біздің қаншама азаматтарымыз шейіт болса, қаншасы еліне оралып, қолындағы қаруды шаруа құралына алмастырып, соғыстан кейінгі бүлінген шаруашылықты қалпына келтірді. Олардың арамызда көзі тірісі де қазіргі күні саусақпен санарлықтай қалды. Әр соғыстың өз ерлері мен қаһармандары бар. Солардың қатарында біздің ауданнан шыққан Кеңес Одағы Батырының есімін біз ешқашан да жадымыздан шығармауымыз керек. Жеңіс мерекесін тойлау тек қана сыйлық таратып, дастархан жаю емес. Ол күнге дайындық тиянақты болуы керек. Ең алдымен, ауданымызда бар ескерткіштер қалпына келтіріліп, ұрыс даласында қалған жауынгерлерді тебірене еске алатындай, бүгінгі ұрпаққа патриоттық тәрбие беріп, олардың санасында осы күнге жеткізген аға буын ұрпақтың ерлігінің ұрығын себе отырып, қастерлей білуді дәріптейтіндей болуы керек. Біздің ауданда бір ғана Палатцы ауылдық округінен төрт Батыр шыққан. Ал оның үшеуі ғана сол округке қарасты Подгорное ауылынан. Аудан, облыс, республика көлемінде дәл осындай үш батырымен мақтанатын ауыл жоқ шығар. Ендеше, біз Ұлы Жеңіс мерекесін осы ауылда ерекше атап өтуіміз керек. Бұл бүгінгі жиынның жалғыз ғана мәселесі болып отыр.

Аудандық ішкі саясат бөлімінің басшысы Б.Нұғыбаев жиналғандарды аудан бойынша атқарылатын іс-шаралар жоспарымен таныстырып өтті. - Жоспарға сәйкес ең алдымен аудандық және облыстық  баспасөз құралдарына Подгорное ауылының тұрғындары атынан үндеу жарияланды. Сонымен бірге,ауылдың мектебі, клуб үйі, және басқа да ғимараттарды жөндеуге жобалық сметалық құжаттар әзірленді,- деді Бек Назарбекұлы. Сондай-ақ, абаттандыру жұмыстарына да жете көңіл бөлінетін болады. Оған ауыл тұрғындары да белсене қатысулары тиіс. Барлық мекеме мен ұжымдарға, қоғамдық ұйымдарға Жеңіс күнін лайықты қарсы алуға белсене қатысу туралы қатынас қағаздар жіберілді.Сонымен бірге, жылдағыдай керуен ұйымдастырылып, оның тақырыбы Жеңістің 70 жылдығына арналады. Көркемөнерпаздар байқаулары да осы тақырып аясында өтетін болады.

Жиын барысында Дүйсенғазы Мағауяұлы Подгорное ауылында мұражай ашып, кешенді түрде көруге болатын өзінше бір туристік кластерге айналуы тиіс дегенді алға тартты. Ауданымыздан шыққан Батырларды бар жағынан жұртқа танытатындай альбом жасалуы керек. Сонымен бірге, аудандық БАҚ бетінде соғысқа қатысқан жауынгерлер мен әр Батыр жайында мақалалар жарияланып, арнайы айдар ашылсын деген тапсырма берді. Патриоттық әндер байқауын, әскери-патриоттық клубтар арасында байқаулар өткізілуі де осы мерейтой аясында болғаны дұрыс. «Туған жерге тағзым» акциясы  бойынша жан-жақтағы жерлестерді мерейтойға үлес қосуға үндеу қажет.

Жиынға қатысып отырған САТК директоры Н.Исенов, мемлекеттік қызмет ардагері А.Садықов, ауыл тұрғыны З.Сидорова да өз тараптарынан білім беру ошақтарында Жеңіс тақырыптарына шығарма жазу, патриоттық әндер мен саптық байқаулар, кездесулер, Даңқ сабақтарын өткізу жоспарлансын, «Ізшілер» жұмыс істеп, хабарсыз кеткен жерлес жауынгерлерді іздеу жұмысын жүргізсе деген ұсыныс айтты. Сонымен бірге, Нұртас Нұрақымұлы өз ұжымының осы мерейтой есепшотына бір күндік жалақыларын аударатындарын айтты. Бұл барлығына жасалған үндеудей болды.

Қорытынды жасай келе, аудан әкімі: «Жөндеу жұмыстарын осы күзге дейін аяқтауға тырысу керек, біздің өлкенің табиғаты белгілі, көктемде үлгермей қаламыз»,-деген ой тастады. «Өткенге құрмет жасап, тарихымызды білмейінше, болашақты құра алмаймыз»,-деген қанатты сөздің жаны бар. Сондықтан да, бұл жиында айтылған әр тұрғынға жеткізіліп, олардың да қатардан қалыспайтынына сенім мол.

Клара НҰРПЕЙІСОВА

Read more