Еліміздегі міндетті әлеуметтік медициналық сақтандыру Мемлекет басшысының тапсырмасы бойынша Ұлт Жоспары – бес институциональды реформаны жүзеге асыру жөніндегі «100 нақты қадамының» 80-қадамына байланысты және Денсаулық сақтау саласын дамытудың 2016-2020 жылдарға арналған «Денсаулық» мемлекеттік бағдарламасы аясында енгізіліп отыр. Медициналық сақтандыру – халықтың денсаулығын қорғау жүйесі болып табылады.

Міндетті Әлеуметтік Медициналық Сақтандыру енгізуден халық не ұтады? деген сұраққа жауап берер болсақ:
-амбулаториялық дәрі-дәрмектік қамтамасыз ету желісін кеңейту арқылы халыққа көрсетілетін қызмет түрлеріне қолжетімділігі арттырылады
-сапалы медициналық көмек қолжетімді болады
-азаматтардың денсаулығын жақсарту және өмір сүру ұзақтығын арттыру өзекті мәселелері алдыға қойылады.
Бүгінгі таңда басы ауырып, балтыры сыздамайтын адам жоқ. Сондықтан да денсаулыққа қатысты мәселелерді алдын ала ойластыру қашанда оң нәтиже бермек. Әр адам денсаулығы үшін өзі жауапты, дегенмен мемлекет бұл мәселеде қарапайым халыққа көптеген жағдайлар мен ұтымды мүмкіндіктер жасап отыр. Осыдан кейін бұл мәселеге мемлекет және жұмыс беруші де белсенді араласпақ.
Міндетті медициналық сақтандыруды екіге бөліп қарастырар болсақ, оның біріншісі, негізгі сақтандыру түрі. Бұл сақтандыру түріне мемлекеттік бюджеттен тегін көрсетілетін медициналық қызметтер кіреді. Ол еліміздің барлық азаматтарына қолжетімді болады. Мемлекет өз міндетіне медициналық қызметтердің бірнеше түрін алады, атап көрсететін болсақ: жедел жәрдем қызметі, санитарлық авиация, әлеуметтік маңызы бар ауруларға ем көрсету, төтенше жағдайда көмек көрсету және алдын алу шараларына қатысты екпелер.
Ал, екінші түрі міндетті әлеуметтік сақтандыру аясында қаржыландырылатын сақтандыру. Бұл негізгі сақтандыруға кірмеген басқа да медициналық қызметтер түрін қамтитын сақтандыру болады деп көзделуде. Оған амбулаторлық-емханалық көмектер, ауруханада жатып емделу, жоғары технологиялық көмектер кіреді. Сақтандырудың осы түрі міндетті сақтандыру жүйесіне тіркелген азаматтар үшін қолжетімді болады. Өзін-өзі жұмыспен қамтып отырған адамдарға 2020 жылға дейін амбулаторлық-емханалық қызметті бюджет есебінен тегін көрсету де қарастырылған. Сондай-ақ, заңға сәйкес, азаматтар жеке басына арналған, өз қаражаты негізінде немесе жұмыс берушінің қаражатына жасалатын сақтандыру түрлерін де жасай алады. МӘМС-ды енгізумен ІЖӨ-ден денсаулық сақтауға жұмсалатын жалпы шығын пайызы өседі, бұл медициналық қызметтердің жоғары сапасын және қолжетімділігін қамтамасыз етуге көмектеседі.
А.Рахимбаева,
Көкпекті орталық аудандық аурухананың бас дәрігері міндетін атқарушы

Пікір: