Материалдар

31 шілдеде Көкпекті ауданында "Жасыл ел" бағдарламасы бойынша жастар еңбек жасағының жұмысы басталды. Маусымның ашылу салтанатына аудан әкімі Ділдәбек Оразбаев келіп, балаларға табыс тіледі.
Бағдарлама оқушыларға, студенттерге және жұмысқа орналаспаған жастарға қаражат табуға мүмкіндік береді. Оның шеңберіндегі жұмыстың негізгі бағыттары аумақтарды жинау және абаттандыру, көгалдандыру, ағаштар мен жасыл желектерді отырғызу болып табылады.

Жастар ресурстық орталығының директоры Әлижан Артықбаевтың айтуынша, әр таң сайын жастар жасағының жауынгерлеріне жиын өтеді, олар белгілі бір тапсырмалар алады, бір күнге жұмысты жоспарлап, қауіпсіздік техникасы бо-йынша нұсқаулықтан өтеді. Жасыл ел сарбаздары толыққанды жұмыс істеу үшін барлық қажетті заттармен қамтамасыз етіледі.
Ағымдағы жылы «Жасыл ел» бағдарламасы бойынша бір айға 30 квота бөлінді. «Жасыл ел» жасағының жауынгерлері жұмыстарын Көкпекті орта мектебінің жанындағы жастар саябағынан бастады – оның аумағы толығымен тазаланып, шөбі шабылды. Енді олар Ж. Шайжүнісов орта мектебінің жанында орналасқан Құдайберген Нұрғалиев атындағы саябаққа тазалық жасауға аттанды.
- Еңбек жасақтарының қызметі жыл сайын жақсара түсіп, олар өздерін оң нәтижелі сапалы жұмыстарымен көрсетіп келеді. «Жасыл ел» - жастармен жұмыс істеудің өте маңызды құралы. Осы жоба өз ауылына деген сүйіспеншілік сезімін оятып, еңбекпен шынығып ата-анасына қомақты көмек береді, - деп Әлижан Әлімжанұлы өз пікірімен бөлісті.
Естеріңізге сала кетейік, «Жасыл ел» жастар еңбек қозғалысы Қазақстанда тұңғыш Президент Нұрсұлтан Назарбаевтың бастамасымен басталды. Студенттердің жұмысы экологияны жақсартуға, орман алқаптары мен жасыл желектерді қорғауға ғана емес, жастарды еңбекке тәрбиелеуге де бағытталған. Туған жерге қамқорлық жасау арқылы патриотизм мен азаматтық шыңдауға тәрбиеленеді.

Пікір: