Материалдар

12 тамыз күні Абай облысының әкімі Нұрлан Ұранхаев құрылысшыларды кәсіби мерекелерімен құттықтап, облыстың үздік өкілдерін марапаттады.
Өңір басшысы құрылыстың жоғары қарқыны өңір экономикасы мен халықтың тұрмысына тікелей әсер ететінін атап өтті.
- Құрылысшының жұмысы қашанда жасампаз еңбек болған. Сіздер жұмыс істейтін сала материалдық өндірісті дамытудың, халықтың тұрғын үй және мәдени-тұрмыстық жағдайларын жақсартудың негізін құрайды. Сондықтан құрылыс – кез келген мемлекеттің қалыптасуы мен дамуында өте маңызды рөл атқарады деп айта келе Нұрлан Телманұлы құрылыс саласының өкілдеріне құрмет грамоталарын тапсырды.

Марапатталғандардың қатарында біздің жерлесіміз, сала ардагері Болат Бекенұлы да болды. Майталман маман иесі облыс әкімінің Құрмет грамотасын алды.
Болат Бекенұлы өмірінің көп бөлігін құрылыс саласындағы жұмысқа арнады. Аудан игілігі үшін 43 жылға жуық жұмыс істеген.
Болат Бекенов еңбек жолын Семей құрылыс техникумына оқуға түсіп, кейін оны үздік аяқтағаннан кейін бастаған. 1981 жылдың мамыр айында бозбаланы Семсельстрой-22 трестінің ПМК 2203 3-разрядты тас қалаушы болып жұмысқа қабылдайды. 1981 жылы ПМК 2203 №3 жасағының шебері болып ауыстырылды. 1986 жылдың сәуірінен 1995 жылдың маусымына дейін осы мекеменің бас инженері болды. Осы ұзақ уақыт аралығында ол Тассай, Биғаш, Теректі, Үлкенбөкен және Көкпекті ауылдарында, сондай-ақ Жаңа-семей ауданының Түрксіб ауылында мектеп салуға белсенді қатысты. Сонымен қатар, ПМК қызметкерлерінің күшімен көптеген басқа нысандар – тұрғын үйлер, жылу трассалары бар қазандықтар, әлеуметтік нысандар, мал шаруашылығы салынды. Көкпекті ауылында телемұнараны да ПМК жұмысшылары тұрғызған.
1995 жылдан 2008 жылға дейін Болат Бекенұлы Көкпекті ауылдық округінің әкімі, кейін ТҮКШ, жолаушылар көлігі және автомобиль жолдарының басшысы болды. Бұдан әрі сәулет, қала құрылысы және құрылыс бөлімінің басшысы, 2015 жылдан 2018 жылға дейін ол Екібастұз қаласында «AnvarSagat» ЖШС инженер-сарапшысы болды. 2019 жылдан бас-тап қазіргі уақытқа дейін Болат Бекенұлы «VKETNA» ЖШС инженер-сарапшысы қызметін атқарады. Оның міндетіне техникалық қадағалау, яғни жобаның барлық кезеңдерінде құрылысты қадағалау, оның ішінде сапасы, мерзімі, құны, орындалған жұмыстарды қабылдау және объектілерді пайдалануға беру кіреді.
Болат Бекенов көп жылғы адал еңбегіне «аудан экономикасын дамытуға қосқан үлесі үшін» медалімен марапатталған.

Пікір: