Мемлекеттік тілдің жағымды бейнесін қалыптастыру деген тіркес бар. Жағымды сөз тілімізге жарасып тұрған жоқ. Оны көркем бейнесін деп өзгерткен ләзім. Өйткені, қазақ тілі әлемдегі әрі шешен, әрі көркем тілдердің біріне жатады. Елбасымыз, «Қазақ тілінің одан әрі дамуы үшін барлық күш жігерімізді салуымыз керек» деп ұран тастап отыр. Енді осыны іліп әкетіп, көрінетін жердің бәріне неге ілмеске, неге оны қару етпеске. Соны тілге тиек ете отырып, тиісті жерлерде талап етейік. Қазақ тілін білуді алдымен қазақтардың өздерінен қатаң талап етейік. Сөзге келетін жерде тастамайық. Мемлекеттік тіл қазақ тілі дегенімізбен орыс тілінің қолданылу аясы өте үлкен екендігі өзімізге белгілі. Мемлекеттік жиындар әлі күнге дейін көрші мемлекеттің тілінде жүргізіледі. Ата- бабасында өзге ұлттың бір қасық қаны жоқ қазақ шенеуніктерінің өз ана тілінде сөйлеуді қорсынып, орыс тілінде жосылтатынын күнде көріп жүрміз.

Мемлекеттік тіл мәселесіне заң тұрғысынан қарайтын болсақ, Қазақстан Республикасының «Қазақстан Республикасындағы Тілдер туралы» заңы Қазақстан Республикасында тілдердің қолданылуының құқықтық негіздерін, мемлекеттің оларды оқып-үйрену мен дамыту үшін жағдай жасау жөніндегі міндеттерін белгілейді. Қазақстан Республикасында қолданылатын барлық тілдерге бірдей құрметпен қарауды қамтамасыз етеді. Қазақстан халқын топтастырудың аса маңызды факторы болып табылатын мемлекеттік тілді меңгеру- Қазақстан Республикасының әрбір азаматының парызы.
Мемлекеттік тіл – конституциялық тұрғыдан бекітілген жоғары саяси- құқықтық мәртебеге ие, Қазақстанның барлық аумағындағы қоғамдық қатынастардың барлық саласындағы мемлекеттік басқаруда, заң шығаруда, сот ісінде және іс жүргізуде қолданылуы міндетті, алдағы уақытта ұлтаралық қатынас тілі қызметін атқаратын тіл. Тілдерді дамыту үшін қажетті жағдай жасауға бағдар ұсынған мемлекеттік саясат бүгінгі таңда айқын орын алып отырған тілдер мәртебесін түзеуге , мемлекеттік тілду дамытуға басымдық беруге бағытталу қажет. Мемлекеттік тілдердің қоғамдық өмірдің барлық саласында бірдей қолданылуына қатысты проблемалардың түйіні шешілу үшін жекелеген азаматтардың және қоғамдық бірлестіктердің күш- жігері жеткіліксіз, мемлекеттік деңгейде басымдық беру арқылы ғана мемлекеттік тіл мәселесі оң шешім табуы мүмкін.
Көкпекті ауданының № 2 аудандық сотында мемлекеттік тілде іс-қағаздарын жүргізу 2009 жылдан бастап толығымен мемлекеттік тілге, яғни қазақ тіліне көшкен. Атап айтқанда, жұмыс жасап отырған «Төрелік» бағдарламасының өзі, сайт, қағаз жүзінде жүргізілетін тізімдер мен журналдар мемлекеттік тілде жүргізіліп келеді. Хаттар, сұранымдар мен жауаптар да мемлекеттік тілде рәсімделеді. Сонымен қатар тілді жеттік меңгермеген сот жүйесі қызметкерлері қазақ тілін үйрету курстарына қатысып, үйрену нәтижесі бойынша арнайы тестілеу тапсырады.
Осылайша сот жүйесі де мемлекеттік тілді дамытуға өз үлесін қосуда.

М.Маутқанова, Көкпекті ауданының № 2
аудандық сотының жетекші маманы

Пікір: