Белорусь Республикасының астанасы Минск қаласында 2-4 желтоқсанда таэквон-додан Әлем Кубогы болды. Бұл додада әлемнің 22 елінен келген спортшылар бақтарын сынады. Біздің ауданнан Бақыт Рахимов жаттықтырып жүрген таэквон-дошылар қатысты.Олар Еркебұлан Зияш 3 орынды, Жасұлан Смағұлов 4 орынды иеленіп, жерлестеріне жеңіс сыйлады. Аталмыш додаға барып қайтқан Еркебұланды әңгімеге тартқан едік.
- Еркебұлан, сені жеңісіңмен құттықтаймыз! Таэквон-домен шұғыл-данғаныңа көп болды ма?
- Мен бұл спорт түрімен 9 жасымнан бастап айналыстым. Маған бұл шығыс жекпе-жегі өте ұнайды. Сонымен қоса, жас кезінде әкем Бауыржан бокспен айналысса, анам Дариға жеңіл атлетикаға әуес болған. Ата-анамның бойындағы қасиет менің де әуесқойлығыма қозғау салған шығар. Біз отбасымызбен салауатты өмір салтын ұстанамыз.
- Алғашқы жеңіске қашан қол жеткіздің?

- Ең бірінші рет Қарағанды қала-сында болып, онда 3-орын алған болатынмын. Қазіргі таңда 29 шақты медальдар мен 20-ға жуық мақтау қағаздарым бар.
- Еркебұлан, өскенде кім боласың? Спортты жалғастырасың ба?
- Жалпы, менің арманым энергетик болу. Спорт менің сүйікті ісім, бос уақытымда оны да қоса алып жүремін және таңдаған мамандығымның иесі болғым келеді.
- Әңгімеңе, рахмет!
Еркебұлан өзі шұғылданатын таэквон-доға тән қасиеттердің барлығы бойынан табылатын, батылдығы, шыдамдылығы, табандылығы мол жас өрен. Оны көкпектіліктер мақтан етеді. Ол бүгінде бәйгеден оза шауып, алтын ұя мектебінің мақтанышына айналып, ұстаздары мен ата-анасын да қуанышқа бөлеп жүр. Жарайсың, Еркебұлан!

Клара ҚАЙЫПЖАНҚЫЗЫ

Пікір: