Материалдар

14 Наурыз - Көрісу мейрамы, амал мерекесі. Көрісу күнінде халық қыстан аман-есен шыққанына қуанып, бір-бірімен қол алысады. Бұл күні барлық өкпе-реніш ұмытылып, кешіріледі.
Айтулы онкүннің шымылдығы аудандық тарихи-өлкетану мұражайындағы Көрісу күнін атап өтумен басталды. Шараға аудан әкімі Ділдәбек Оразбаев, мәдениет, тілдерді дамыту, денешынықтыру және спорт бөлімінің басшысы Әлібек Саржанов, Қ.Алтынбаев атындағы мәдениет үйінің директоры Нұрлан Тоянкенов және ішкі саясат бөлімінің басшысы Азат Рахимбаев болды.

Сонымен қатар Үлкенбөкен орта мектебінің оқушылары мен Інжу-Маржан ансамблінің әжелері қатысты.
Мақсаты ұлттық құндылықтарды жаңғыртып, Ұлыстың ұлы күні наурыз мерекесінің маңызы жөнінде өнеге сөз айтып, салт-дәстүрімізді дәріптеу. Мұражай қор сақтаушысы Клара Рафикқызы қонақтарға кештің мән-мағынасы мен мазмұнын баяндап берді.
Шарада аудан әкімі Ділдәбек Тәжібайұлы Көрісу күнімен құттықтады: - Бүгінгі келіп жеткен көрісу күні құтты болсын! Көрісу - тек адамдардың бір-біріне амандасып, жақсылық тілейтін қауышу мерекесі ғана емес, сондай-ақ жасы үлкендерге ізет көрсетіп, ілтипат білдіретін дәстүрлі көрініс. Өйткені, көрісу салты бір күннің аясымен шектеліп қалмайды, жыл бойы жалғаса береді. Көрісу күні исламда бар нәрсе емес. Бірақ ол шариғат талаптарына қайшы келмей, онымен үндесіп жатқандықтан, исламмен бірге ғасырлар бойы жасасып келе жатқан біздің төл дәстүріміз. Қасиетті Ораза айымен қатарласып келген Көрісу күні құтты болғай. Жылдан жылға аман-есен жете берейік,- деді аудан басшысы.
Кеште тарихи-өлкетану мұражайының қызметкері Маржан Манарбекқызы ежелгі ырым-тиымдар туралы мәлімет берді. «Інжу-маржан» ансамблінің әжелері салт-дәстүріміз туралы көрініс қойды. Ұлттық дастарқан жайылып, дәстүрімізді дәріптейтін видеороликтер көрсетілді.

Пікір: