Күміс шыңдары зеңгір көкпен таласқан түркілердің алтын бесігі – Алтайға ат шалдыратындар аз емес. Босағасы ала жаздай қонақтардан босамайды. Сөзсіз, сұлу мекен. Дәл сол сияқты суы шипалы Алакөлді аңсап жететіндердің де қарасы көп. Хакім Абай өткен Жидебай өңірін айтсақ, әр тасы тұнған тарих. Тұлғалар туған киелі өңір.

Бұл жерлерді білмейтіндер, әй жоқ-ау. Барып көрмесе де, хабардар. Сол үшін де «Egemen Qazaqstan» және «Казахстанская правда» газеттерінің ұйымдастыруымен өтіп жатқан «Атамекен» экспедициясы көп ешкім біле бермейтін атақоныстарға ат басын бұрды. Сөйтіп, Қалба сілемдерінің қос қапталын жайлаған Көкпекті мен Ұлан аудандарын аралап шықтық.
Ертістен түстікке қарай созылып жатқан Қалба жотасының қойнауы – көненің көзі, сақтардың ізі қалған киелі жер. Зиялы қауым мен журналистерден, фотографтар мен блогерлерден құралған топтың сапары көрікті Көкпекті жерінен басталды. Тәуелсіздіктің отыз жылында рухани толысып, асқан асуымыз, шыққан белесіміз аз емес екен. Бірақ келмеске кеткен кеңес кезінде құнды деректердің тоналып, кейбір дәстүрлерден қол үзіп қалғанымызды да байқадық.