Материалдар

Көңілі даладай дархан қазақ елі қашаннан дос, туысқа есігі ашық, қиналғанға қамқор бола білген халық. «Қолы ашықтың жолы ашық» деген даналар келер ұрпағына жомарттықты жолдас, мәрттікті жанына серік ете білуге үндеген. Адам өміріндегі ең игі істерінің бірі мұқтаж жандарға қамқорлық жасау. Адамдар бір-біріне қайырымдылық жасап, мейірімділік таныту арқылы өздері де жақсылыққа кенеледі. Мұндай іс-әрекеттің мысалы ретінде елордадан келген ірі бизнесмен Айдын Рахымбаевтың өз жерлестеріне гуманитарлық көмек көрсетуі болып табылады.

Құлынжон ауылдық округінің әкімі Самархан Демесіновтың айтуынша, Айдын Жұмаділұлы ауыл тұрғындарына қажетті азық-түлік сатып алу үшін ақшалай көмек берді. Облыс орталығында 5 тонна жоғары сұрыпты ұн, 1000 литр күнбағыс майы, 5 тонна макарон өнімдері сатып алынды.

Барлық өнімдер Құлынжон ауылының 200 ауласына бөлінді. Әр отбасы үшін 1 қап жоғарғы сортты ұн, 5 литр күнбағыс майы, 5 кг макарон өнімдері бөлінді. Қалған бөлігін әкімдік Көкжыра ауылының 25 отбасына тараттып.

Осы азық-түлікті жеткізу үшін «Воротников» ЖШС басшысы Александр Воротников "Камаз" автокөлігін берді.
Айымгүл Байтуринова, Зейнеткер, Құлынжон ауылы:
- Біздің жерлесіміз Айдын Рахымбаев өзінің туған жерін, жерлестерін әрдайым естен шығармайды. Мектепке, округке қайырымдылық көмек көрсетеді. Міне, осы жолы да біздің денсаулығымызды күтіп, карантиндік режим ережелерін сақтауымыз үшін жаны асыл, жомарт жерлесіміз қажетті азық-түлікке қаражат бөлді. Үлкен рахмет! Барлық тұрғындардың атынан біз оған мейірбан жүрекпен жасап жатқан жанашырлығына алғыс білдіреміз! Дәл осындай әрқашан халқының қамын ойлап жүретін, қайырымдылыққа жаны құштар азаматтар көп болсын!

Қанат Апсадықова

Пікір: