Семей қаласында 19 шілде күні қалалық мәдениет сарайында отбасылық өмір салтын насихаттауға бағытталған «Мерейлі отбасы» ұлттық байқауының қалалық кезеңі өтті,- деп хабарлайды Абай облысының әкімдігі.

Қалалық кезеңнің ұйымдастырушысы: «Отбасы орталығы» қоғамдық қоры мен «Семей қаласының ішкі саясат бөлімі» мемлекеттік мекемесі.
Сайысқа алты отбасы қатысты. Қалалық байқау аясында отбасылар өзін-өзі таныстыруы, «Әлем халықтарының ұлттық дәстүрлері» тақырыбында шағын театрлық қойылым ұсынды.

Марапаттау рәсімінде жеңімпаздар мен қатысушыларға қала әкімінің алғыс хаттары мен қаржылай сыйлықтары табыс етілді.
Қалалық байқаудың жеңімпаздары «Мерейлі отбасы» ұлттық байқауының облыстық кезеңіне қатысады.
«Мерейлі отбасы» байқауы отбасы, адамгершілік, руханият институттарын нығайту, ерлі-зайыптылар жауапкершілігінің маңызын түсіну және ата-аналардың бала тәрбиелеудегі жауапкершілігін арттыру, отбасылық құндылықтарды көрсету және кеңінен насихаттау мақсатында өткізіледі.
Бір ерекшелігі осы сайысқа қатысқан 6 отбасының екеуі Көкпекті ауданынан шыққан атақты әулеттер. Бас жүлде жеңімпазы Шапатовтар әулеті Көкпектіге кеңінен танымал, өнерлі де текті атаның балалары. Бұл сайыста Арслан Шапатовтың отбасы үздік атанды. Жарасымды жұп Альмира және Арслан Шапатовтар ұзақ жылдар бойында Қалихан Алтынбаев атындағы мәдениет үйінің өнерпазы болып, мәдениет саласына көп үлес қосқан жандар.
Үздіктер қатарынан көрінген тағы бір отбасы – Әлімғазы Жақсылықовтың жанұясы. Ұзынбұлақ ауылының тумасы Әлімғазы Жақсылықов бүгінгі күні Семей қаласында әскери қызметкер. Жұбайы Алтынай екеуі де осы Көкпекті ауданында дүниеге келіп, мектеп бітірген. Жақсылықовтар әулетінің отағасы Әлімғазы жасынан спортты жанына серік еткен елжанды азамат.
Жерлестерімізді Семей қаласында өткен сайыста жеткен жетістіктерімен құттықтаймыз!

Пікір: