30 тамыз 1995 жылы республикалық референдумда Конституцияны қабылдау күні мемлекеттік мерекесі - Қазақстан Республикасының Конституциясы күні ретінде жарияланды.
Біздің құқықтық демократиялық мемлекетте Конституция аса жоғарғы мәнге ие. Конституция жобасы Қазақстан Республикасы Тәуелсіздік алғаннан бастап жасалына бастады. Конституция қабылдаудан бұрын бүкілхалықтық талқылаудан өтті.
Конституция Қазақстанның демократиялық, құқықтық және әлеуметтік мемлекет ретінде дамуына қолайлы жағдай жасайды. Заңда белгіленген барлық тұжырым, қағидалар өмірдің барлық салаларын өркениетті заң жүзінде басқаруға жағдай жасап отыр.
Еліміздің бұл негізгі Заңы бірінші рет Қазақстан Республикасын Президенттік басқару ныса-нындағы біртұтас мемлекет деп жария етті. Бұған мемлекеттің құзырына өз аумағының тұтастығын, сырттан қол сұғылмауын және бөлінбеуін қамтамасыз ету толығымен жатқызылады. Конс-титуцияда адамды қастерлеу, құрметтеу, адам-гершілік сезімдеріне үлкен маңыз берілген. Әркімнің өзінің жеке басының бостандығы заң жүзінде қорғалған. Заң бойынша адамның жеке басының қадір қасиетіне қол сұғылмайды. Адамның ар-ождан бостандығына заң жүзінде толық кепілдік берілген.
Демократиялық, зайырлы, құқықтық және әлеуметтік, тәуелсіз мемлекет - Қазақстан Республикасының болашағы жарқын, келешегі кемел болатынына сеніміміз мол. Ата заңымыздың қашанда тұғыры биік, болашағы жарқын болсын.
Шынар Қалдыбаева, кеңсе меңгерушісі,
Көкпекті аудандық соты

Пікір: