Желтоқсанның 11 күні Көкпекті ауданына арнайы сапармен «Елімай» футбол клубының өкілдері келді. Олардың келудегі  негізгі мақсаты - ауданымыздың медицина саласына үлкен демеушілік көмек жасау.

Биылғы жылдың тамыз айында Көкпекті ауданы әкімдігі мен «Елімай» футбол клубы арасында серіктестік меморандумына қол қойылған болатын. Меморандум аясында Көкпекті ауданында балалар спортын және жалпы футбол спорт түрін дамыту бағытында ұйымдасқан кешенді шараларды жүзеге асыру жоспарланған. «Елімай» футбол клубының менеджері Думан Балықбаев бастаған делегация өкілдері бұл жолғы сапары барысында аудан әкімі Әділет Нұрсағатұлымен бірге ауданның жас спортшыларымен арнайы кездесу ұйымдастырды және аудан спортын дамыту мақсатында алдағы бірлескен жоспарлар мен жобаларды талқылады. «Елімай» футбол клубы демеушілік көмек ретінде Көкпекті аудандық ауруханасына обьективті аудиологиялық скрининг жасауға арналған «Sentiero Advanced» медициналық құрылғысын сыйға тартты. Сондай-ақ «Елімай» футбол клубының мамандары Көкпекті ауданында футбол сабақтары мен үйірмелерін жүргізетін жаттықтырушылармен арнайы оқыту семинарын өткізді. Балалар және жасөспірімдер спорт мектебінің жас футболшыларына арнап шеберлік сабағы ұйымдастырылды. Аудан әкімі «Елімай» футбол клубының менеджері Думан Балықбаев бастаған делегация мүшелеріне аудан халқы атынан алғыс білдірді. «Елімай» футбол клубымен арадағы серіктестік аясындағы шаралар өз жалғасын табатыны анық.

Пікір: