Материалдар

Ауылдарымызды абаттандыру және олардың санитарлық жағдайы туралы мәселе басшылықтың ең өзекті тақырыбы. Таза ортаны қалыптастыру тазалық жасаудан емес, ластамаудан басталады. Қандай себеппен екені белгісіз, Көкпекті ауылдық округінің тұрғындары бұл қарапайым шындықты ұмыта бастады. 

Сенбілік мәселесінен бөлек, бүгінгі таңда тұрмыстық қалдықтарға арналған жергілікті қоқыс үйіндісінің жағдайы ұзақ уақыт бойы шешілмей келе жатқан мәселе күйінде қалып отыр. Өткен жылы қоқыс төгу орны Ж. Шайжүнісов атындағы орта мектептің аумағынан тысқары орналасқан жер теліміне ауыстырылды. Осы аз уақыт ішінде бұл аумақ жергілікті басшылықтың «бас ауруына» айналды.

Оның себебі баяғы сол жергілікті тұрғындардың салғырттығы. Қоқыс тастайтын жердің белгіленген шекарасы болса да, тұрмыстық зат қалдықтары оның шетіне шығып кететіні де жасырын емес. Соған қарағанда қоқыстарды белгіленген орынға апарып төгу біздің тұрғындар үшін басы артық жұмыс боп есептелетін сияқты.
Учаскелік полиция инспекторлары – лейтенант Нұрлыбек Саден мен майор Жасұлан Разаевпен бірге біз "қылмыс орнына" барып, мәселенің ауқымын анықтап қайттық.
Бұл аумақтағы жағдай шынымен де өкініш тудырады. "Қоқыс жолының" мөлшерлі жерге жетпей-ақ басталып кететіні таңғалдырды. Сонымен қатар, біз сапарымыздың кезінде бір ауыл тұрғынын заңды белшесінен басып, рұқсат етілмейтін жерге қоқыс қалдықтарын төгіп жатқан әрекетінің үстінен түстік. Учаскелік полиция инспекторлары ол кісімен профилактикалық сұхбат жүргізді. Құқықбұзушылық алғаш рет орын алғанда тек ескерту жасалады. Дегенмен егер азамат екінші рет осындай әрекетпен ұсталатын болса, жаза қатал болады.
Естеріңізге сала кетейік, Қазақстан Республикасының 2014 жылғы 5 шілдедегі "Әкімшілік құқықбұзушылық туралы" Кодексінің 505 бабы - Қалалар мен елді мекендердің аумақтарын абаттандыру ережелерін бұзу, сондай-ақ инфрақұрылым объектілеріне нұқсан келтіру, қала мен елді мекендердің жасыл желектерін жою және бүлдіру:
1. Қалалар мен елді мекендердің аумақтарын абаттандыру ережелерін бұзу, сондай-ақ инфрақұрылым объектілеріне нұқсан келтіру, қала мен елді мекендердің жасыл желектерін жою және бүлдіру – жеке тұлғаларға ескерту жасауға немесе 20 АЕК, шағын кәсіпкерлік субъектілеріне немесе коммерциялық емес ұйымдарға – 30, орта кәсіпкерлік субъектілеріне - 40, ірі кәсіпкерлік субъектілеріне - 100 АЕК мөлшерінде айыппұл салуға әкеп соғады.
2. Осы баптың бірінші бөлігінде көзделген, әкімшілік жаза қолданылғаннан кейін бір жыл ішінде қайталап жасалған құқықбұзушылық әрекеттері орын алған жағдайда: жеке тұлғаларға – 30, шағын кәсіпкерлік субъектілеріне немесе коммерциялық емес ұйымдарға – 40, орта кәсіпкерлік субъектілеріне - 50, ірі кәсіпкерлік субъектілеріне - 300 АЕК мөлшерінде айыппұл салынады.
Бұндай жағдайлардың пайда болуына қандай себептер әсер етті? Неге біздің ауыл тұрғындары өз аумақтарын тазартуға қатысудан бас тартқанды былай қойғанда, тұрмыстық қалдықтарды арнайы бөлінген орынға апарып тастауды да қадалағасы келмейді? Біздің округтің және ауданның әрбір тұрғыны осы сұраққа өзі жауап беруі тиіс. Бұл "біреу" үшін емес, барлық және жеке алып қарағанда әрбір адам үшін мәселе болып табылатынын түсіну маңызды. Сіздердің мінез-құлықтарыңыз өсіп келе жатқан ұрпақ үшін үлгі болатынын ұмытпаңыздар! Және олар келешекте біздің бүгін алдын алуымызға болатын экологиялық мәселелердің құрбаны болуы әбден мүмкін.

Пікір: