Материалдар

Жалпыхалықтық референдум өтетін күн жақындаған сайын оның маңызы мен мақсатын түсіндіру бағытындағы жұмыстар да қыза түсті. 26 мамыр күні Қазақстан Республикасы Парламент Мәжілісінің депутаты, «Аманат» партиясының фракция мүшесі Ерлан Саиров жұмыс сапарымен Көкпекті ауданына келіп, халықпен кездесті.
Аудандық мәдениет үйінде өткен кездесуге аудан әкімі Раджан Сейтқанов, құрметті ақсақалдар, қоғам белсенділері, мемлекеттік қызметкерлер, жас мамандар, ауданда құрылған референдум бойынша арнайы түсіндіру тобының мүшелері, тұрғындар қатысты.
Кездесу барысында елімізде жүзеге асырылып жатқан саяси реформалар және Конституцияға өзгерістер енгізуге бағытталған бүкілхалықтық референдум өткізу мәселесі талқыланды. Бұл жолғы жиын өте қызу және мазмұнды өтті.

- Біріншіден, Конституцияның жаңадан енгізіліп жатқан баптары бойынша Президенттің белгілі бір партияның немесе саяси ұйымның мүшесі болуға қақысы жоқ. Екіншіден, Президенттің жақын туыстарының барлығы жоғары мемлекеттік лауазымға немесе квазимемлекеттік секторда, әсіресе ірі мемлекеттік компанияларда басқарушы бола алмайды. Сонымен бірге Президент өзінің құзырының қомақты бөлігін Парламентке, оның ішінде Мәжіліске беріп отыр. Ең негізгі өзгеріс – Ата Заңымыздың 6-бабына «Қазақстан Республикасының жері, табиғи ресурстары және жер ресурстарының барлығы халық меншігінде» деген жаңа редакция пайда болды,– деді Ерлан Бияхметұлы.
Сондай-ақ жиын барысында жазушы Ратбек Арынұлы, қоғам белсендісі Қайдар Шайзадинов, ардагерлер кеңесінің төрағасы Сләмбек Мұқашев сөз сөйлеп, өз ойларын білдірді.
Қашан да елдің көңілінде жүрген түйінді сұрақтарды көтеретін Ратбек Арынұлы елдегі саяси өткір сұрақтарды ашық талқылау керек екендігіне баса назар аудартты. Ардагерді шет ел азаматтарына уақытша ЖСН беру мәселесі алаңдатады.
- Қазіргі уақытта таралып жатқан фейк, яғни жалған ақпарат көп. Дәл қазіргі уақытта басқа елдерден келіп, уақытша ЖСН алып жатқан азаматтар саны соншама көп емес. Барлығы мемлекет бақылауында. Ішкі істер министрлігі, басқа да органдар жұмыс істеп жатыр. Мен өзім Мәжілістің Қорғаныс және қауіпсіздік комитетінің мүшесімін, - деп сендірді Мәжіліс депутаты.
Аудандық ардагерлер кеңесінің төрағасы Сләмбек Насырбайұлы өз кезегінде Конституциялық реформалардың ел мүддесіне сәйкес келетіндігіне тоқталып, "Конституциялық өзгерістердің болашақ ұрпаққа әкелетін жақсылығы мол, сондықтан референдумға барып, жақтап дауыс беру керек" деп кесіп айтты.
Қайдар Асқарұлы болса өз кезегінде аймақтық инфрақұрылым мәселесіне тоқталды. Халықаралық Омск-Майқапшағай тас жолының Қалбатау-Боғас учаскесі қашан жөнделетіні барша аудан халқын мазалаған өзекті сұрақ.
– Референдумды қолдаймын. Іс жүзіндегі Ата заңмен «Жаңа Қазақстан» құру мүмкін емес. Өзгерістер халық үшін өте пайдалы болатынын көріп отырмын. Сізге Көкпекті халқының ең үлкен арыз-өтінішін жеткізсем деп отырмын. Елді қинап отырған жол мәселесі. Халықаралық маңызы бар жолдың Қалбатау-Боғас бөлімі қашан жөнделеді? Бұл бағытта қандай жұмыс атқарылуда? Биыл құрылыс басталады ма?, - деп сұрақтарды төтесінен қойды.
Мәжіліс депутаты Омск - Майқапшағай халықаралық жолын жөндеу жұмыстары туралы күн тәртібіндегі өзекті мәселе бойынша 27 мамыр күні Тарбағатай ауданында үлкен жиын өтетінін мәлімдеді.
- Ертең Тарбағатайға «Қазавтожол» төрағасының орынбасары арнайы келеді. Үлкен жиында мәселе талқыланады. Бүгінгі күні барлық депуттатар бұл мәселемен айналысуда. Нақтысын айтқанда жол жөндеуге бөлінген қаражат қолды болып кеткен. Сот арқылы жымқырылған қаражатты қайтару процесі жүріп жатыр. Алайда мердігер ұйым өз қаражаты есебінен жұмысты бастайтын болды, - деді Ерлан Бияхметұлы.
Кездесу барысында референдум өткізуге ерте емес пе? Дәл қазіргі уақытта не үшін Конституцияға өзгерістер енгізу керек деген сұрақтарға да жауап берілді.
- Референдум өткізу туралы Президенттің ең негізгі логикасы – халық дауыс беру керек. Халық дауыс берген жағдайда ескі жүйеге оралудың жолы жабылады. Жалпыхалықтық референдум – жаңа және әділ Қазақстанды құру жолындағы үлкен қадам. Бұл – ескі мен жаңаның арасындағы жолайрық. Егер біздің балаларымыз бен немерелеріміз Әділетті Қазақстанда өмір сүрсін десек, онда 5 маусым күні оған барлығымыз дауыс беруге тиіспіз. Сол үшін де аймақтарға келіп, жан-жақты түсіндіру жұмыстарын жүргізіп келеміз, – деп сөзін түйіндеді Ерлан Бияхметұлы.
Ата Заңымызға енгізілетін өзгерістердің барлығы азаматтардың өз конституциялық құқықтарын толықтай жүзеге асыруының негізін қалыптастырады. Ол моральдық-құқықтық құндылықтардың негізгі постулаттарын, саяси институттардың даму бағыттарын қамтитын классикалық еуропалық үлгіге сүйенеді. Мұнда ешкімнің тарихи рөліне баға берілмейді. Конституция ел азаматтарының ортақ мүддесін көздейді.

Пікір: