Мақаншы ауданы Ақшоқы ауылында өткен ұлы аламан бәйгеде Көкпекті ауданының жүйрігі Көктұйғын топ жарды. Ұшқан құстың қанатын талдырып, тұлпардың тұяғын тоздыратын кең-байтақ еліміздің төрт қиырынан атбегілер келіп, желмен жарысқан 40-қа жуық сәйгүліктің бабы сыналған дүбірлі дода болды.
Бұл күні жарыс жолына шыққан сәйгүліктер аламанның көркін қыздырды. Құйрық-жалы төгілген кілең тұлпарлардың қолтық жазуы да жанкүйердің жан-жақтан қиқу салуымен қызықталды. Сөреден тізгін жіберген жүзден жүйрік, мыңнан тұлпар деген 37 сәйгүлік даланы дүбірлете 30 шақырымға бауыр жаза көсілді.

Ат тұяғы талатын мұндай қашықтыққа тұлпардың тұлпары ғана шыдас берерін алдын ала топшылаған жұрттың назары түгелдей желдей ескен жануарларға ауған. Жылдамдықтары таңдай қақтырарлық жүйріктер бірін-бірі құйрық тістесе шаң қаптырып, алғашында қатарласа шапса, келе-келе түйдек-түйдегімен, топ-тобымен бөлектене, аралары ұзай берді. Жанкүйер біткен одан көз алмай, дем бере қиқулаған дауыс даланы басына көтерді.
Тассайлық белгілі атбегі Азамат Сләмовтың «Көктұйғын» атты тұлпары мәре сызығын бірінші болып өтіп, бас жүлдеге тігілген су жаңа автокөлікті ұтып алды. Ат бапкері Дидар Сләмов, шабандозы Ақжол Заман.
Атжарыс жеңімпаздары салтанатты жағдайда жеңіс тұғырында марапатталды. Ұйымдастырушылар аламан бәйге жеңімпазы, шабандоз бала мен ат иесіне 1-дәрежелі диплом мен темір тұлпар кілтін тапсырды.

Пікір: