Материалдар

Айша Қалибекқызы Биқатова, аудандық мәслихаттың депутаты: - Қазақстан Республикасының Президенті Қасым-Жомарт Тоқаев халыққа үндеу жолдады. Бұл үндеуді, шыны керек, асыға күттік. Қазір елдегі жағдай бәрімізге белгілі. Сол себепті барлық қауіпсіздік шараларын сақтап үйде отырмыз. Енді карантин мерзімі 11 мамырға дейін ұзарды. Президентіміз:«Қауіпсіздік шараларын қатаң сақтаған жөн. Онсыз болмайды. Олай етпесек, індеттің жаңа ошақтары пайда болуы мүмкін. Коронавирусқа жеңіл-желпі қарауға болмайды. Карантин талаптарынан бір сәтте бас тартсақ, дертті қайтадан өршітіп аламыз. Коронавирус – адамның денсаулығына қатер төндіретін өте жұқпалы індет. Мұны бүкіл әлем мойындап отыр. Ал оны жоққа шығарып, жұртқа жалған ақпарат таратудың арты жақсылыққа апармайтыны белгілі. Бұл – азаматтарымыздың денсаулығына нұқсан келтіретін әрекет», - деп бүгінгі ахуалға баға берді. Мұны еліміздің әр азаматы жақсы түсінуі керек деп ойлаймын. Десе де бұл жолы аз да болса жеңілдіктер жасалатынын да тізбектей кеткен еді.

Соның ішінде балаларға қатысты ойын алаңқайларының ашылуына байланысты ақпарат мені әже ретінде елең еткізді. Расымен де, карантин жағдайын үлкендер түсінгенімен, балаға түсіндіріп, далаға шығуға болмайтынын айту өте қиын. Күн жылынған сайын балалар да далаға елеңдеп, күн ұзағына терезеден аулаға телміреді. Осыны түсінген мемлекет басшысы: «Оқшаулану кезінде ата-аналарға кішкентай балаларымен төрт қабырғаға қамалып отыру оңай емес. Мемлекеттік комиссия әкімдіктермен бірлесіп, аулаларды және ойын алаңдарын ашу мәселесін ойластыруға тиіс. Әрине, алдымен, барлық санитарлық нормалар мен санитарлық қауіпсіздік талаптары қатаң сақталуы керек», - деді. Әрине, бұл дегеніміз балаларды қараусыз аулаға жібере салу емес. Алаңқайға шықсақ та барлық санитарлық талаптарды сақтап, сақтық шараларын қадағалағанымыз дұрыс. Мұны да жақсы түсіне білгеніміз абзал.

Пікір: