Біз еліміздің әрбір өңірінде қауіпті індеттен қаймықпай күресіп, адам жанының арашасы болып жүрген жандар жайлы материалдар ұсынамыз. Бала-шағадан жырақта жүрсе де, олар тәулік бойы қызметтерін қалтқысыз атқарады. Солардың бірі – Қарлығаш Бектемірова.

Көкпекті орталық аудандық ауруханасында 35 жыл бойы табан аудармастан еңбек етіп келетін тұрғындардың сүйікті медбикесі - Бектемірова Қарлығаш Әнуарбекқызы бүгінде әлемді жайлаған індетпен күресуде. Медициналық қызметкерлер жетіспегендіктен, шілде айының 17-сі жұқпалы аурулар ауруханасына көмекке шақырылыпты. Содан бері тәулігіне 12 сағат бойы арнайы қорғаныс костюмдерін, резеңке етік киіп, бет-жүзін тұмшалап, қолғап пен көзілдірікті қоса киіп сырқатпен күресіп жүр. Өйтпесе, қауіпті індетті жұқтырып алуы ықтимал. Гиппократ антына адал, алдыңғы орынға қызметін қоятын әйел-ана шаңырақ шаттығына бөленуге, отбасылық міндетін атқаруға мұршасы болмайды.

Ол - орталық аудандық ауруханасының №2 учаскесінің жалпы тәжірибелі мейірбикесі. Қарлығаш Әнуарбекқызы әріптестерімен бірге ауруханаға жатқызылған науқастардың дәрігер тағайындаған ем-домдарын жасап, 14 күн бойы жанқиярлықпен қызмет етеді.Еліміздегі жағдайға байланысты біздер жұқпаның эпидемиологиялық ошағында қызмет жасаудамыз.
-Біз қазіргі сын сағаттарда осы қауіпті індеттің алдын алу жолында бар күш-жігерімізді, алған біліміміз бен тәжірибемізді көрсетіп, аянбай еңбек етуді өз парызымыз санаймыз. Менің тілегім - ешкім ауырмасын. Індет жойылса екен», - дейді мейірбике. - Жағдай жақсарып, індеттің беті қайтып, үйіме аман-есен жетіп, қайтадан қалыпты өмірімізге оралсақ, - деген тілегін білдірді.
Ел азаматтарының денсаулығы жолында уақытпен санаспай, қауіпті індетпен күресте бастарын қатерге тігіп, алдыңғы шепте жүрген дәрігерлер қауымына айтар алғысымыз шексіз.

Пікір: